Qəbələ Zirvə Görüşü Türk dünyası üçün yeni strateji mərhələnin əsasını qoyub – ŞƏRH
Bakı, 8 oktyabr, AZƏRTAC
Bu günlərdə Qəbələ şəhərində keçirilən Türk Dövlətləri Təşkilatının (TDT) Dövlət Başçıları Şurasının 12-ci Zirvə görüşü indiki dövrdə dünyada müşahidə olunan geosiyasi və geoiqtisadi proseslər fonunda xüsusi əhəmiyyət daşıyır. Hazırda qlobal miqyasda sürətli transformasiyalar baş verir, dünya dəyişir və yeni nizam formalaşır. Belə şəraitdə Türk dünyası üçün də mühüm çağırışlar ortaya çıxıb. Qəbələdə keçirilən Zirvə Görüşündə bu çağırışlar ətrafında aktual müzakirələr aparılıb və yeni prioritetlər müəyyənləşdirilib. Azərbaycan Prezidenti İlham Əliyevin çıxışında TDT-nin gələcək fəaliyyəti üçün önəmli mesajlar verilib.
Bu sözləri AZƏRTAC-a açıqlamasında Milli Məclisin deputatı Samir Vəliyev söyləyib.
Deputat bildirib ki, hazırda türkdilli ölkələr müxtəlif ikitərəfli və çoxtərəfli platformalarda əlaqələr qurublar. Ancaq Türk Dövlətləri Təşkilatının rolu tamam fərqlidir. TDT artıq, sadəcə, əməkdaşlıq platforması deyil, ciddi geosiyasi mərkəzlərdən biri kimi formalaşır. Qurumun beynəlxalq arenada nüfuzunun artması isə böyük məmnunluq doğurur. Prezident İlham Əliyevin vurğuladığı kimi, daxili siyasi və iqtisadi sabitlik, strateji mövqe, gənc əhali, nəqliyyat-logistika imkanları, təbii resurslar və hərbi potensial TDT-ni qlobal aktora çevirir. Qəbələdə keçirilən Zirvə Görüşü Türk dünyası üçün yeni strateji mərhələnin əsasını qoyub.
O qeyd edib ki, Şuşada TDT-nin qeyri-rəsmi Zirvə Görüşünün, daha sonra Qəbələdə Dövlət Başçıları Şurasının 12-ci Zirvə Görüşünün keçirilməsi türk dövlətlərinin Azərbaycana və onun Liderinə olan etimadını göstərir. Azərbaycan körpülər yaradan və qlobal həmrəylik təşəbbüsləri irəli sürən ölkədir. Zirvə Görüşündə də vurğulandığı kimi, Azərbaycan TDT-nin güclənməsinə və funksionallığının artmasına davamlı töhfələr verir. Dövlətimizin başçısı Türk dünyasını vahid ailə kimi səciyyələndirib. “Türk birliyinin ideyadan reallığa çevrilməsində Prezident İlham Əliyevin müstəsna xidmətləri olub. TDT-nın yaranmasına aparan yol Naxçıvandan başlayıb”, - deyə Samir Vəliyev bildirib.
Deputat Qəbələ Zirvə Görüşünün “Regional sülh və təhlükəsizlik” mövzusunda keçirilməsini xüsusilə önəmli hesab edib. Diqqətə çatdırıb ki, hazırda dünyanın müxtəlif regionlarında davam edən müharibələr bəşəriyyət üçün böyük təhdid yaradır. Belə şəraitdə beynəlxalq birlik və Türk dünyası üçün əsas məsələ sülh, sabitlik və təhlükəsizlikdir. Azərbaycan 44 günlük Vətən müharibəsinin nəticələrinə uyğun olaraq Cənubi Qafqazda regional sülh üçün münbit zəmin yaradıb. Postmüharibə dövründə Prezident İlham Əliyevin iradəsi ilə sülhyaratma prosesi başlanıb. Avqustun 8-də Vaşinqtonda ABŞ Prezidenti Donald Trampın iştirakı ilə mühüm razılaşmalar əldə olunub, sülh sazişi paraflanıb. Minsk qrupu artıq ləğv edilib və münaqişə artıq beynəlxalq gündəlikdən çıxarılıb.
Deputatın sözlərinə görə, Vaşinqtonda əldə olunan Zəngəzur dəhlizi (Tramp marşrutu) razılaşması bütün türk coğrafiyası üçün böyük əhəmiyyət daşıyır. Bu marşrut Orta Dəhlizin bir qolu kimi inkişaf etdirilərək, Mərkəzi Asiyada yerləşən türkdilli ölkələrin yüklərinin Azərbaycan və Türkiyə ərazisindən keçməklə Avropaya tez və rahat çatdırılmasını təmin edəcək.
Samir Vəliyev vurğulayıb ki, Qəbələ Zirvə Görüşü Azərbaycanın artan gücünü və Türk dünyasında həmrəyliyin güclənməsində liderliyini nümayiş etdirib. Görüşə qatılan qardaş ölkələrin liderləri TDT-nin uğurlarında Azərbaycanın roluna xüsusi diqqət çəkiblər. Qəbələ Zirvə Görüşü Türk dünyasının inkişafında yeni strateji mərhələyə atılan addım kimi dəyərləndirilə bilər.
O əlavə edib ki, qəbul olunan qərarlar və Birgə Bəyanat Türk dünyasının qarşıdakı strateji hədəflərini müəyyənləşdirir. Azərbaycan yaratdığı reallıqlar vasitəsilə enerji, yaşıl keçid, nəqliyyat, rəqəmsal infrastruktur və digər sahələrdə əməkdaşlıq imkanlarını genişləndirir. Süni intellekt texnologiyaları sahəsində əməkdaşlıq isə dövrün zəruri çağırışıdır. Artıq türk dövlətləri hərbi-texniki sahədə birgə fəaliyyətlərə start verməlidir.
S.Vəliyev, həmçinin bildirib ki, TDT-yə sədrlik dost Qırğızıstandan Azərbaycana keçib və ölkəmiz bu dəfə də təşkilata uğurla sədrlik edəcək.
Bölmənin digər xəbərləri
