Qax məktəblisi buraxılış imtahanında 300 bal toplayıb VİDEO
Qax, 29 may, Mustafa Dadaşov, AZƏRTAC
Qax rayonunun ümumtəhsil müəssisələrinin 11-ci sinif şagirdləri builki buraxılış və ali məktəblərə qəbul imtahanlarının birinci mərhələsində yüksək nəticə göstəriblər. Şəhid Namiq Allahverdiyev adına Qax şəhər 2 nömrəli məktəb-liseyin şagirdlərinin imtahanlarda əldə etdikləri nəticələr xüsusilə ürəkaçandır. Belə ki, məktəbin 11 A sinif şagirdi Murad Şərifzadə Dövlət İmtahan Mərkəzinin on birinci siniflər üçün keçirdiyi buraxılış imtahanında maksimum nəticə - 300 bal toplayıb. O, ali məktəblərə I-IV ixtisas qrupları üzrə keçirilən qəbul imtahanının birinci mərhələsində də yüksək bilik nümayiş etdirərək, ümumilikdə, 654 bal toplamağa müvəffəq olub.
Yetirmələri ilə qürur duyduğunu vurğulayan sinif rəhbəri Adilə Aşurova AZƏRTAC-ın bölgə müxbirinə bildirib ki, şagirdlərinin yüksək nəticə göstərmələrinin əsas səbəbi müəllimləri tərəfindən verilən tapşırıqları layiqincə yerinə yetirmələri, məktəbin daxili nizam-intizam qaydalarına ciddi əməl etmələri, həmçinin daim öz üzərində çalışmalarıdır. Ümumiyyətlə, bu sinfin şagirdlərindən 4 nəfəri buraxılış və qəbul imtahanlarında 600 baldan yuxarı, 3 nəfər isə 550-600 bal arası nəticə göstərib. Sinfin digər şagirdləri də imtahanlarda yaxşı nəticə göstərərək, tələbə adını qazanmaq şansı əldə ediblər. II-III ixtisas qrupları üzrə keçirilən qəbul imtahanlarının nəticələri elan olunduqdan sonra bu göstərici daha da yaxşılaşacaq.
Buraxılış imtahanında maksimum nəticəyə nail olan Murad Şərifzadə sevinc hissini AZƏRTAC-ın bölgə müxbiri ilə bölüşərək deyib: “Buraxılış imtahanında 300 bal topladığıma görə çox şadam. Əldə etdiyim nəticə mənim gələcək təhsil həyatım üçün çox böyük önəm kəsb edir. Düşünürəm ki, təhsildə uğur qazanmaq, yaxşı nəticə əldə etmək üçün şagird zəhmət çəkməkdən çəkinməməli, davamlı şəkildə öz biliklərini artırmağa çalışmalıdır. Qəbul imtahanlarının birinci mərhələsində 354 bal topladım. Niyyətim budur ki, qəbul imtahanının ikinci mərhələsində 400 bal, ümumilikdə isə 700 toplayaraq, valideyn və müəllimlərimin etimadını doğruldum, doğma məktəbimin və rayonumuzun şərəfini daha da ucaldım”.
Qeyd edək ki, iki dəfə “Ən yaxşı ümumtəhsil məktəbi” respublika müsabiqəsinin qalibi olan 2 nömrəli məktəb-lisey nəinki Qax rayonunun, eləcə də respublikanın ən qabaqcıl təhsil müəssisələrindən biridir. Dövlət İmtahan Mərkəzinin elmi-statistik təhlilinə əsasən, qəbul imtahanlarının nəticələrinə görə bu məktəb-liseyin adı hər il, bir qayda olaraq, ən yaxşı məktəblər siyahısına düşür. Doqquz yüzdən çox şagirdin təhsil aldığı məktəb-liseydə tədris 3 dildə - Azərbaycan, rus və gürcü dillərində aparılır.
Məktəb-liseyin direktoru, respublikanın Əməkdar müəllimi Şəkər Abdullayeva AZƏRTAC-ın bölgə müxbirinə bildirib ki, hər il bu təhsil müəssisəsini bitirən məzunların 70-80 faizi ali məktəblərə qəbul olunur. Ali məktəblərə qəbul imtahanlarında yüksək nəticə göstərdiklərinə görə, son illər məktəb-liseyin məzunlarından 7 nəfəri Prezident təqaüdünə layiq görülüb. Ali məktəblərə qəbul imtahanlarının ilkin nəticələri onu deməyə əsas verir ki, məzunlar bu il də məktəb-liseyin təhsil ənənələrini layiqincə davam etdirəcəklər.
Bölmənin digər xəbərləri
