“Politico”: Brüsseldə İrana qarşı yeni sanksiyalar paketi müzakirə olunacaq
Bakı, 16 yanvar, AZƏRTAC
Avropa İttifaqına üzv ölkələrin xarici işlər nazirləri yanvarın 29-da Brüsseldə keçiriləcək görüşdə İrana qarşı yeni sanksiyalar paketini müzakirə edəcəklər.
AZƏRTAC xəbər verir ki, “Politico” nəşri bu barədə mənbələrinə istinadla məlumat yayıb.
Məlumata görə, İranda insan haqlarının pozulmasına görə irəli sürülən sanksiya paketinə 21 maddə daxildir. Bundan əlavə, Avropanın Xarici Fəaliyyət Xidməti sanksiya siyahısına dron istehsalı ilə bağlı 10 maddənin də əlavə edilməsini təklif edir.
Nəşr Almaniya, Fransa və Niderlandın Tehrana qarşı məhdudiyyətlərin sərtləşdirilməsini daha çox dəstəkləyən ölkələr olduğunu vurğulayır. Lakin Avropa İttifaqı Roma, Paris və Madridin etirazlarına görə İslam İnqilabı Keşikçiləri Korpusunu terror təşkilatı kimi tanımaq niyyətində deyil.
Avropa Komissiyasının rəhbəri Ursula fon der Lyayen bir müddət öncə Brüsselin İran əleyhinə sanksiyalarının daha da sərtləşdiriləcəyini istisna etmədiyini deyib.
Xatırladaq ki, 2025-ci il dekabrın 29-da İran valyutasının kəskin ucuzlaşması səbəbindən Tehranda tacirlərin etiraz aksiyası başlayıb. Dekabrın 30-da aksiyaya tələbələr də qoşulub. Az sonra etirazlar ölkənin əksər böyük şəhərlərinə yayılıb. Hakimiyyət orqanları iğtişaşlar nəticəsində hüquq-mühafizə orqanlarının azı 40-a yaxın əməkdaşının öldüyünü iddia edib. Tehran iğtişaşlara görə İsraili və ABŞ-ı günahlandırıb. Donald Tramp isə öz növbəsində İrana qarşı güc tətbiqini ciddi şəkildə nəzərdən keçirdiyini bildirib.
Bölmənin digər xəbərləri
