Qətərin energetika naziri: Süni zəka səbəbindən təbii qaza tələb artır
Qahirə, 7 dekabr, AZƏRTAC
Dünya üzrə mayeləşdirilmiş təbii qaza olan tələb önümüzdəki illər ərzində 600-700 milyon ton artacaq. Müqayisə üçün deyək ki, dünyada ötən il 400 milyon ton həcmində maye qaz istehsal olunub. Bu artan tələbin əsas səbəbi isə daha çox enerji sərf edən süni intellekt texnologiyalarının genişlənməsidir.
AZƏRTAC xəbər verir ki, bunu Qətərin energetika naziri Səad Şəridə əl-Kəabi Doha Forumunda çıxışında bildirib.
Nazir, həmçinin qeyd edib ki, süni intellektin enerji istehlakının artmasının və sərmayə çatışmazlığının 2035-ci ildən sonra mayeləşdirilmiş qaz və təbii qaz təchizatında qıtlığa səbəb olacağı ciddi narahatlıq doğurur. “Sərmayə çatışmazlığı var və əgər bu, növbəti beş-altı il ərzində həll olunmazsa, 2035-ci ildə ciddi problemlərlə üzləşəcəyik. Danışıqlar apardığımız dövlətlər qaza olan tələbatlarının təxminən 10-20 faizə qədərinin süni intellektlə bağlı olduğunu bildirir”, - deyə əl-Kəabi diqqətə çatdırıb.
“Süni zəka evdə tələb olunan enerjidən daha artıq enerji tələb edir. O, daha çox enerjiyə ehtiyacı olan bir zavoda bənzəyir. Lakin ailələrdən və zavodlardan fərqli olaraq, davamlı olaraq artan enerji istehlakına məhkumdur”, - deyə nazir əlavə edib.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
