Özbəkistana turist axını artıb
Bakı, 17 iyul, AZƏRTAC
Özbəkistan zəngin tarixi irsi, inkişaf edən turizm infrastrukturu və açıq turizm siyasəti sayəsində Mərkəzi Asiyanın ən cəlbedici turizm istiqamətlərindən birinə çevrilir.
AZƏRTAC Uza informasiya agentliyinə istinadla xəbər verir ki, 2026-cı ilin yanvar-iyun aylarında ölkəni 6,5 milyondan çox xarici turist ziyarət edib. Bu göstərici ötən ilin eyni dövrü ilə müqayisədə 24,9 faiz artım deməkdir.
Məlumata görə, turistlərin əsas hissəsi Qırğızıstan, Qazaxıstan və Tacikistandan gəlib. Rusiya, Əfqanıstan və Çindən gələn ziyarətçilərin sayının artması isə Özbəkistanın beynəlxalq turizm bazarında mövqeyinin gücləndiyini göstərir.
Ekspertlər turist axınının artmasını vizasız rejimin genişləndirilməsi, yeni aviareyslərin açılması, otel infrastrukturunun inkişafı və Səmərqənd, Buxara, Xivə kimi tarixi şəhərlərə marağın artması ilə əlaqələndirirlər.
Özbəkistan hazırda mədəni turizmlə yanaşı, qastronomik, ekoloji, tibbi və biznes turizmi istiqamətlərini də inkişaf etdirir.
Bölmənin digər xəbərləri
