Ordubad, 13 may, AZƏRTAC

Muxtar respublikanın dilbər guşələrindən biri olan Ordubad rayonunun Anaqut kəndində “Xan Çinar” İstirahət Mərkəzi istifadəyə verilib.

AZƏRTAC-ın Naxçıvan bürosu xəbər verir ki, açılış tədbirində çıxış edən Ordubad Rayon İcra Hakimiyyətinin başçısı Elşad Məmmədov muxtar respublikada həyata keçirilən kompleks quruculuq işlərinin Ordubad rayonunu da ağuşuna aldığını vurğulayıb.

Bildirib ki, yeni yolların çəkilişi, məktəblərin tikintisi uğurla davam etdirilir. “Ordubad” və “Tivi” Su Elektrik stansiyalarının tikintisi və digər layihələrin həyata keçirilməsi də rayonun sosial-iqtisadi inkişafına mühüm töhfədir. Müasir infrastrukturla təchiz edilən istirahət məkanının istifadəyə verilməsi yurdumuza gələn turistlərin təəssüratlarını daha da zənginləşdirəcək, onları tariximiz, mədəniyyətimiz, adət-ənənələrimiz və zəngin mətbəximizlə yaxından tanış edəcək.

Naxçıvan Muxtar Respublikası iqtisadiyyat naziri Tapdıq Əliyev qeyd edib ki, Naxçıvanın turizm potensialından maksimum istifadəyə yönələn tədbirlər ardıcıl şəkildə aparılır. Bu məqsədlə Naxçıvan Muxtar Respublikası Ali Məclisinin Sədrinin 2018-ci il 31 yanvar tarixli Sərəncamı ilə “2018-2022-ci illərdə Naxçıvan Muxtar Respublikasında turizmin inkişafına dair Dövlət Proqramı” təsdiq edilib, proqramda nəzərdə tutulan tapşırıqların icrası diqqətdə saxlanılıb. Ordubad rayonunun Anaqut kəndinin əlverişli təbii-coğrafi şəraiti nəzərə alınaraq burada “Xan Çinar” İstirahət Mərkəzi yaradılıb. Bu isə əhalinin sosial-iqtisadi inkişafında, məşğulluğunun təmin olunmasında, təbii-iqtisadi imkanlardan geniş istifadə edilməsində əhəmiyyətli rol oynayır.

Diqqətə çatdırılıb ki, tikintisinə 2021-ci ilin fevral ayından başlanılan “Xan Çinar” İstirahət Mərkəzinin sahəsi 30 min kvadratmetrdir. Mərkəzdə istirahətin səmərəli təşkili üçün ikimərtəbəli kotejlər, uşaqların istirahətlərini mənalı keçirmələri üçün attraksionlar, istirahət guşələri, kupelər və restoran vardır. Mərkəzin yaradılmasına 750 min manat vəsait sərf olunub ki, onun da 150 min manatı Sahibkarlığın İnkişafı Fondunun, 600 min manatı isə sahibkarın daxili imkanları hesabına sərf olunmuş vəsaitdir.

Qeyd edilib ki, 1550 kvadratmetr sahədə tikinti işləri aparılıb, burada Türkiyə və Çin mənşəli avadanlıqlar quraşdırılıb. 1230 kvadratmetr ərazidə mərkəz üçün 9 ədəd 2 mərtəbəli kotejlər, qonaqların istirahəti üçün 220 yerlik söhbətgah, hər biri 10 nəfərlik olmaqla 4 kupe, 40 yerlik restoran, mətbəx, attraksion, mağaza, iş otağı və digər köməkçi sahələr var. Mərkəzdə 20 yeni iş yeri yaradılıb, işçilər nahar yeməyi və xüsusi geyim formaları ilə təmin olunublar. Mərkəzdə işıqlandırma sistemi, təhlükəsizlik kameraları, “Wi-Fi”, daxili rabitə quraşdırılıb, ərazi abadlaşdırılıb. Tapdıq Əliyev “Xan Çinar” İstirahət Mərkəzinin kənd turizminin inkişafındakı böyük rolunu nəzərə alaraq sakinlərə, eləcə də buraya gələn qonaqlara milli mətbəx nümunələrimizin tanıdılması, təbliğ olunması və yüksək xidmətin göstərilməsi, mərkəzdə fəaliyyət göstərən mağazada yerli istehsal məhsullarına, o cümlədən ailə təsərrüfatı məhsullarına üstünlük verilməsi, məhsulların keyfiyyətinə, qiymətinə nəzarət edilməsi istiqamətində tövsiyələr verib.

İqtisadiyyat naziri muхtаr rеspublikаnın sоsiаl-iqtisаdi tərəqqisinə, sаhibkаrlıq fəаliyyətinin inkişаfınа, turizm potensialının və əhаlinin rifаhının yüksəldilməsinə göstərilən diqqət və qаyğıyа görə Ali Məclisin Sədrinə minnətdаrlıq edib.

Naxçıvan Muxtar Respublikası Turizm Departamentinin direktoru Əkbər Novruzov turizmin inkişafı üçün yaradılan münbit şəraitdən danışıb. Vurğulayıb ki, istirahət mərkəzinin istifadəyə verilməsi Naxçıvanın turizm potensialını artırmaq və muxtar respublikamıza gələn qonaqların istirahətini mənalı təşkil etmək baxımından mühüm əhəmiyyət daşıyır.

“Xan Çinar” İstirahət Mərkəzinin sahibkarı Elxan Hacıyev göstərilən diqqət və qayğıya görə dövlətimizə minnətdarlıq edib.