Pandemiyaya baxmayaraq, SOCAR-ın Türkiyədəki aktivləri qarşılıqlı sinerji ilə yüksək səmərəlilik göstərib
İstanbul, 25 dekabr, AZƏRTAC
Dekabrın 25-də “SOCAR Turkey Enerji A.Ş.”nin (STEAŞ) “Neft Emalı və Neft-Kimya Birliyinə ümumi baxış” mövzusunda onlayn mətbuat konfransı keçirilib.
AZƏRTAC xəbər verir ki, “Petkim PetroKimya Holding A.Ş.”nin icraçı direktoru Anar Məmmədov 2020-ci ildə pandemiya səbəbindən dünyada bu sektorun ən qabaqcıl şirkətlərinin belə gerilədiyi, hətta fəaliyyətinin müvəqqəti dayandırıldığı bir vaxtda “Petkim”in işində bununla bağlı heç bir geriləmənin olmadığını deyib.
Bildirib ki, “SOCAR Turkey” Türkiyənin İzmir vilayətinin Əliağa yarımadasında yerləşən aktivlərinin qarşılıqlı sinerjisi ilə Türkiyənin neft emalı və neft-kimya mərkəzinə çevrilib. Bu sinerjinin bazasının gücləndirilməsi məqsədilə “SOCAR Turkey” Əliağada davamlı investisiyalar həyata keçirir. Türkiyənin ilk və yeganə inteqrasiya edilmiş neft-kimya şirkəti olan “Petkim”, eyni zamanda, sənaye üçün əvəzolunmaz xammal tədarükçüsüdür. İllik ümumi istehsal gücü 3,6 milyon ton olan “Petkim” Türkiyənin neft-kimya xammalı tələbatının 18 faizini təmin edir. Türkiyənin yeni nəsil neft emalı zavodu “NEZ” olan “Star” isə ildə 10 milyon ton xam neft emal etmək gücünə malikdir. Türkiyənin neft məhsullarına olan tələbatının təmin olunmasında mühüm rol oynayan “Star” ölkənin neft əsaslı məhsullara olan ehtiyacının 20-25 faizini təmin edir.
SOCAR-ın COVID-19-a həm iş perspektivi, həm də SƏTTƏM tədbirləri baxımından qətiyyətli cavab verdiyini deyən A.Məmmədov qeyd edib ki, güclü texnoloji həll yolları ilə şirkət Qabaqcıl Proses Nəzarətinin (APC) uzaqdan tətbiqi, əməliyyat panellərinə uzaqdan giriş, ortaq məlumat platforması, Robotik Proses Avtomatlaşdırması, işçi qüvvəsinin 50 faizini dəstəkləmək üçün növbələrin yenidən tərtib edilməsi, inzibati binaların istifadəyə bağlanması və sair kimi mühüm tədbirləri həyata keçirib. COVID-19 Təhlükəsiz Hasilat Sertifikatı üçün yoxlama müddəti uğurla başa çatdırılıb, NEZ və Neft-kimya Birliyi kimya sənayesində ilk genişmiqyaslı kompleks olub.
Qeyd edilib ki, bazarda COVID-19-un təsirlərinə və ABŞ dolları/türk lirəsi məzənnə fərqinin kəskin dəyişməsinə baxmayaraq, “Petkim” bu il cari nisbətini artıraraq likvidlik mövqeyini möhkəmləndirib (2019-cu ilin son cari nisbəti 1,9 idi, 2020-ci ilin sentyabr ayı etibarilə 2-yə yüksəlib). Üstəlik “Petkim” bu ilin sentyabr ayına olan büdcə göstəricilərindən daha yüksək EBİTDA səviyyəsinə çatıb (9 ay üçün proqnozlanan EBİTDA 162 milyon ABŞ dolları, faktiki EBİTDA 166 milyon dollar).
