OPEC Konfransının prezidenti: Neft bazarında canlanma ilin ikinci yarısında başlayacaq
Bakı, 23 aprel, AZƏRTAC
Qlobal neft bazarında canlanma cari ilin ikinci yarısında başlayacaq.
AZƏRTAC xəbər verir ki, bu sözləri Əlcəzairin Energetika naziri, OPEC Konfransının prezidenti Məhəmməd Arkab deyib.
O bildirib ki, neft istehsalının azaldılması və müxtəlif ölkələrdə yeni növ koronavirus səbəbindən bağlanan iş yerlərinin yenidən açılması nəticəsində cari ilin ikinci yarısında neft bazarında canlanma müşahidə olunacaq : “OPEC neft bazarının vəziyyətini izləmək məqsədilə məsləhətləşmələr və görüşlər keçirməkdə davam edəcək. Neftin qiymətinin aşağı düşməsi COVID-19 ilə əlaqədardır və bu vəziyyət müvəqqətidir, təhlükəli deyil”.
Xatırladaq ki, OPEC və qeyri-OPEC ölkələrinin (“OPEC+”) nazirlərinin ötən həftə videokonfrans formatında keçirilən X iclasında gündəlik neft hasilatının 3 mərhələdə azaldılması qərarlaşdırılıb. Belə ki, may-iyun aylarında “OPEC+” üzrə neft istehsalı sutkada 9,7 milyon barrel, iyul-dekabr aylarında gündəlik 7,7 milyon barrel, gələn ilin yanvarından 2022-ci il aprelin sonunadək isə sutkalıq 5,8 milyon barrel azaldılacaq. Məhdudiyyətlərlə bağlı üçüncü mərhələnin şərtləri bu ilin dekabrında yenidən müzakirə olunacaq.
“OPEC+” üzrə növbəti iclasın isə iyunun 10-da videokonfrans formatında keçirilməsi razılaşdırılıb.
Bölmənin digər xəbərləri
