Özbəkistanda ÜDM-in artımı 2025-ci ildə 6 faiz təşkil edəcək
Bakı, 27 fevral, AZƏRTAC
Özbəkistanın iqtisadiyyatı 2025-ci ildə 6 faiz artacaq.
AZƏRTAC “UZ DAİLY”yə istinadla xəbər verir ki, bu statistika Avropa Yenidənqurma və İnkişaf Bankının (AYİB) “Regional iqtisadi perspektivlər” hesabatında öz əksini tapıb.
Bankın məlumatına görə, 2024-cü ildə ölkənin ÜDM səviyyəsi 6,5 faiz artıb. Buna baxmayaraq, sentyabr proqnozunda 6 faizlik artım səviyyəsi gözlənilirdi. 2025-ci ildə iqtisadi artım tempi 6 faiz səviyyəsində qalacaq. 2026-cı ildə də ÜDM artımının bu səviyyədə qalacağı gözlənilir.
AYİB ekspertləri qeyd edirlər ki, 2024-cü ildə Özbəkistanın yüksək iqtisadi artımı ilk növbədə xidmət sahələrinin inkişafı ilə təmin edilib.
Enerji resurslarının qiymətinin liberallaşdırılması səbəbindən inflyasiya səviyyəsi maksimum dərəcəyə çataraq 10,6 faiz təşkil etsə də, dekabrda 9,8 faizə düşüb.
Ümumilikdə, 2024-cü ildə Mərkəzi Asiya ölkələrində iqtisadi artım 2023-cü illə müqayisədə 5,7 faizdən 5,4 faizə enib. Buna Qazaxıstanın dağ-mədən sənayesindəki durğunluq və Monqolustanda ekstremal hava şəraiti təsir edib. 2025-ci ildə bu göstəricinin 5,7 faizə qalxacağı, 2026-cı ildə isə yenidən zəifləyərək 5,2 faizə düşəcəyi gözlənilir.
Bölmənin digər xəbərləri
