QARABAĞDA ERMƏNİ QİYAMINDAN 90 İL KEÇİR
Berlin, 22 mart (AZƏRTAC). Bu bahar günləri xalqımız təkcə Novruz bayramını qeyd etmir. Qarabağda erməni qiyamından 90 il keçir. 1920-ci il martın 23-nə keçən gecə azərbaycanlılar öz evlərində Novruz bayramını qeyd edirdilər. Erməni silahlı dəstələri Şuşa, Əsgəran və Xankəndindəki Azərbaycan qarnizonlarına qəfil hücum edərək Azərbaycan Xalq Cümhuriyyətinə (AXC) qarşı qiyam qaldırmışdılar. Bu qiyam Qarabağın erməni komitəsinin AXC-nin mərkəzi hökumətinin bu bölgələr üzərində suverenliyini tanıması barəbə saziş imzalanmasına baxmayaraq baş vermişdi.
Bir gecəyə yüzlərlə dinc azərbaycanlı qətlə yetirilmişdi. Erməni qiyamçılarının əlaqələndirilməmiş fəaliyyət göstərdiklərindən, Azərbaycan hökumət qoşunları Şuşa qalasının müdfiəsini təşkil edə, səhər isə silahlı quldurlara cavab zərbəsi endirə bilmişlər. Yuxarı Qarabağda azərbaycanlılara qarşı törədilən qırğının əvəzində Şuşa azərbaycanlıları erməniləri şəhərdən qovmuşdular. Bu qanlı qırğında ermənilərin əksəriyyətinin əli olduğu şübhəsiz idi. Məsələn, qiyamçılara şəhərin hansı yollarının mühafizə olunmaması barədə gizli xəbər vermiş və Şuşaya hücumun hazırlanmasında iştirak etmiş yepiskop Vahan asılmış, şəhər polisinin rəisi Avetis Ter-Qukasyan edam edilmişdi.
Qiyam qətiyytələ yatırılmış, Qrabağın AXC-nin nəzarətindən çıxarılmasına yol verilməmişdi.
Sonralar ermənilər özlərinin biabırçı məğlubiyyətini "Şuşanın soyqırımı" adlandırsalar da, bir gün əvvəl azərbaycanlıların qırılmasını, təbii ki, yada salmırlar.
Maraqlıdır ki, indi ermənilər hər yerdə ağız dolusu qışqırırlar ki, 1918-1920-ci illərdə guya Qarabağ AXC-nin tərkibinə daxil deyildi, guya bunlar hamısı yalandır, Qarabağ daşnak Ermənistanının tərkibində idi. Ancaq onlar heç cür izah edə bilmirlər ki, Qarabağ AXC-nin deyil, Ermənistanın bir hissəsi idisə, onlarıın əcdadları AXC-yə qarşı niyə qiyam qaldırırdılar. Nə isə anlaşılmazlıq yaranır...
Bu günlər biz 90 il əvvəl AXC-nin nanəcib vətəndaşları (onların nəslindən onlanlar hələ də Azərbaycanın qədim bölgəsi Qarabağı dövlətimizdən ayıracaqlarına ümid edirlər) tərəfindən qətlə yetirilmiş dinc azərbaycanlıların xatirəsi qarşısında baş əyirik. Şübhə etmirik ki, ermənilərin əlləri bu dəfə də boşa çıxacaqdır!
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
