PENTAQON MƏHBUSLARIN DİNDİRİLMƏSİNİN YENİ QAYDALARINI TƏTBİQ EDİR
Məsələn, hərbçilərə əsirləri soyunmağa və pis əməllərə məcbur etmək, onların başlarına torba keçirmək və gözlərini yapışqanlı lentlə bağlamaq qadağan olunur. Məhbusları döymək, suda boğmaq və itləri üstlərinə qısqırtmaq, su və yemək verməmək, tibbi yardım göstərməmək, elektriklə və odla işgəncə vermək, habelə başqa üsullarla ağrıtmaq yasaqlanır.
Kəşfiyyat Qərargahı rəisinin müavini general-leytenant Con Kimmons demişdir ki, dindirmə zamanı zorakı üsullarla ifadə və məlumat alınmasının şübhəli əhəmiyyəti var və ictimaiyyət bundan xəbər tutarsa, hətta ziyan gətirə bilər. Bağdaddakı Əbu-Qreyb həbsxanası ilə bağlı rüsvayçılıq geniş məlumdur. Amerikalı hərbi qulluqçuların iraqlı məhbuslarla təhqiramiz rəftarını əks etdirən fotoşəkillərin və videoyazıların üzə çıxarılması ciddi əks-səda doğurmuşdur.
Hərbçilərin istifadə etməsinə icazə verilən dindirmə taktikalarına əsirlərin əməkdaşlığa şirnikləndirilməsi, təriflənməsi və qorxudulması üsulları daxildir. Hərbi qulluqçulara ABŞ ordusuna mənsubiyyətini açıqlamamağa da icazə verilir.
Yeni təlimata əsasən, qanunsuz silahlı birləşmələrin döyüş meydanında əldə silahla əsir götürülmüş iştirakçılarına nisbətən adi hərbi əsirlərin daha çox hüquqları olacaqdır. Hər iki kateqoriya Cenevrə Konvensiyasının sərt rəftarı və işgəncələr verilməsini qadağan edən 3-cü maddəsinin təsir dairəsinə düşür. Lakin bu maddə digər dövlətlərin həbsxanalarında dindirmələr aparan Mərkəzi Kəşfiyyat İdarəsinin müstəntiqlərinə şamil edilməyəcəkdir.
Bölmənin digər xəbərləri
