Politoloq : Qoşulmama Hərəkatı dövlətlərarası əməkdaşlığın təşviqi üçün mühüm platformadır
Bakı, 6 mart, AZƏRTAC
Ərazi bütövlüyü, suverenlik, daxili işlərə müdaxilə etməmək və bərabərlik kimi başlıca prinsiplər əsasında yaradılan Qoşulmama Hərəkatı istənilən şəraitdə dövlətlərarası dialoqun davam etdirilməsi və əməkdaşlığın təşviqi üçün mühüm platformadır. Xüsusilə, qarşıdurmaların və hərbi-siyasi bloklaşmanın davam etdiyi bir mərhələdə Qoşulmama Hərəkatı həm də qlobal təhdidlərin müzakirə edildiyi və ortaq yol xəritəsinin müəyyənləşdiyi nadir platformalardan birinə çevrilib.
Bunu AZƏRTAC-a açıqlamasında politoloq, Bakı Dövlət Universitetinin Beynəlxalq münasibətlər və iqtisadiyyat fakültəsinin müəllimi Aytən Qurbanova söyləyib.
Onun sözlərinə görə, məhz bu nöqteyi-nəzərdən yanaşdıqda, hər hansı bir hərbi-siyasi bloklaşmada iştirak etməməyi prioritet olaraq qəbul edən Azərbaycan üçün Qoşulmama Hərəkatında fəal iştirak və üzv dövlətlərlə əlaqələrin davamlı şəkildə genişləndirilməsi böyük önəm daşıyır.
“2011-ci ildən üzv olduğumuz Qoşulmama Hərəkatı çərçivəsində çoxşaxəli fəaliyyət planına əsasən əməkdaşlıq imkanlarımızın daima genişləndirildiyini aydın şəkildə müşahidə edə bilərik. Eyni zamanda, Azərbaycan bu platformanın institusional inkişafı üçün də davamlı şəkildə yeni təşəbbüslərlə çıxış edir. Xüsusilə, Qoşulmama Hərəkatının Dəstək Ofisinin, parlament və gənclər şəbəkəsinin yaradılması məhz Azərbaycanın təşəbbüsü ilə atılmış addımlardır. Digər tərəfdən, Qoşulmama Hərəkatına üzv dövlətlərin İkinci Qarabağ müharibəsində Azərbaycanın haqq mübarizəsinə verdiyi dəstək və ədalətli mövqeyi qarşılıqlı əlaqələrin inkişafı üçün mühüm təsirlərə malikdir”, - deyə A.Qurbanova qeyd edib.
Politoloq vurğulayıb ki, Azərbaycanın Qoşulmama Hərəkatına 2019-2022-ci illəri əhatə etməsi nəzərdə tutulan sədrlik dövrünün yekdil qərar ilə 2023-cü ilin sonuna qədər uzadılması da məhz qarşılıqlı etimadın və faydalı əməkdaşlığın təcəssümü olaraq qiymətləndirilməlidir.
“Şübhəsiz ki, bu qarşılıqlı etimadın nəticəsi olaraq Azərbaycanın sədrliyi dövründə Qoşulmama Hərəkatının təşkilati strukturunun yaradılması üçün atılan addımlar yeni formalaşan dünya nizamı çərçivəsində onun daha önəmli status qazanmasına və təsir imkanlarının genişlənməsinə mütləq töhfə verəcək”, - deyə Aytən Qurbanova bildirib.
Bölmənin digər xəbərləri
