Oleq Şaripov: Azərbaycan vəsfəgəlməz təbiət mənzərələri ilə zəngindir
Riqa, 30 oktyabr, AZƏRTAC
Latviya radio və televiziyasının lsm.lv xəbərlər portalında bu ölkədəki Tatar-Başqırd Cəmiyyətinin “Çişma” verilişinin oktyabr buraxılışı yerləşdirilib.
AZƏRTAC xəbər verir ki, Avropa Tatar Gəncləri Cəmiyyətinin sədri Oleq Şaripov verilişdə çıxış edərək bu yaxınlarda Azərbaycana, Bakı şəhərinə səfəri barədə danışıb.
“Bakıda təxminən 10 gün qaldıq və bu səbəbdən, orada çox şey gördük və çoxsaylı insanlarla ünsiyyətdə olduq. Bakıdan iki cür təəssüratla ayrıldıq: birincisi, bu, çox qədim şəhərdir, qədim tarixi, köhnə küçələri olan qədim şəhər. Yeri gəlmişkən, məşhur “Brilyant əl” filminin 2 epizodu burada çəkilib. Digər tərəfdən, Bakı çoxlu göydələni, müasir qeyri-adi binaları, çoxsaylı idman obyektləri və s. olan yeni və müasir şəhərdir. Mən Bakıda ilk dəfə olduğumdan şəhəri heç nə ilə müqayisə edə bilməzdim. Bakıda çoxdan yaşayan sakinlərin sözlərinə görə, şəhər görünməmiş dərəcədə dəyişib. Bakıda doğulub, buranı tərk edənlər xeyli müddət keçdikdən sonra qayıtdıqda şəhəri tanımırlar!
Azərbaycan vəsfəgəlməz təbiət mənzərələri ilə zəngindir! Əlbəttə ki, Xəzər dənizi boyunca Bakı bulvarını qeyd etmək vacibdir. Buranı səhər də, gündüz də, gecə də gəzmək böyük zövq verir!”
Oleq Şaripov onu da qeyd edib ki, Azərbaycanda 26 min tatar yaşayır, burada Tatarıstan Respublikasının ticarət nümayəndəliyi fəaliyyət göstərir. Azərbaycan tatarlarının öz cəmiyyəti var, onlar mədəni tədbirlər və “Sabantuy” bayramı təşkil edirlər.
Nigar Cəfərli
AZƏRTAC-ın xüsusi müxbiri
Riqa
Bölmənin digər xəbərləri
