QAN YADDAŞI
QANLI YANVAR ŞƏHİDLƏRİNİN XATİRƏSİ ANILMIŞDIR
Bakı, 18 yanvar (AZƏRTAC). Azərbaycan Dövlət Neft Akademiyasında (ADNA) Qara Yanvar faciəsinin 20-ci ildönümü ilə bağlı tədbir keçirilmişdir.
Mərasimdə çıxış edən universitetin rektoru, akademik Siyavuş Qarayev 20 Yanvar faciəsinin mahiyyətini açıqlamış və bu hadisələrə ilk dəfə məhz ümummilli lider Heydər Əliyev tərəfindən siyasi-hüquqi qiymət verildiyini diqqətə çatdırmışdır. Bildirmişdir ki, faciədə 168 nəfər həlak olmuş, 400 nəfər itkin düşmüşdür. Yanvar qırğını zamanı bizim universitetdən də 3 tələbə həlak olmuşdur. Biz canlarını Azərbaycanın azadlığı yolunda qurban vermiş Vətən övladlarının xatirəsini əziz tutur, onlara Allahdan rəhmət diləyirik.
Sonra ADNA-nın kimya-texnologiya fakültəsinin dekanı, dosent Elxan Axundov, dosent Yusif Cəbiyev və universitet həmkarlar ittifaqları komitəsinin sədri Məzahir Babayev sovet qoşunlarının xalqımızın azadlığı uğrunda meydanlara çıxan əliyalın insanlara qarşı törətdiyi ağır cinayətdən danışmışlar.
Şəhid tələbə Ağabəy Novruzbəylinin atası Oqtay Novruzbəyli valideynlər adından göstərilən diqqətə görə universitetin kollektivinə minnətdarlığını bildirmişdir.
Tədbirdə şəhid ailələrinə maddi yardımlar edilmiş, ehsan süfrəsi təşkil olunmuşdur.