Yevlax, 17 aprel, Şahnəzər Bəşirov, AZƏRTAC

Xəbər verdiyimiz kimi, aprelin 17-də Azərbaycan Respublikasının Prezidenti İlham Əliyevin sədrliyi ilə Yevlax şəhərində Aran Regional İnkişaf Mərkəzində qeyri-neft ixracatçılarının respublika müşavirəsi keçirilib.

AZƏRTAC xəbər verir ki, dövlət başçısının tapşırığına uyğun olaraq, müşavirə çərçivəsində keçirilən müzakirələrdə Prezidentin iqtisadi islahatlar üzrə köməkçisi Natiq Əmirov, iqtisadiyyat naziri Şahin Mustafayev, vergilər naziri Fazil Məmmədov, kənd təsərrüfatı naziri Heydər Əsədov, Standartlaşdırma, Metrologiya və Patent üzrə Dövlət Komitəsinin sədri Ramiz Həsənov və Dövlət Gömrük Komitəsi sədrinin birinci müavini Səfər Mehdiyev ixracatçı sahibkarlarla görüşüblər.

Görüşdə toxumçuluğun inkişafı üçün torpaqların təyinatının dəyişdirilməsi, tingçilik təsərrüfatının yaradılmasına dəstək göstərilməsi, tara istehsalının təşkili, uyğunluq və gigiyenik sertifikatların daha uzun müddətə verilməsi, gömrük sahəsində regionlarda xidmətlər bazasının genişləndirilməsi, yerli istehsal məhsullarına kod verilməsi, xaricdə logistik mərkəzlərin yaradılması, bəzi nəqliyyat tariflərinə baxılması, şirkətlərarası əlaqələrin genişləndirilməsi, qablaşdırma üçün şüşə istehsalı, yeni gömrük və fitosanitar laboratoriyanın yaradılması və digər məsələlər barədə sahibkarların fikirləri və təklifləri dinlənilib, müzakirələr aparılıb, suallar cavablandırılıb.

Müzakirələrdə bəzi sahibkarlar qablaşdırma sahəsindəki problemlərə toxunub, şüşə məmulatlarının idxaldan asılılığına diqqət çəkiblər. Azərbaycan Sahibkarlar Konfederasiyasının (ASK) prezidenti Məmməd Musayev bildirib ki, şüşə istehsalçılarından biri olan “İnterGlass” artıq ikinci istehsal xəttinin qurulmasına başlayıb. “Müvafiq avadanlıqlar alınıb. Həmin avadanlıqların quraşdırılması ilə bağlı üç ölkənin mütəxəssisləri ilə danışıqlar aparılır. Yaxın vaxtda ikinci xətt işə salınacaq. Bununla biz yaşıl şüşənin istehsalına start verəcəyik. Ekologiya və Təbii Sərvətlər Nazirliyindən aldığımız məlumata görə, ölkə ərazisindəki yataqlar araşdırılıb və məlum olub ki, Azərbaycanda yaşıl şüşə istehsalı üçün lazım olan qum var. Ağ şüşə istehsalı üçün lazım olan qum isə böyük ehtimalla Rusiyadan idxal olunacaq. Bundan başqa, biz şüşə istehsalı ilə bağlı ayrıca proqram hazırlamışıq. Bir məsələyə diqqət çəkmək istəyirəm ki, bu gün “İnterGlass”ın həyətində olan hazır şüşə materialları üç aydır satılmır. İstərdim ki, bu məsələ sahibkarlarla müzakirə olunsun”, - deyə ASK prezidenti qeyd edib.

Şirkətlər arasında əlaqənin qurulmasında problemlər olduğunu bildirən Prezidentin iqtisadi islahatlar üzrə köməkçisi Natiq Əmirov deyib: “Şirkətlərin internet saytları qeyri-işlək vəziyyətdədir. Məndə bəzən elə təsəvvür yaranır ki, sahibkarlar həyata keçirdiyi layihələr, istehsal etdiyi məhsullar barədə ancaq özləri xəbərdardır. Şirkətlərin saytlarını tez-tez izləyirəm. Elə şirkət var ki, saytını sonuncu dəfə üç il bundan əvvəl yeniləyib. Bəzən görürük ki, bir şirkət məhsul idxal edir, amma həmin məhsulu başqa bir yerli şirkət ölkəmizdə istehsal edir. Yəni, bir-birindən xəbərləri yoxdur. Əlaqələndirmə düzgün qurulmalıdır. Müştərilər şirkətlərin saytına daxil olarkən istehsal edilən məhsullar barədə ətraflı məlumat almaq imkanına malik olmalıdırlar. Şirkətlər saytlarını fəal şəkildə idarə etməlidir”.

Prezidentin köməkçisinin iradı ilə razılaşan Məmməd Musayev bildirib ki, məsələ çox düzgün qaldırılıb. Əlaqələndirmədə ciddi boşluqlar var və bu problemi aradan qaldırmağa çalışacaqlar.

