Professor: Hər bir gənc Azərbaycanın gələcəyinə töhfə verə biləcək böyük potensiala malikdir
Bakı, 10 sentyabr, AZƏRTAC
Düşünürəm ki, hər bir gənc Azərbaycanın gələcəyinə töhfə verə biləcək böyük potensiala malikdir. Azərbaycanda dövlət tərəfindən təhsilin inkişafına, gənclərin hərtərəfli inkişafına və onların gələcək imkanlarının genişləndirilməsinə göstərilən diqqət və qayğının mühüm əhəmiyyət daşıyır.
Bu barədə AZƏRTAC-a açıqlamasında iqtisad elmləri doktoru, professor Zahid Məmmədov deyib.
Professor qeyd edib ki, ölkəmizdə yüksək nəticə göstərən şagirdlərin uğurlarının qiymətləndirilməsi və onların ictimaiyyətə təqdim olunması gənclərin təhsilə marağının artırılması baxımından mühüm təşəbbüsdür. Eyni zamanda, hər bir uşağın və gəncin fərdi potensialının üzə çıxarılması, onların təhsil və peşə imkanlarının genişləndirilməsi dövlətin gənclər siyasətinin mühüm istiqamətlərindən biridir.
“600–700 bal toplayan şagirdlərin uğurunu qeyd etmək, onları təbrik etmək olduqca sevindiricidir. Bu, zəhmətin, əzmkarlığın və ailənin, müəllimin əməyinin nəticəsidir. Azərbaycan dövlətinin təhsilə və gənclərə göstərdiyi yüksək diqqət belə uğurların daha da artmasına mühüm şərait yaradır”, – deyə Zahid Məmmədov bildirib.
Onun sözlərinə görə, dövlətimizin həyata keçirdiyi sosial və təhsil siyasətinin əsas məqsədlərindən biri hər bir gəncin öz potensialını reallaşdırması üçün imkanların yaradılmasıdır. Bu baxımdan, ali məktəbə qəbul ola bilməyən gənclərin də gələcək təhsil və peşə seçimləri üçün alternativ imkanlardan yararlanması mühüm əhəmiyyət kəsb edir.
Professor vurğulayıb ki, Azərbaycan dövləti gənclərin təhsilinə, peşə hazırlığına, məşğulluğuna və şəxsi inkişafına geniş imkanlar yaradır. Ali məktəbə qəbul bir gəncin həyat yolunun yalnız bir mərhələsidir. Əsas məsələ onun gələcəkdə öz bacarıq və potensialını düzgün istiqamətdə reallaşdıra bilməsidir.
“Uşaqları yalnız topladıqları balla qiymətləndirmək düzgün olmaz. 700 bal toplayan gəncin uğurunu da sevinc və qürurla qarşılamalıyıq, daha aşağı nəticə göstərərək arzusuna bu il çata bilməyən gəncə də gələcəyə inam aşılamalıyıq. Çünki hər bir uşağın öz yolu, öz istedadı və öz potensialı var”, – deyə professor qeyd edib.
Zahid Məmmədovun sözlərinə görə, Prezident İlham Əliyevin rəhbərliyi ilə Azərbaycanda həyata keçirilən dövlət gənclər və təhsil siyasəti gənc nəslin inkişafına, onların müasir bilik və bacarıqlara yiyələnməsinə geniş imkanlar açır. Bu siyasətin əsas üstünlüklərindən biri də gənclərin sosial vəziyyətindən və əldə etdiyi nəticələrdən asılı olmayaraq onların gələcəyinə diqqət göstərilməsidir.
Professor bildirib ki, yüksək bal toplayan hər bir şagird Azərbaycanın qürurudur. Eyni zamanda, təhsil yolunda ilk cəhddə istədiyi nəticəni əldə edə bilməyən hər bir gənc də dövlətin və cəmiyyətin diqqətinə layiqdir.
“Biz bütün uşaqlarımızın uğuruna sevinməliyik. Çünki onların hər biri Azərbaycanın gələcəyidir. Heç bir uşaq yalnız topladığı bala görə dəyərli deyil. Onların hər birində böyük potensial, istedad və gələcəyə töhfə vermək imkanları var. Əsas məqsəd bu potensialın üzə çıxarılması və hər bir gəncə öz yolunu tapmaq üçün imkan yaradılmasıdır”, – deyə Zahid Məmmədov əlavə edib.
Müxbir - Pərvanə Qafarova
Bölmənin digər xəbərləri
