Perunun paytaxtı Limada fövqəladə vəziyyət rejimi elan edilib
Bakı, 22 oktyabr, AZƏRTAC
Peru Prezidenti Xose Xeri paytaxt Limada etiraz aksiyaları zamanı baş verən zorakılıq hallarının qarşısını almaq məqsədilə 30 günlük fövqəladə vəziyyət rejimi elan edib.
AZƏRTAC xəbər verir ki, “Associated Press” agentliyinin məlumatına görə, dövlət başçısı bu barədə televiziya ilə xalqa müraciətində deyib. Məlumata görə, Peru hökuməti fövqəladə vəziyyət rejimi dövründə ordu qüvvələrinin polisə dəstək məqsədilə paytaxta yerləşdirilməsini, eyni zamanda, vətəndaşların toplaşmaq və sərbəst hərəkət etmək hüquqlarının müvəqqəti məhdudlaşdırılmasını nəzərdən keçirir.
Xatırladaq ki, ötən həftə Peruda kütləvi etiraz aksiyaları başlayıb. Aksiyalara gənclərdən ibarət “Z nəsli” fəalları rəhbərlik edir. Prezidentin istefası tələbinin səsləndirildiyi etirazlar iğtişaşlarla müşayiət olunub və nəticədə bir nəfər ölüb, təxminən 100 nəfər isə xəsarət alıb.
Qeyd edək ki, Xose Xeri ölkə parlamentinin oktyabrın 9-da Dina Boluarteni dövlət başçısı vəzifədən kənarlaşdırmasından sonra, oktyabrın 10-da prezident vəzifəsinin icrasına başlayıb.
Bölmənin digər xəbərləri