“Pandemiya dövründə NEZ və Neft-kimya Birliyi fəaliyyətlərimizi fasiləsiz şəkildə davam etdirərək təkcə Türkiyə iqtisadiyyatını deyil, həm də kritik sağlamlıq və təhlükəsizlik avadanlığı istehsalçılarını dəstəkləyib. 2017-ci ildə fəaliyyətə başlayan “Değer Benim” platformasında bu günə qədər inteqrasiya, dəyər yaratma, dijital, 6 Sigma və çeviklik (Agile) altında 160 milyon dollar reallaşdırma dəyərində 320 layihə təqdim edilib. Bu layihələrdən 31-i 2020-ci ildə təfərrüatlı şəkildə işlənib hazırlanıb”, - deyə A.Məmmədov qeyd edib.
Bildirilib ki, cari ildə müxtəlif təsirlərə görə bazar şərtləri əlverişli olmasa da (COVID-19, ticarət müharibələri və sair), “Star” aşağı gəlirli mühitdə güclü maliyyə mövqeyini qoruyub saxlamağa nail olub. Zavod 2020-ci ildə 228 milyon dollar kredit ödənişi həyata keçirib. “Star”ın emal həcminin yüksəliş (ramp up) mərhələsi tipik neftayırma zavodlarından daha sürətli şəkildə baş verib. Şərqi Aralıq dənizindəki dövlət neft emalı zavodlarının çoxu pandemiya səbəbindən hasilat həcmlərini azaltdığı və ya dayandırdığı halda “Petkim”in bütün nafta ehtiyaclarını qarşılayan “Star”da ortalama hasilat tutumu istifadə nisbəti 98 faizə çatıb. Aviayanacağa olan tələbatın aşağı olmasına baxmayaraq, dizel yanacağı həcminin artırılması hesabına davamlı emal həyata keçirilib.
Qeyd olunub ki, “Değer Benim” platforması “Star”da 2019-cu ilin son rübündə fəaliyyətə başlayıb. Məhsul verimliliyi, enerji səmərəliliyi, hasilat tutumu və sair kimi bir sıra dəyər mexanizmlərini dəstəkləyən 53 layihə cari ildə artıq detallandırılıb. “Star”ın EBİT dəyəri “Değer Benim” layihələrinin sayəsində 55 milyon dollar artırılıb. 2020-ci ildə “Değer Benim” layihələri “Petkim” və “Star” üçün geniş inkişaf imkanı yaradıb.
A.Məmmədov NEZ və Neft-kimya Birliyinin 2021-ci il üçün nəzərdə tutulan planlarına da toxunub. Bildirib ki, bunlar dəyəri artıran layihələr, səmərəlilik və maksimum istehsal gücü vasitəsilə əməliyyat mükəmməlliyinə nail olmaqdır. Əməliyyatlarda və iş axınlarında avtomatlaşdırma, inkişaf etmiş analitik istifadə halları ilə birlikdə 2021-ci il də Neft Emalı və Neft-kimya Birliyi üçün əhəmiyyətli maliyyə və davamlılıq üçün fayda gətirəcək. “Star” Qlobal Lighthouse Şəbəkəsi müraciət nəticəsini gözləyir. İnteqrasiya üzrə hədəf müəyyən olunmuş dəyər qazanma imkanlarını izləməklə inteqrasiyadan gələn əsas sinerjilərə davam etməkdir. Neft Emalı və Neft-kimya Birliyi müəyyən olunmuş hədəflərə çatacaq.
İstehsalat sahəsində “Star”ın istehsal gücünü artırmaqla əhəmiyyətli bir dəyər yaratmağa davam edəcəyini deyən A.Məmmədov qeyd edib ki, ticarət və təchizat zənciri üzrə əsas hədəflər planlaşdırma və optimallaşdırma, xam neft logistikası inkişafı, orta xammal tədarükü və məhsul satışı, məhsul qarışığı və premiumların optimallaşdırılması, maliyyə baxımından isə “Petkim Eurobond”un yenidən maliyyələşdirilməsinə başlamaq, “Star”ın kredit ödənişləri üzrə qrafikin yenidən müəyyənləşdirilməsi əsas məqsədlərdir.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