“Azərtoxum”un hazırda 10 min hektar sahədə toxumluq arpa və buğda səpini, 2 min hektar sahədə isə qarğıdalı əkini həyata keçirdiyini vurğulayan səhmdar cəmiyyətin icraçı direktoru Məzahir Qasımov deyib: “Bizim 30 min hektar ərazidə əkin-biçin aparmaq imkanımız var. Bundan başqa, 60 min ton məhsulu saxlaya biləcək anbarımız var. İki il əvvəl Şəmkir rayonunda Ceyrançöl deyilən ərazidə səhmdar cəmiyyət üçün 5 min hektar ərazi ayrılıb. Lakin, həmin torpaqlar qışlaq təyinatlı olduğuna görə, biz ondan səmərəli istifadə edə bilmirik. Həmin torpaqların qış otlaq sahəsi olmasına baxmayaraq, orada bir baş belə mal-qara yoxdur. Xahiş edirəm ki, bu məsələ aidiyyəti qurumlar tərəfindən nəzərə alınsın və problem həllini tapsın".

Sahibkara cavab olaraq kənd təsərrüfatı naziri Heydər Əsədov bildirib ki, kənd təsərrüfatı torpaqlarının təyinatının dəyişdirilməsi ilə bağlı Prezident İlham Əliyev tərəfindən çox ciddi tapşırıq verilib. Torpaqların təyinatının dəyişdirilməsi zamanı balans gözlənilməlidir. “Biz bu il 121 min hektar sahənin təyinatının dəyişdirilməsi ilə bağlı vəsatət qaldırmışıq. Sizin müəssisənin maddi-texniki bazasına bələdəm. Hətta toxumçuluğun inkişafı üçün kənd təsərrüfatı strukturuna daxil olan torpaq sahələrindən bir neçə min hektarı müvəqqəti olaraq sizin istifadənizə verilib. Hazırda əsas məsələ örüş və otlaqların əkin dövriyyəsinə cəlb edilməsi deyil. Biz balansı gözləməliyik. Çünki hazırda mövcud olan örüş və otlaq sahələri heyvandarlığın tələbatının 75 faizini təmin edir. Örüş və otlaqların kütləvi sürətdə əkin dövriyyəsinə cəlb edilməsi bu problemi qloballaşdıra bilər. Ona görə də mütləq həmin əraziyə baxış keçirilməlidir. Amma düşünürəm ki, bu məsələ həll oluna bilər", - deyə nazir vurğulayıb.

Şərab İstehsalçıları və İxracatçıları Assosiasiyasının sədri Elçin Mədətov deyib ki, sahibkarların üzləşdiyi əsas problemlərdən biri dəmir yolları vasitəsilə daşınma ilə əlaqədardır. “Xammalın ixracı zamanı şirkətlər daşımalarla bağlı problemlərlə üzləşir. Assosiasiyanın üzvü olan şirkətlər tərəfindən istehsal olunan məhsulların daşınması üçün “Azərbaycan Dəmir Yolları” QSC-nin parkında olan sisternlər kifayət etmir. Bizim xammal idxala bağlıdır. Ona görə də daşımalarla bağlı məsələlərin tənzimlənməsinə ehtiyac var”, - deyə E.Mədətov qeyd edib.

Sahibkara cavab olaraq Prezidentin iqtisadi islahatlar üzrə köməkçisi Natiq Əmirov bildirib ki, ölkədaxili daşımalarda tarif tənzimlənməsi doğrudan da vacibdir. Dövlətimizin başçısı dəmir yolu parkının yenilənməsinə dair müvafiq göstəriş verib. Bütövlükdə nəqliyyat sektorunda daşımaların ən yüksək səviyyəyə qaldırılması üçün zəruri tədbirlər görülür. “Azərbaycan Dəmir Yolları” QSC parkın yenilənməsi istiqamətində müvafiq iş aparır, müxtəlif təyinatlı vaqonlar alır.

Müzakirələrdə çıxış edən iqtisadiyyat naziri Şahin Mustafayev sahibkarlara müraciət edərək deyib ki, sahibkarlar arasında kommunikasiya daha sıx qurulmalıdır: "Yəqin ki, biz bu formatda əməkdaşlıq qurmağa başlayacağıq. Düşünürəm ki, növbəti forumlarda sahibkarlar tərəfindən qaldırılan mövzular ətrafında əvvəlcədən müzakirələr aparıla bilər. Sahibkarlar özləri təqdimat imkanı qazanmaqla təşkilati tədbirlər görə bilər. Məsələn, hansısa 5 şirkət istehsal etdiyi məhsullar barədə təqdimat etmək istəyir. Bunun üçün biz sahibkarlarla görüşür, əvvəlcədən hansı mövzuda təqdimatlar olacağı ilə bağlı onları məlumatlandırırıq. Bu barədə aidiyyəti qurumlara da müvafiq tapşırıq verəcəyəm. İnanıram ki, bu formatda əməkdaşlıq müsbət nəticələrini verəcək".

Dialoq şəkilində davam edən müzakirələrdə müvafiq qurumların rəhbərləri qaldırılan məsələlər barədə fikirlərini bildirib, təmsil etdikləri struktur bölmələrinə tapşırıqlar veriblər.

Sahibkarlar özəl sektorun inkişafına göstərilən dəstək tədbirlərinə, eləcə də qeyri-neft sektorunun inkişafı və ixracın stimullaşdırılması istiqamətində həyata keçirilən islahatlara görə Prezident İlham Əliyevə təşəkkür ediblər.