Növbəti DOST mərkəzinin istifadəyə verilməsi ölkəmizdə sosial sahədə aparılan islahatların təzahürüdür
Bakı, 21 may, Səadət Hakıyeva, AZƏRTAC
Yürütdüyü siyasətdə dostluğu, qardaşlığı, sülhü, həmrəyliyi tərənnüm edən Azərbaycan ehtiyacı olanlara köməyini heç vaxt əsirgəməyib. Ölkəmiz nəinki koronavirus pandemiyası dövründə, bundan əvvəlki illərdə də bir çox dövlətlərə və beynəlxalq qurumlara təmənnasız yardım edib.
Bu fikirləri AZƏRTAC-a açıqlamasında Milli Məclisin deputatı, professor Kamilə Əliyeva söyləyib.
Deputat deyib ki, hələ ötən əsrin 90-cı illərindəki çətin dövrlərdə də bu istiqamətdə addımlar atılıb. Ulu öndər Heydər Əliyev qonşu Gürcüstanda enerji böhranı yaranarkən bu ölkəyə yardım əlini uzadıb. Bu yaxınlarda 40-dan çox dövlət və hökumət başçısının, nüfuzlu beynəlxalq təşkilatların rəsmilərinin iştirakı ilə keçirilən Qoşulmama Hərəkatının videokonfrans formatında Zirvə görüşündə dövlətimizin başçısı Azərbaycanın bir daha bu ənənəyə sadiqliyini nümayiş etdirərək, Ümumdünya Səhiyyə Təşkilatına əlavə 5 milyon dollar vəsait ayrıldığını bildirdi. Bu, bir daha ölkəmizin koronavirus pandemiyası ilə mübarizədə əməli addımlarını dünyaya nümayiş etdirdi. Bir daha hər kəsə göstərildi ki, Azərbaycan dövləti hər zaman dostlarının, tərəfdaşlarının yanındadır, hər zaman onların problemlərinin həllində öz köməyini göstərməyə hazırdır.
Ölkədə sosial sahədə aparılan islahatlardan və insanların məmnunluğuna xidmət edən layihələrdən danışan deputat bu günlərdə Prezident İlham Əliyevin və birinci xanım Mehriban Əliyevanın iştirakı ilə 3 saylı DOST mərkəzinin istifadə verilməsini qeyd edib. Bildirib ki, bu gün məlum səbəblərdən dünyada az qala iqtisadiyyatların çökdüyü, bütün layihələrin icrasının dayandırıldığı bir vaxtda Azərbaycanda növbəti DOST mərkəzinin açılması və yeni iş yerlərinin yaradılması böyük hadisədir. Bu, həm də ölkəmizin gücünün, Prezidentimizin iradəsinin və qətiyyətinin göstəricisidir. Mərkəzdə 130 nəfərdən çox işçi və “Könüllü DOST” proqramı üzrə 50 könüllü çalışacaq. Mərkəz gün ərzində 500, il ərzində isə ümumilikdə, 150 mindən artıq vətəndaş qəbul edə biləcək. Bunlar vətəndaş məmnunluğunun təmin edilməsi üçün görülən böyük işlərdir. Dövlət başçısının da dediyi kimi, bu, çox gözəl sosial təşəbbüsdür. Azərbaycan bu sahədə də liderlik göstərir. DOST mərkəzlərinin fəaliyyətə başlaması sosial sahədə görülən işlərin, aparılan islahatların əyani təzahürüdür.
Deputat diqqətə çatdırıb ki, mərkəzin açılışından sonra Azərbaycan Televiziyasına müsahibə verən Prezident pandemiya ilə bağlı ölkələr və beynəlxalq qurumlar arasında da əməkdaşlığa toxundu, çox maraqlı fikirlər söylədi. Bildirdi ki, xarici siyasətdə qarşılıqlı dəstək sözdə yox, əməldə olmalıdır, həmrəylik əməldə olmalıdır. Eyni zamanda, bəyan etdi ki, çətin gündə kimin imkanı varsa, kömək etməlidir və elə bu səbəbdəndir ki, Azərbaycan tərəfindən 13 ölkəyə, o cümlədən üç beynəlxalq təşkilata artıq yardım göstərilib. Ölkə Prezidentinin də vurğuladığı kimi, bu, bir daha bizim məsuliyyətimizi göstərir. Doğrudan da pandemiya dövründə həm insanlar, həm də ölkələr özünün əsl simasını üzə çıxardı. Elə insanlar var ki, pandemiya dövründə onlara əl vermək böyük günah olar. Elə ölkələr var ki, pandemiya dövründə özlərinə qapanıblar, xüsusilə, ilkin mərhələdə bəzi addımlar atıblar və indi, görünür, utanırlar. Ancaq Azərbaycan o ölkələrdəndir ki, həmişə üzüağ, alnıaçıq olub və pandemiya dövrü bunu bir daha təsdiqləyib.
Deputat deyib: “Həqiqətən Azərbaycan öz tarixində çox imtahanlarla, sınaqlarla üzləşib, hər birindən də üzüağ, alnıaçıq çıxıb. Son 3 ayın hadisələri bir daha bunun əyani təsdiqidir. Biz bununla qürur duyur, dövlətimizə, onun rəhbərinə minnətdarlığımızı ifadə edirik”.
Bölmənin digər xəbərləri
