Nikol Paşinyana növbəti “şapalaq”
Bakı, 31 oktyabr, Vüqar Seyidov, AZƏRTAC
2022-ci il oktyabrın 28-də Kollektiv Təhlükəsizlik Müqaviləsi Təşkilatının (KTMT) üzvü olan dövlətlərin xarici işlər nazirləri arasında videokonfrans rejimində məsləhətləşmələr aparılıb, sonra isə Təşkilatın Kollektiv Təhlükəsizlik Şurasının videokonfrans rejimində növbədənkənar sessiyası keçirilib.
AZƏRTAC-ın xəbər verdiyi kimi, bu sessiyanın işində Ermənistan Respublikasının baş naziri Nikol Paşinyan, Belarus Respublikasının Prezidenti Aleksandr Lukaşenko, Qazaxıstan Respublikasının Prezidenti Kasım-Jomart Tokayev, Qırğızıstan Respublikasının Prezidenti Sadır Japarov, Rusiya Federasiyasının Prezidenti Vladimir Putin, Tacikistan Respublikasının Prezidenti Emomali Rəhmon və KTMT-nin baş katibi Stanislav Zas iştirak edirdi.
KTMT-nin baş katibi Stanislav Zas KTMT Kollektiv Təhlükəsizlik Şurasının qərarı ilə 2022-ci il sentyabrın 15-də Təşkilatın Ermənistan Respublikasına göndərilmiş Missiyasının işi barədə məlumat verib. Bildirilib ki, 2022-ci il sentyabrın 13-nə keçən gecə Ermənistan-Azərbaycan sərhədində vəziyyət kəskinləşib, ağır silahlardan və pilotsuz uçuş aparatlarından istifadə edilməklə silahlı toqquşmalar baş verib, nəticədə çoxsaylı insan tələfatı olub.
Beləliklə, budəfəki sessiyanın gündəliyini nəzərə alaraq onu şərti olaraq “erməni sessiyası” adlandırmaq olardı. Təbii ki, Yerevanda bu sessiyaya xüsusi həyəcanla hazırlaşmışdılar və yəqin ki, müvafiq nəticələr gözləyirdilər. Nikol Paşinyanın pafoslu çıxışı buna sübut idi.
Lakin Ermənistan baş nazirinin, necə deyərlər, bu dəfə də bəxti gətirmədi. Onun çıxışından sonra söz alan Belarus Respublikasının Prezidenti Aleksandr Lukaşenko erməni həmkarına açıq-aşkar dedi ki, Azərbaycan bəlkə də Ermənistan üçün düşmən hesab edilir, lakin Təşkilatın digər üzvləri üçün Azərbaycan nəinki düşmən, heç əleyhdar da deyil, Ermənistan kimi Azərbaycan da bu ölkələrin hamısı üçün “doğmadır”.
Paşinyan ona rəğbət və dəstək bildirən sözlər eşidəcəyini gözlədiyi halda belə bir məsləhət dinləməli oldu ki, vaxt itirmədən Azərbaycan ilə danışıqlar masası arxasında əyləşmək və mövcud problemləri həll etmək lazımdır. Lukaşenkonun bu çıxışını Ermənistana ünvanlanmış məzəmmət kimi qiymətləndirmək olardı. Çünki o, vaxt itirir və fikir ayrılıqlarını danışıqlar masası arxasında həll etmək əvəzinə başqa dövlətlərdən kömək almaq üçün yalvarır. Belarus lideri deyib: “Əks halda sizin özünüz üçün pis olacaq”.
Yox, Ermənistanın baş naziri həmin onlayn görüşə bundan ötrü getməmişdi. Dəstək almaq ümidində olan Paşinyan öz ünvanına sərt tənqid, Azərbaycanın dəstəklənməsini eşitdi. Lukaşenko Azərbaycan Prezidenti İlham Əliyevi “əsil bizim adam” adlandırdı. Həmin anda Paşinyanın üzünə baxan dərhal görərdi ki, o necə məyus olub, növbəti dəfə alçaldıcı şəkildə uğursuzluğa düçar olduğunu başa düşüb.
Azərbaycan bu epizodda da qalib çıxdı. O, səfərdə - KTMT meydanında keçirilən oyunda qalib gəldi. Ermənistanın daxil olduğu və Azərbaycanın daxil olmadığı hərbi blokun üzvləri olan ölkələrin mütləq əksəriyyəti Azərbaycanı dəstəklədi. Ermənistanın uzun illər boyu ümid bəslədiyi Təşkilat tərəfindən Azərbaycanın dəstəklənməsi dövlətimizin başçısı İlham Əliyevin ölçülüb-biçilmiş, sayıq, praqmatik və ən başlıcası, səmimi siyasətinin nəticəsi oldu.
Paşinyanın növbəti “şapalaq”dan çıxarmalı olduğu ibrət dərsi isə sadədir - regional siyasətin korifeylərinə qulaq asmaq və onların dediyini etmək lazımdır. Axı onlar pis məsləhət verməzlər. Onda belə uğursuzluqlar da az olar.
Bölmənin digər xəbərləri
