Qaz sayğaclarında tarif limitinin yenilənmə prosesinin müddəti açıqlanıb
Bakı, 23 dekabr, AZƏRTAC
Ölkə ərazisində istifadə olunan smart-kart tipli qaz sayğaclarının tarif limitinin yenilənməsi avtomatik olaraq 2022-ci il dekabrın 31-dən 2023-cü il yanvarın 1-nə keçən gecə baş tutacaq.
AZƏRTAC xəbər verir ki, bu sözləri “Azəriqaz” İB-nin İctimaiyyətlə əlaqələr şöbəsinin rəisi Eldəniz Vəliyev “Açıq qapı” aksiyası çərçivəsində deyib.
Şöbə rəisinin sözlərinə görə, hazırda Azərbaycanda smart-kart tipli qaz sayğaclarından istifadə edən abonentlərin sayı 1 milyona yaxındır: “Qalan 1,4 milyona yaxın abonentimizin, mexaniki, sonradan ödənişli sayğaclardan istifadə edən abonentlərin limitlərinin yenilənməsi prosesi bir neçə gün vaxt alacaq”.
O əlavə edib ki, Nazirlər Kabinetinin müəyyən etdiyi qaydalara əsasən, mexaniki sayğaclarda limitlərin yenilənməsi yanvar ayının 10-na qədər təmin olunmalıdır: “Amma qarşımıza qoyduğumuz əsas hədəflərdən biri odur ki, limitlərin yenilənməsi prosesi yanvar ayının 6-na qədər icra olunsun”.
Eldəniz Vəliyev qoyulan məqsədin yerinə yetirilməsinə mane ola biləcək amillər olaraq bayram günləri ilə əlaqədar abonentlərin evdə olmaması, səfərlərdə olması və digər subyektiv səbəbləri sadalayıb.
Bundan əlavə, şöbə rəisi vurğulayıb ki, Vətən müharibəsindən sonra, son 2 ildə “Azəriqaz” İB 200-dən artıq şəhid ailəsinin müraciəti ilə qazlaşma prosesi, eyni zamanda, sayğaclarda yaranmış problemlər, qapı xətlərinin yerinin dəyişdirilməsi və bu kimi digər müraciətlərə dərhal reaksiya verib: “Biz bunu özümüzə borc bilirik. Şəhid ailələrinə etdiyimiz xidmətlər digər abonentlərə etdiyimiz xidmətlərin üzərindədir”.
Bölmənin digər xəbərləri
