Qazaxıstanda terrorizmə həssas obyektlərdə yoxlamalar aparılır
Astana, 18 dekabr, AZƏRTAC
Qazaxıstanın Daxili İşlər Nazirliyi terrorizmə həssas obyektlərin antiterror təhlükəsizliyinin planlı yoxlamalarını həyata keçirir.
AZƏRTAC Polisia.kz-ə istinadla xəbər verir ki, bütün yoxlamalar əvvəlcədən xəbərdarlıq edilmədən aparılır ki, bu da obyektlərin faktiki təhlükəsizlik vəziyyətinin obyektiv qiymətləndirilməsinə imkan verir.
İlin əvvəlindən indiyədək hüquq-mühafizə orqanlarının əməkdaşları 6 mindən çox obyektdə yoxlamalar aparıblar. Aşkar edilmiş pozuntulara əsasən, rəhbərlərə və sahiblərə onların aradan qaldırılması üçün 2 min 500 göstəriş verilib.
Bundan əlavə, obyektlərin antiterror təhlükəsizliyini təmin etmək vəzifələrini yerinə yetirmədiklərinə və ya lazımınca yerinə yetirmədiklərinə görə 790 rəhbər məsuliyyətə cəlb edilib, cərimələr tətbiq olunub.
Yoxlamalar zamanı personalın, eləcə də təhlükəsizlik əməkdaşlarının müxtəlif böhran vəziyyətlərində hərəkətlərlə bağlı bilik və bacarıq səviyyəsi yoxlanılır. Aparılan maarifləndirmə işləri terrorizmə qarşı həssas obyektlərdə 90 mindən çox işçini əhatə edib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
