Prezident İlham Əliyev münaqişənin artıq tarixə qovuşduğunu Minsk qrupu həmsədrlərinin diqqətinə çatdırdı
Bakı, 14 dekabr, AZƏRTAC
Müzəffər Ali Baş Komandan İlham Əliyevin rəhbərliyi ilə qəhrəman ordumuz 44 gün ərzində tarixi zəfərə imza atdı və Ermənistan ordusunu diz çökdürdü. Silahlı Qüvvələrimiz təcavüzkar ölkəni məğlub etməklə təkcə işğal altındakı torpaqlarımızı yox, eyni zamanda, regionu, o cümlədən dünyanı beynəlxalq terror və faşizm təhlükəsindən xilas etdi. Axı, Ermənistan dünyada terrorçu, faşizmə meyilli işğalçı ölkə kimi tanınır.
Bunu AZƏRTAC-a Azərbaycan Azad Respublikaçılar Partiyasının sədri, siyasi elmlər üzrə fəlsəfə doktoru Kamil Seyidov söyləyib.
K.Seyidov deyib ki, 30 ildən sonra bölgəmizdə hazırda sülh və əmin-amanlıq mühitinin formalaşması üçün olduqca əlverişli şərait formalaşıb. Bu reallıq, öz növbəsində, regionda demokratik dəyərlərə əsaslanan plüralist cəmiyyətlərin bərqərar olması üçün əlverişli şərait yaratdı. Müstəqilliyinin ilk illərindən demokratik inkişaf yolunu seçmiş ölkəmiz işğalçı Ermənistan üzərində həm hərbi, həm siyasi, həm də informasiya cəbhələrində tarixi Qələbə qazandı. Bu qələbələr öz əhəmiyyəti baxımından region səviyyəsini aşaraq dünyada əks-səda yaradıb. Çünki dünyanın ən nüfuzlu beynəlxalq təşkilatlarının, ABŞ, Rusiya Federasiyası və Fransa kimi dövlətlərdən ibarət ATƏT-in Minsk qrupu həmsədrlərinin 30 ilə yaxın müddətdə həll edə bilmədikləri Ermənistan-Azərbaycan Dağlıq Qarabağ münaqişəsini Prezident, Müzəffər Ali Baş Komandan İlham Əliyevin rəhbərliyi ilə rəşadətli ordumuz 44 gün ərzində icra etdi. Bu vaxta qədər Ermənistanın işğalçı siyasətini əks etdirən qətnamə və qərarlar kağız üzərində qalmışdı. Ölkə Prezidenti status-kvonun, təmas xəttinin üzərindən birdəfəlik xətt çəkdi.
Bu günlərdə ölkəmizdə səfərdə olan ATƏT-in Minsk qrupu həmsədrlərini qəbul edən Prezident İlham Əliyev bu faktları, eləcə də Dağlıq Qarabağ münaqişəsinin artıq tarixə qovuşduğunu həmsədrlərin diqqətinə çatdırdı. Dedi ki, Azərbaycan bu məsələni özü həll etdi. Biz Ermənistanı döyüş meydanında məğlub edərək, işğalçını məğlubiyyətini etiraf etməyə və Ermənistanın kapitulyasiyası hesab olunan Bəyanatı imzalamağa məcbur etdik. Ermənistan iqtidarından başqa ölkənin bütün siyasi qüvvələri də bununla razıdır ki, bu, kapitulyasiyadır və onlar bunu alçaldıcı kapitulyasiya adlandırırlar. Bunun tam məsuliyyəti Paşinyanın diktatura rejiminin üzərinə düşür.
Dövlətimizin başçısı qəbulda 44 günlük müharibənin əhəmiyyətindən, region, eləcə də beynəlxalq aləm üçün əhəmiyyətindən də söhbət açdı. Bildirdi ki, bu müharibə və qazandığımız Qələbə ümumilikdə Ermənistan-Azərbaycan Dağlıq Qarabağ münaqişəsinin həlli ilə bağlı danışıqlar prosesinin, bu prosesdə ATƏT Minsk qrupu həmsədrlərinin fəaliyyətinin qiymətləndirilməsi, Azərbaycanın qələbəsinin səbəbləri və nəticələri, torpaqların işğalına son qoyulması ilə bağlı regionda yeni şəraitin yaranması və mövcud vəziyyətdə qarşıda duran vəzifələrə aydınlıq gətirilməsi baxımından mühüm əhəmiyyətə malikdir. Möhtərəm Prezidentimiz həm beynəlxalq ictimaiyyətə, həm də Ermənistan rəhbərliyinə açıq, aydın və mövcud vəziyyətə adekvat mesajlar verdi.
