Qərb Gürcüstanın daxili işlərinə kobudcasına müdaxilə edir, iğtişaşlar üçün zəmin hazırlayır - ŞƏRH
Bakı, 14 oktyabr, Elmir Səftərov, AZƏRTAC
Gürcüstanda yeni sistemlə keçiriləcək parlament seçkiləri yaxınlaşdıqca ölkəyə xaricdən müdaxilələr genişlənir, iğtişaşlar üçün zəmin hazırlanır. Lakin müstəqilliyi, sabitliyi və demokratiyanı rəhbər tutan gürcü xalqı aparılan mənfi kampaniyaların, qurulan planların baş tutmamasına çalışır. Çünki xalq anlayır ki, xaos, qardaş qırğını, ölkədə qeyri-sabitlik mənfur niyyətləri olan xarici qüvvələrin marağındadır. Bu səbəbdən də müəyyən sanksiyalara və təzyiqlərə, Qərbin ölkənin daxili işlərinə qarışmaq cəhdlərinə baxmayaraq, Gürcüstan xalqının oktyabrın 26-da keçiriləcək parlament seçkilərində düzgün seçim edəcəyinə inanırıq.
Dünyanın müxtəlif yerlərində baş verən müharibələr siyasi və iqtisadi kataklizmlər yaradır, qütbləşməni gücləndirir, dövlətlər qarşısında yeni öhdəliklər qoyur. Strateji cəhətdən əhəmiyyətli Cənubi Qafqaz da bu proseslərdən kənarda qalmadı. Qlobal güclər kollektiv Qərbin maraqları kontekstində bölgədə Azərbaycan vasitəsilə öz istəklərinə nail ola bilmədikləri üçün Ermənistana və Gürcüstana böyük “ümidlər” bəsləyirdilər. Lakin onlar İrəvandan məqsədləri üçün istifadə imkanı qazansa da, Tbilisi özünün balanslaşdırılmış siyasətini davam etdirməkdə qətiyyətlidir. Təbii ki, bu da ağır proses olduğu üçün müəyyən çətinliklərlə müşayiət olunmaqdadır. Belə ki, artıq Qərb Gürcüstanın daxili işlərinə kobudcasına və həyasızcasına müdaxilə etməyə, sağlam, milli düşüncəli qüvvələrin hakimiyyətdə olmasının qarşısını almağa çalışır. Bu xüsusda, Gürcüstana yardımlar dondurulub, ABŞ tərəfindən hərbi təlimlər dayandırılıb, bu ölkənin rəsmilərinə qarşı bəzi viza sanksiyaları tətbiq edilib. Bundan sonra da müəyyən addımların atılacağı gözlənilir.
Digər tərəfdən uzun illərdir Gürcüstanda cərəyan edən mürəkkəb proseslər daxili məsələ kimi görünsə də, əslində, bu, bir növ Qərb və Rusiya arasında seçim kimi də xarakterizə oluna bilər. Lakin Cənubi Qafqazda Azərbaycanın həyata keçirdiyi neytral, balanslı siyasət strategiyası Gürcüstan üçün də nümunədir. Yəni, Gürcüstan Avropaya inteqrasiya edərək də Rusiya ilə normal qonşuluq münasibətlərini saxlaya bilər. Amma Qərb bunun əksini düşünür. Onlar hesab edirlər ki, inteqrasiyada maraqlı olan dövlət Avropa Şurasının son qiymətləndirmələrinə, monitorinq hesabatlarına, həmçinin Avropa liderlərinin tövsiyələrinə əməl etməlidir. Bu da dolayı yolla Gürcüstanı Rusiyaya qarşı yeni cəbhə kimi istifadə etmək niyyətini aydın şəkildə göstərir. Eyni zamanda, Gürcüstanın böyük ölçüdə azadlığını, milli maraqlarını məhdudlaşdırır və onu qonşusu Rusiya ilə üz-üzə qoyur. Buna oxşar ssenari 2004-cü ildə Gürcüstanda artıq tətbiq edilib. Belə ki, vaxtilə ovaxtkı hakimiyyətə şirin vədlər verildi və ölkə Rusiya ilə qarşıdurmaya təhrik edildi. Nəticəsi isə göz qabağındadır. O vaxt vədlərinə və verdiyi sözlərə əməl etməyən, Gürcüstan hökumətini avantüraya sürükləyən Qərb isə onun arxasında dayanmadı, itirən tərəf isə yenə də xalq və ölkə ictimaiyyəti oldu.
Ukraynada istəyinə çataraq uzunmüddətli müharibə planını həyata keçirən Qərb hələ ki, Gürcüstan vasitəsilə buna müvəffəq olmayıb. Lakin onlar məqsədlərinə çatmaq üçün, sözün əsl mənasında, dəridən-qabıqdan çıxırlar. Bugünkü proseslər fonunda demək olar ki, Gürcüstan hökuməti öz mövqeyində haqlıdır. Çünki bu gün Qərbin Gürcüstanda tətbiq etdiyi ssenari ölkəni Ukraynaya çevirmək niyyəti ilə oxşarlıq təşkil edir. Aksiyalar, iğtişaşlar ABŞ başda olmaqla, Qərbin gürcü xalqına, gürcü dövlətinə qarşı təxribatı kimi görünür. Ona görə də əvvəlki acı təcrübədən nəticə çıxaran Gürcüstan hökuməti və xalqı indi təhlükəni görür və xülyalara inanmır. Əslində, bu gün baş verənlər də tarixi yanlışlıqlarla bilavasitə əlaqəlidir. Çünki ötən illər ərzində Qərb Gürcüstana nüfuz edərək QHT-lər, media nümayəndələri və müxtəlif siyasi şəxslər vasitəsilə özlərinə dayaq yaradıb. Bu məqsədlə ölkədə fəaliyyət göstərən 25 minə yaxın QHT-nin böyük hissəsi xaricdən maliyyələşdirilir və onlardan öz maraqlarına uyğun şəkildə istifadə edilir. Bunun nəticəsidir ki, Gürcüstan cəmiyyətində çox ciddi dəyişikliklər baş verdi, ölkədə narkomaniya daha çox yayıldı, milli-mənəvi dəyərlərə zərbə vuruldu, cinsi azlıqların hərəkatı isə geniş vüsət almağa başladı. Lakin hökumətin iradəsi sayəsində “Ailə dəyərləri və azyaşlıları qorumaqla” bağlı, eləcə də LGBT-nin təbliğini qadağan edən, eyni zamanda, xarici təsirin aradan qaldırılması ilə bağlı qanunlar qəbul edildi.
Ölkəmizlə eyni regionda yerləşən və bir sıra mühüm layihələrdə tərəfdaşımız olan Gürcüstanda baş verən hadisələr təbii ki, Azərbaycanda da diqqətlə izlənilir. Bundan əlavə, rəsmi Tbilisinin xarici siyasətinin hansı istiqamətdə həyata keçiriləcəyi Gürcüstanla strateji əməkdaşlığa malik Azərbaycan, həmçinin region üçün də önəmlidir. Ümumilikdə isə Azərbaycan, Gürcüstan və Türkiyənin təhlükəsizliklə bağlı, eyni zamanda, enerji və hərbi sahələri əhatə edən bir sıra formatlarda layihələri mövcuddur. Ona görə də Gürcüstandakı seçkilərin ədalətli, şəffaf və demokratik şəraitdə keçməsi bütün region, o cümlədən Azərbaycan üçün vacib əhəmiyyət daşıyır.
Bölmənin digər xəbərləri
