Qətərdən Misirə qarşı xoşməramlı addım: sərmayə axını başlayır
Qahirə, 8 yanvar, AZƏRTAC
Körfəz Əməkdaşlıq Şurasının 3 gün əvvəl keçirilmiş sammitindən sonra 4 ərəb dövləti, o cümlədən rəsmi Qahirə ilə embarqonun ləğvinə dair Bəyannamə imzalayan Doha Misirə qarşı xoşməramlı addım atıb.
AZƏRTAC xəbər verir ki, Qətərin “Diər” dövlət şirkəti Misir paytaxtında “St.Regis” otelinin açılışını edib. Mərasimdə Qətər, Misir və ABŞ-ın maliyyə nazirləri Əli Şərif Əl-Əmadi, Məhəmməd Maait və Stiven Mnuçin iştirak ediblər.
Qətərli nazir çıxışında bildirib ki, onun ölkəsi Misirdə turizm sektorunun inkişafına, yeni iş yerlərinin açılmasına öz dəstəyini göstərəcək. O əlavə edib ki, rəsmi Doha bu məqsədlə 5 milyard dollarlıq sərmayə layihəsi hazırlayıb. Həmçinin Misirdə mindən çox insanın daimi işlə təmin edilməsi nəzərdə tutulur ki, onların da 95 faizi misirlilərdən ibarət olacaq.
Bu, 2017-ci ildə Qətərə qarşı embarqonun tətbiqindən sonra iki ölkə arasında ilk rəsmi səfərdir. Artıq Səudiyyə Ərəbistanı və Birləşmiş Ərəb Əmirliklərinin rəsmiləri də Doha ilə iqtisadi əlaqələrin bərpa olunduğunu bəyan ediblər.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
