Paris meri vergiödəyicilərinin pulunu necə israf edir
Paris, 23 noyabr, AZƏRTAC
Bu günlərdə iki hal Fransanın ictimai-siyasi həyatında paradoksal vəziyyət yaradıb. Bir tərəfdən, prezident Emmanuel Makron oktyabrın 2-də keçirilən iclasda dedi ki, qəbul ediləcək “Separatizm haqqında qanun layihəsi”nin 2-ci maddəsinə əsasən yerli kollektivlərin qərarları inzibati məhkəmələr tərəfindən təxirə salına bilər. Digər tərəfdən, elə həmin gün Parisin meri Ann İdalqo “Fransa erməni fonduna” 50 min avro yardım ayrılmasını nəzərdə tutan, heç bir hüquqi dəyəri olmayan siyasi bəyanat “arzusu”na səs verdirdi.
Ann İdalqo Fransanın Minsk qrupu daxilində vasitəçi bir güc olduğunu və bitərəfliyinin lazım olduğunu xatırladaraq, Paris şəhərinin dövləti əvəz etmək hüququna sahib olmadığını da bildirib. Əslində, onun dedikləri erməni lobbisinə bir ismarıcdır ki, Dağlıq Qarabağla bağlı deyilənlər absurddur. Meriya danışmaqla yalnız boşboğazlıq edə bilər. Ancaq deyilənlərin hüquqi dəyəri yoxdur. Paris - eyni gündə bir-birinə zidd fikirləri deməyə və etməyə imkan verən qoca şəhər son günlər ziddiyyətlər və anlaşılmazlıqlar arasında vurnuxur.
Ann İdalqo yaxşı bilir ki, Dağlıq Qarabağ Azərbaycan ərazisinin bir hissəsidir və bu, beynəlxalq təşkilatların qərar və qətnamələrində, eləcə də BMT Təhlükəsizlik Şurasının qətnamələrində təsdiqlənib. O, başa düşür ki, bu bölgə ilə bağlı hər bir iş də Azərbaycanın daxili işidir. Hüquqi dəyəri olmayan belə bir sənədə “səs verdirməsi” göstərir ki, o, Minsk qrupunun üzvü olan ölkəsini Azərbaycanın daxili işlərinə müdaxilə etmək “günahına batırmağa” cəhd edir.
Fransada yerli hakimiyyət orqanlarının "beynəlxalq hərəkətləri"nin inzibati məhkəmələr tərəfindən ləğv edildiyini bir daha Ann İdalqoya xatırlatmağa dəyər. Bu ölkədə bələdiyyə fondlarını vəkil və məhkəmə prosedurlarından başqa daha yaxşı bir işə xərcləmək olmazdımı? Məsələn, elə “sarı jiletlilər”in tələblərini ödəmək daha yaxşı olardı. Ancaq erməni lobbisinin təzyiqləri altında bir çox bələdiyyələr fransız vergiödəyicilərinin maliyyə fondunu yerli xalqın ehtiyaclarını qarşılamaqdansa, öz maraqları çərçivəsində istifadə edirlər. Paris merinin hərəkətləri ilə bağlı belə bir sual yaranır: görəsən xanım İdalqo da "Liberation" qəzetinin, TF1 kanalının jurnalistləri kimi təhdid edilir?
Seçicilər seçdikləri şəxsin nə etdiyini bilməlidirlər. Çoxlu bələdiyyə vergiləri ödəyən adi parislilər bu vergilərin nəyə xərcləndiyini bilmək istəyirlər. Onlar bilmək istəyirlər ki, siz siyasi səhnədə qalmağa çalışırsınız, ya Prezident Makron sizdən istifadə edərək özü deyə bilmədiklərini sizin dilinizlə dedirdir…
Bölmənin digər xəbərləri
