Bakı, 22 sentyabr, AZƏRTAC

Azərbaycanın Qələbəsi ilə bitən İkinci Qarabağ müharibəsi nəticəsində imzalanmış 2020-ci il 10 noyabr tarixli üçtərəfli Bəyanatdan sonra hesab edilirdi ki, Ermənistan regionda sabitliyin yaranması üçün konstruktiv addımlar atacaq, sülh razılaşmasının əldə olunmasına çalışacaq. Amma görünən odur ki, Ermənistan yenə sülh danışıqlarını imitasiya edərək, regiona uzaq olan ölkələrin gəlməsinə, erməni lobbisinin və maraqlı dairələrin təsiri ilə separatizmin yenidən dirçəldilməsinə səy göstərdi. Həmçinin ərazimizdə müvəqqəti yerləşdirilmiş Rusiya sülhməramlılarının olduğu bölgədə qondarma respublikanı yenidən formalaşdıraraq, həmin yerləri “boz zonaya” çevirmək istədi.

Bu sözləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.

“Nikol Paşinyanın sentyabr ayının əvvəlində qondarma respublikanı “müstəqillik günü” münasibətilə təbrik etməsi, ayın 9-da orada keçirilən “prezident” seçkiləri, ümumiyyətlə, son zamanlar Ermənistan silahlı qüvvələrinin mövqelərimizi sistemli şəkildə atəşə tutması, ərazilərimizin minalanmasının davam etdirilməsi, döyüş mövqelərinin mühəndis-istehkam cəhətdən təkmilləşdirilməsi, terror qruplarının və hərbi texnikanın yerdəyişməsi, döyüş vəziyyətinə gətirilməsi, səfərbərlik tədbirləri və kəşfiyyat fəaliyyətlərinin artırılması, mülki təyinatlı yolların terror məqsədilə minalaması müəyyən tədbirlərin görülməsini zərurətə çevirdi. Eyni zamanda, Əhmədbəyli-Füzuli-Şuşa avtomobil yolunda erməni diversiya qrupunun basdırdığı minanın partlaması nəticəsində mülki şəxslərin və polis əməkdaşlarının həlak olması Azərbaycanın Rusiya sülhməramlılarının müvəqqəti yerləşdirildiyi ərazilərdə antiterror tədbirlərini həyata keçirməsini qaçılmaz etdi. Əlbəttə, bu barədə Prezident İlham Əliyev dəfələrlə Ermənistana, separatçılara və separatizmi dəstəkləyən qüvvələrə açıq şəkildə bəyan etmişdi ki, Azərbaycan separatizmin baş qaldırmasına, erməni təxribatlarına və təhdidlərinə dözməyəcək.

Həyata keçirilən antiterror tədbirləri nəticəsində 90-dan artıq döyüş mövqeyi, eləcə də bir neçə strateji əhəmiyyətli mövqelər Silahlı Qüvvələrimiz tərəfindən nəzarətə götürülüb. Azərbaycan 2020-ci ildən sonra öz Ordusunu daha da təkmilləşdirərək, müxtəlif təyinatlı yeni hərbi birliklər yaradıb. Yeni yaradılmış qüvvələr dağlıq, meşəlik və yaşayış məntəqələrində müasir silah və texniki vasitələrdən istifadə etməklə əməliyyat aparmaq imkanına malikdirlər. Elə ona görə də antiterror tədbirləri nəticəsində mülki əhaliyə və infrastruktura zərər vurulmadan xeyli sayda qanunsuz silahlı dəstələr məhv edilmişdi”, - deyə politoloq bildirib.

Onun sözlərinə görə, Ermənistan silahlı qüvvələrinin Qarabağ iqtisadi rayonunda mövcudluğu regional sülh və sabitlik üçün ciddi təhlükə mənbəyi idi. Onların tərk-silah edilməsi beynəlxalq hüququn müddəaları ilə yanaşı, üçtərəfli Bəyanatın şərtlərinin təmin olunması, işğaldan azad edilən ərazilərə qayıdan dinc əhalinin, bərpa-quruculuq işlərinə cəlb edilmiş mülki işçilərin, habelə hərbi qulluqçuların təhlükəsizliyinin qorunması və Azərbaycan Respublikasının konstitusiya quruluşunun bərpa edilməsi məqsədilə həyata keçirilmişdi.

Keçirilən bir günlük tədbirlərin nəticəsində separatçılar ağ bayraq qaldırmaq məcburiyyətində qaldı və Azərbaycan dövlətinin tələblərini qəbul etdilər. Bu da Prezident İlham Əliyevin bildirdiyi kimi, bölgəmizdə yeni imkanlar yaradacaq və sülhün əldə edilməsini tezləşdirəcək. Separatçı rejim həmin ərazilərdə yaşayan sakinlərin Azərbaycana reinteqrasiya olunmasına da imkan vermirdi. Bütün bunlardan sonra reinteqrasiya prosesi üçün də yeni imkanlar yaranır. Növbəti görüşlərin keçirilməsi və dövlətimiz tərəfindən həmin ərazilərdə yaşayan erməni sakinlərə humanitar yardımın göndərilməsi də qərara alınıb.

Y.Hacızadə deyib: “Bu ilin aprel ayında “Laçın” dövlət sərhədindən buraxılış məntəqəsinin qurulması ilə separatçıların Ermənistanla əlaqələri kəsildi və ölkəmizə silah və terrorist keçirilməsinin qarşısı alındı. Təəssüflər olsun ki, Ermənistan və erməni lobbisi bundan “blokada və aclıq” şousu yaratmağa çalışdı. Lakin Azərbaycanın mülki əhaliyə zərər vurmadan antiterror tədbirləri keçirməsi, daha sonra orda yaşayan insanlara humanitar yardım göndərməsi bizə qarşı olan bütün qarayaxmaları fiaskoya uğratdı.

Qısa müddətli lokal xarakterli antiterror tədbirləri bir daha bütün dünyaya göstərdi ki, Azərbaycan regionda siyasi, iqtisadi və hərbi baxımdan böyük gücə sahibdir və ərazi bütövlüyünün qorunması, suverenliyinin təmin olunması, ona qarşı olan təxribatların qarşısının alınması üçün heç bir qüvvəyə güzəşt etməyəcək”.