Qətər və Avropa İttifaqı arasında strateji tərəfdaşlıq sazişi üzrə danışıqlar başlayıb
Qahirə, 6 dekabr, AZƏRTAC
Qətər və Avropa İttifaqı arasında strateji tərəfdaşlıq sazişi üzrə danışıqlar başlayıb.
AZƏRTAC xəbər verir ki, bu barədə Qətər Baş naziri və xarici işlər naziri Şeyx Məhəmməd bin Əbdurrahman Al Tani ilə Avropa İttifaqının xarici işlər və təhlükəsizlik siyasəti üzrə ali nümayəndəsi və Avropa Komissiyasının vitse-prezidenti Kaja Kallas arasında Doha Forumu çərçivəsində keçirilən görüşdən sonra elan edilib.
Bu addım gələcəkdə əməkdaşlığın genişlənməsi üçün mühüm yolun göstəricisidir və ikitərəfli əlaqələrin vacib mərhələsini təşkil edir. Eyni zamanda, Qətər və Avropa İttifaqı arasındakı güclü tərəfdaşlığı əks etdirir və hər iki tərəfə qarşılıqlı olaraq əməkdaşlığı genişləndirmək və dərinləşdirmək üçün imkanlar verir.
Qətərin mühüm rolunu, xüsusən bir neçə böhranda sülh və münaqişələrin həlli üçün vasitəçilik səylərini nəzərə alaraq, habelə Avropa İttifaqının qayda-qanunlara əsaslanan beynəlxalq sistemi qorumaq istiqamətindəki öhdəliyinin davamı olaraq, hər iki tərəf regional sülh, firavanlıq və təhlükəsizlik mövzusunda birgə işi davam etdirmək qərarına gəliblər.
Qeyd olunub ki, gələcək danışıqlar prosesində hər iki tərəf qarşılıqlı maraq və prioritet sahələrdə əməkdaşlığı gücləndirmək üçün yeni yollar axtaracaq.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
