Qeyri-qanuni balıq ovuna dair beynəlxalq saziş iyun ayında qüvvəyə minəcək
Bakı, 17 may, AZƏRTAC
İyunun 5-də qeyri-qanuni balıq ovuna dair ilk beynəlxalq saziş qüvvəyə minəcək.
AZƏRTAC BMT-nin Xəbərlər Mərkəzinə istinadla xəbər verir ki, bu barədə BMT-nin Ərzaq və Kənd Təsərrüfatı Təşkilatında (FAO) xatırladılıb. FAO-nun baş direktoru Joze Qratsiano da Silva deyib: “Bu sənəd qeyri-qanuni ovçuluğa qarşı mübarizədə yeni dövrün başlanğıcıdır. Saziş vicdansız balıqçıları bazarlara çıxışdan məhrum edərək balıq sənayesinin möhkəmlənməsinə kömək edəcək, balıq məhsulları tədarükünün bütün mərhələləri üçün müstəsna hüququ təmin edəcək”.
Sazişə əsasən nəzarət prosesini sadələşdirmək məqsədilə ölkələr xarici gəmilər üçün müəyyən limanlar ayırmalıdır. Bu gəmilərin komandaları limana yan almaq üçün əvvəlcədən icazə almalı, yerli hökumət orqanlarına balıq ovuna dair sənəd təqdim etməli, habelə bort jurnalının, lisenziyaların, balıqovlama ləvazimatının və yükün yoxlanmasına mane olmamalıdır.
Saziş Avropa İttifaqı, ABŞ və Norveç daxil olmaqla 29 ölkə tərəfindən imzalanıb. Dünyada balıq idxalının 62 faizi, ixracının isə 49 faizi sənədi imzalayan ölkələrin payına düşür.
Bölmənin digər xəbərləri
