Politoloq: Azərbaycanla Qazaxıstan dost və qardaş ölkələr olaraq münasibətlərini bu istiqamətdə inkişaf etdirirlər
Bakı, 29 avqust, AZƏRTAC
Azərbaycanla Qazaxıstan dost və qardaş ölkələr olaraq münasibətlərini bu istiqamətdə inkişaf etdirirlər. Həmçinin türk dünyası daxilində də təmsil olunan hər iki ölkə əməkdaşlıqdan maksimum dərəcədə istifadə etməyə çalışır. Belə ki, siyasi, iqtisadi, hərbi, enerji, kənd təsərrüfatı, turizm, diaspor quruculuğu və digər sahələrdə əməkdaşlıq hər gün daha da genişlənir. Eyni zamanda, Qazaxıstanda baş verən hadisələr də Azərbaycan tərəfindən diqqətlə izlənilir. Mərkəzi Asiyada gedən geosiyasi proseslər nəqliyyat, tranzit, logistika əməliyyatlarının daha da inkişaf etdirilməsini şərtləndirir. Şərqlə Qərb arasında əlaqələrin formalaşdırılmasında Mərkəzi Asiyada və Cənubi Qafqazda güclü geosiyasi və geoiqtisadi aktorlar olan Azərbaycan və Qazaxıstan yükdaşımaları sahəsində də geniş perspektivlərə malikdir.
Bu fikirləri AZƏRTAC-a açıqlamasında politoloq İlyas Hüseynov söyləyib.
Politoloq qeyd edib ki, Qazaxıstan Prezidenti Kasım-Jomard Tokayevin ölkəmizə səfəri zamanı dövlətimizin başçısı İlham Əliyevlə görüşündə doğma dildən istifadə etməsi mühüm amil kimi dəyərləndirilməlidir. Tarixən böyük bir coğrafiyada yayılan türk dili vasitəsilə hər iki ölkə liderinin ünsiyyət qurması vacib mesaj olmaqla yanaşı, həm də 30 illik müstəqillik tarixində dövlətlərin mühüm inkişaf yolu keçməsinin göstəricisidir.
Bu gün yeni siyasi reallıqlara uyğun olaraq hər iki dövlət birgə fəaliyyət göstərmək əzmindədir. Türküstan ilə doğma Şuşamızın qardaşlaşması bu xüsusda çox böyük diqqətçəkən amildir. Vətən müharibəsi dövründə Qazaxıstanın obyektiv və balanslaşdırılmış mövqeyi çox təqdir olunur, eyni zamanda, bu davranış siyasi münasibətlərdə də özünü göstərir.
“Tarixi Qələbə münasibətilə Kasım-Jomard Tokayevin Ali Baş Komandan, Prezident İlham Əliyevi təbrik etməsi də xüsusilə qeyd olunmalıdır. Həmçinin dövlətimizin başçısının Türk Dünyasının Ali Ordeni ilə təltif edilməsində də Qazaxıstanın xüsusi xidmətləri olub.
Bundan əlavə, Nursultan Nazarbayev, Kasım-Jomard Tokayevlə keçirilən görüşlərdə ulu öndər Heydər Əliyev və Prezident İlham Əliyev iqtisadi rifahı stimullaşdırmaq istiqamətində birgə addımlar atıblar. Hazırda Azərbaycanla Qazaxıstan arasında ticarət dövriyyəsi 330 milyon dollardır. Qarşıdakı illərdə bu rəqəmin yarım milyard dollara çatdırılması hədəf kimi qoyulub. Lakin gələcəkdə energetika, nəqliyyat sahələrində əlaqələrin genişləndirilməsi bu rəqəmin hətta 1 milyard dollara çatmağına imkan verə bilər. İqtisadi sahədə inkişafın əldə olunması həm də digər istiqamətlərdə əlaqələrin genişlənməsini stimullaşdırar”,- deyə İlyas Hüseynov vurğulayıb.
Politoloq bildirib ki, Qazaxıstan liderinin ölkəmizə səfəri çox önəmli bir dövrə təsadüf edib və məhsuldar keçib. Belə ki, səfər çərçivəsində ölkələrimiz arasında 15 mühüm sənəd imzalandı. Bu sənədlərin sırasında “Azərbaycan Respublikası ilə Qazaxıstan Respublikası arasında 2022-2026-cı illər üzrə əməkdaşlığın inkişaf etdirilməsi haqqında Kompleks Proqram” və “Azərbaycan Respublikası ilə Qazaxıstan Respublikası arasında strateji münasibətlərin möhkəmləndirilməsi və müttəfiqlik qarşılıqlı fəaliyyətinin dərinləşdirilməsi haqqında Bəyannamə” xüsusi vurğulanmalıdır. Belə ki, sənəddə ərazi bütövlüyü, suverenlik, beynəlxalq səviyyədə tanınmış sərhədlərə qarşılıqlı hörmətin əks olunması Azərbaycanın xarici siyasəti üçün mühüm amil kimi dəyərləndirilə bilər.
İ.Hüseynov əlavə edib ki, Qazaxıstanın ölkəmizin ərazi bütövlüyünü dəstəkləməsi bizim üçün çox önəmlidir. Düşünmək olar ki, Qazaxıstanla Azərbaycanın biznes sahəsini təmsil edən şəxslər arasında bundan sonra da təmaslar qurulacaq. Eyni zamanda, Zəngəzur dəhlizi iqtisadi əlaqələrin qurulmasına böyük təkan verəcək. Ona görə də həm Ələt Azad İqtisadi Zonası, həm də Azərbaycanda qurulan müasir avtomobil, dəmir yolları və hava limanları vasitəsilə Qazaxıstan çox rahat şəkildə Qərbə çıxış imkanları əldə edəcək.
Bölmənin digər xəbərləri
