ÖZƏLLƏŞDİRMƏ PROQRAMI UĞURLA HƏYATA KEÇİRİLİR

28.08.2004 [17:31]
Çap et
A⁺ A^-

Azərbaycan Respublikasının Dövlət Statistika Komitəsindən AZƏRTAC-a bildirmişlər ki, ölkəmizdə özəlləşdirmə ilə bağlı Dövlət Proqramı uğurla həyata keçirilir. Bu proses başlayandan 2004-cü il iyulun 1-dək respublikamızda ümumi dəyəri 618,8 milyard manat olan 39655 kiçik müəssisə və obyekt, o cümlədən 767 sənaye, 122 kənd təsərrüfatı müəssisəsi, 398 tikinti təşkilatı, 3210 ticarət, 886 iaşə müəssisəsi, 9745 məişət xidməti, 598 yanacaqdoldurma məntəqəsi, 17373 nəqliyyat müəssisəsi və nəqliyyat vasitələri, 117 kommunal təsərrüfatı obyekti və 6284 digər obyekt və avadanlıq özəlləşdirilmişdir. Kiçik müəssisələrin özəlləşdirilməsindən 444,4 milyard manat məbləğində vəsait əldə edilmişdir.

Dövlət əmlakının özəlləşdirilməsinin ikinci mərhələsi 1997-ci il orta və iri müəssisələrin özəlləşdirilməsindən başlamış və 2004-cü il iyulun 1-dək nizamnamə kapitalı 5,4 trilyon manat olan 1533 dövlət müəssisəsi, o cümlədən 352 sənaye müəssisəsi səhmdar cəmiyyətinə çevrilmişdir.

Cari ilin yanvar-iyun aylarında səhmlərinin ümumi dəyəri 153, 8 milyard manat olan 67 səhmdar cəmiyyətinin səhmləri auksiona çıxarılmış və 77,1 milyard manatlıq səhmlər satılmışdır. 28,0 milyard manat dəyəri olan səhmlər qapalı abunə qaydasında çeklə əmək kollektivlərinə və çek hərraclarında, 26,6 milyard manat dəyərində pul auksionlarında və 22,5 milyard manatlıq səhmlər sərmayə müsabiqələrində satılmışdır.

Bu ilin yanvar-iyun aylarında ümumi sahəsi 386,6 min kvadratmetr olan 6,5 min mənzil əhali tərəfindən özəlləşdirilmişdir.