Qəbələdə “31 Mart soyqırımı - tarixin qan yaddaşı” mövzusunda tədbir keçirilmişdir
Qəbələ, 30 mart (AZƏRTAC). Qəbələ Rayon Təhsil Şöbəsinin təşkilatçılığı ilə “31 Mart soyqırımı - tarixin qan yaddaşı” mövzusunda tədbir keçirilmişdir.
AZƏRTAC xəbər verir ki, tədbirdə natiqlər ermənilərin törətdiyi kütləvi qətl və qırğınlardan ürəkağrısı ilə danışmışlar. Qeyd olunmuşdur ki, tədbirin əsas məqsədi övladlarımızı vətənpərvərlik ruhunda tərbiyə etmək, erməni soyqırımının dəhşətlərini, erməni vandalizminin çirkin xislətini bir daha göstərmək, soydaşlarımızı həqiqətin təntənəsinə inandırmaqdır.
Tədbirdə “31 Mart soyqırımı alın yazısı deyil, erməni vəhşiliyinin nəticəsidir” mövzusunda məruzə edən Mıxlıqovaq kənd tam orta məktəbinin müəllimi Mətanət Abdullayeva Bakı, Şamaxı və Qubada baş vermiş soyqırımı hadisələrindən söhbət açmışdır. Şəhər 1 nömrəli məktəbin müəllimi Pərvanə Tahirovanın və 4 nömrəli məktəbin müəllimi Azadə Məmmədyarovanın çıxışında erməni vəhşilikləri faktların dili ilə tədbir iştirakçılarının nəzərinə çarpdırılmışdır.
Sonda məktəblilərin hazırladıqları ədəbi-bədii kompozisiya nümayiş olunmuşdur.
Bölmənin digər xəbərləri