Müharibə zamanı beynəlxalq mediaya verdiyi çoxsaylı müsahibələrini xatırladan ölkə Prezidenti bizim erməni xalqı ilə problemimizin olmadığını bildirdi. Bizim davamız işğalçılarladır, ərazimizi işğal edən cinayətkarlarladır. Ermənilər isə hazırda ölkəmizin müxtəlif bölgələrində yaşadığı kimi, təhlükəsizlik və ləyaqət şəraitində yaşaya bilərlər. Onların güzəranları da bizim idarəçiliyimiz altında yaxşı olacaq.
ATƏT-in Minsk qrupu həmsədrləri çox yaxşı bilirlər ki, təcavüzkar Ermənistan ordusu 44 günlük müharibə müddətində dinc əhalini ağır artilleriya qurğusundan, hətta qadağan olunmuş silahlardan atəşə tutub. Nəticədə 100 mülki şəxs qətlə yetirilib, 416 nəfər isə yaralanıb. Münaqişənin nizamlanmasında vasitəçilik missiyasını üzərinə götürmüş ATƏT-in Minsk qrupu həmsədrləri də bu faktdan məlumatsız deyillər. Ümumiyyətlə, Minsk qrupu işğal edilmiş ərazilərə rəsmi olaraq iki dəfə missiyalar təşkil etmişdir. Həmsədrlər işğal olunmuş ərazilərə dəfələrlə səfər etmişlər və Ermənistan rejiminin hərbi cinayətlərinin - yaşayış məntəqələrinin tam dağıdılmasının, qeyri-qanuni məskunlaşmanın şahidi olmuşlar. Ancaq 30 il susduğu, terrorçuya “gözün üstə qaşın var” demədiyi kimi, hər dəfə də ağızlarına su aldılar. Nəhayət, Azərbaycan heç kimin köməyi olmadan özü öz problemini hərbi-siyasi yolla həll etdi. Münaqişənin “Hərbi variantı yoxdur” deyənlərə sübut etdi ki, var imiş. Ermənistan və havadarları diz çökməyə məcbur oldu.
Onu da qeyd edək ki, ATƏT-in Minsk qrupu həmsədrləri ölkəmizə dəvət olunmayıblar və öz istəkləri ilə gəliblər. Görünür, onların məqsədləri “zavallı ermənilər”in gələcəyini fikirləşib, onlara bir gün ağlamaqdır. Ancaq bundan sonra ikili standartlar, siyasi riyakarlıq, tərəfkeşlik keçməyəcək. Çünki artıq “Dağlıq Qarabağ münaqişəsi” məfhumu yoxdur. Dövlətimizin başçısı da bunu həmsədrlərin diqqətinə çatdırdı. Əgər Dağlıq Qarabağ münaqişəsi tarixin arxivinə atılıbsa, ATƏT-in Minsk qrupu da bu arxivə atılmalıdır. Olmayan münaqişənin nəyinə vasitəçilik edəcəklər?
Bundan sonra ATƏT Minsk qrupu həmsədrləri hansı istiqamətdə fəaliyyət göstərə bilərlər? Artıq status-kvo, Madrid prinsipləri kimi anlayışlar olmadığı bir dövrdə bu təşkilatın həmsədrləri bundan sonra regionda yeni reallığa uyğun olaraq xalqların sülhə hazırlanması, etimad quruculuğu, etnik barışığın təmin olunması, yol və kommunikasiya xətlərinin açılması kimi məsələlərlə məşğul ola bilər. Əgər bunun da öhdəsindən gələ bilsələr.
Bölmənin digər xəbərləri
