Politoloq : Rusiya Cənubi Qafqazda yaranmış yeni reallığı qəbul etmək istəmir
Bakı, 16 iyul, AZƏRTAC
IV Şuşa Qlobal Media Forumunda müxtəlif mövzulara dair açıqlamalar verən Prezident İlham Əliyev Azərbaycan-Rusiya münasibətlərinə də toxundu. Dövlətimizin başçısı bildirdi ki, biz Rusiya ilə münasibətlərimizə dəyər veririk. Rusiya ilə çətinliklər olduğunu, lakin bunların artıq geridə qaldığını deyən dövlətimizin başçısı müxtəlif səviyyələrdə təmasların da olduğunu qeyd etdi. O, həmçinin münasibətlərimizin əsasında nəqliyyat, ticarət və humanitar əməkdaşlığın da mühüm rol oynadığını bildirdi.
Bu sözləri AZƏRTAC-a açıqlamasında siyasi elmlər üzrə fəlsəfə doktoru, politoloq Şəbnəm Həsənova deyib.
O qeyd edib ki, həm Azərbaycan Prezidentinin bu fikirləri, həm də xarici işlər naziri Ceyhun Bayramovun Rusiyaya səfəri göstərir ki, Azərbaycan münasibətlərin müsbət istiqamətdə inkişafında maraqlıdır. Hər iki amil Azərbaycanın xoş niyyətinin nümayişidir. Təəssüf ki, Rusiya Azərbaycanın bu xoş niyyətini dəyərləndirmir və münasibətləri yenidən gərginləşdirmək yolunu tutur.
“Bu gün Rusiyada şovinizmin, ksenofobiyanın və milli ayrı-seçkiliyin geniş yayıldığı bir vəziyyətin şahidiyik. Məhz belə bir reallıqda bu cür yanaşmanın olması təəccüb doğurmur, təəssüf hisslərini dərinləşdirir. Bu baxımdandır ki, son zamanlar Rusiya mediasında və sosial media platformalarında məhz bu ölkənin inkişafına töhfə verən azərbaycanlılara qarşı təhqiramiz və alçaldıcı fikirlər səsləndirilir. Azərbaycanlılar “mütəşəkkil cinayətkar qruplaşması” adlandırılır. Bu isə Rusiya cəmiyyətində kök salmış faşist təfəkkürünün məhsuludur. Sözdə bir, praktik müstəvidə isə fərqli yanaşmanın olması ikili standartdır. Bir tərəfdən münasibətlər barədə müsbət fikirlər səsləndirilir, digər tərəfdən isə bu kimi addımların atılır. Açıqlamalar pərakəndə deyil, sistemli şəkildə, sanki institutlaşdırılmış formada həyata keçirilir. Bu isə ondan xəbər verir ki, həmin direktivlər bir mərkəzdən idarə olunur, mərkəzləşdirilir və sistemləşdirilir”.
Politoloqun sözlərinə görə, Rusiya cəmiyyəti və dövlət siyasəti institusional, etnik və dini ayrı-seçkilik nümayiş etdirir. Dövlət qanunları, institusional strukturlar, və ictimai tendensiyalar tez-tez azlıqda olan qrupları kənarlaşdırır. Azərbaycanlılar və digər etnik azlıq icmaları ruslarla müqayisədə qeyri-mütənasib dərəcədə yüksək itki nisbətinə məruz qalırlar. İslamofobiya və miqrant işçilərə qarşı nümayiş etdirilən münasibət sistemli ksenofobiyanın əlamətləridir. Dövlət mediası və hüquq-mühafizə orqanları tez-tez onları adi polis təqibləri ilə hədəfə alır və bu icmaları terrorizmlə əlaqələndirir.
“Rusiyanın iqtisadiyyatının əsas təməlləri zəifləyib. Maliyyə ehtiyatları əsasən tükənib, iqtisadi artım dayanıb və ölkənin xaricdən asılılığı getdikcə daha da aydınlaşır. Eyni zamanda, Körfəzdəki müharibə nəticəsində neft qiymətlərinin artması yalnız müvəqqəti maliyyə təsirləri göstərir. Xərclər artdıqca, maliyyə və real məhdudiyyətlər yarandıqca, təbii ki, iqtisadi potensial sıxlaşır və gərginləşir. Problemlər sadəcə maliyyə sahəsi ilə məhdudlaşmır. Rusiyada hərbi xərcləri dəstəkləmək üçün getdikcə daha çox büdcədənkənar maliyyələşdirməyə, sürətli kredit genişləndirilməsinə və bank sistemi vasitəsilə dolayı dəstəyə etibar edilir. Müharibənin başlanğıcından bəri banklar resursları müharibə ilə əlaqəli sektorlara yönəltdikcə, Rusiyanın korporativ borcu da kəskin şəkildə artır. Təbii ki, bu, insan resurslarına, texnologiyaya və istehsal gücünə də təsir edir”, - deyə Ş.Həsənova qeyd edib.
O vurğulayıb ki, Rusiya Cənubi Qafqazda yaranmış yeni reallığı ya görmür, ya da qəbul etmək istəmir. Prezident İlham Əliyevin də dediyi kimi, Cənubi Qafqazı qavramaq və anlamaq üçün köhnə metodologiyalar artıq sıradan çıxıb. Bunları bir kənara qoyaraq yeni, bərabərhüquqlu və qarşılıqlı hörmətə əsaslanan münasibətlər qurmağa çalışılmalıdır. Rusiya, şübhəsiz ki, öz iradəsini diktə etməyə çalışdıqca, digər xalqlara qarşı nifrət, ayrı-seçkilik və dözümsüzlük aşıladıqca yalnız özünə ziyan verir.
Bölmənin digər xəbərləri
