Bakı, 18 yanvar (AZƏRTAC). Yanvarın 17-də Bişkekdəki “Azəri” İctimai Birliyinin və Türkdilli Dövlətlərin Siyasətinə Dəstək Fondunun birgə təşkilatçılığı ilə Qırğızıstanın Kant şəhərində 20 Yanvar faciəsinin 20-ci ildönümünə həsr olunmuş mərasim keçirilmişdir.

Tədbirdə Kant rayonunun rəhbərləri, Azərbaycan diasporunun nümayəndələri iştirak etmişlər.

“Azəri” İctimai Birliyinin sədri, əməkdar həkim Akif Alaferdov 20 Yanvar faciəsinin başvermə səbəbləri, keçmiş sovet ordusunun Bakıda törətdiyi cinayətlər barədə ətraflı məlumat vermişdir.

Türkdilli Dövlətlərin Siyasətinə Dəstək Fondunun sədri Nüsrət Məmmədov Qırğızıstanda yaşayan azərbaycanlıları birliyə çağırmış, Qırğızıstan-Azərbaycan əlaqələrinin inkişafında Fondun rolundan bəhs etmişdir.

Akif Alaferdov Azərbaycan Respublikası Prezidenti Administrasiyasının rəhbəri, akademik Ramiz Mehdiyevin Bişkekdə rus və qırğız dillərində çap edilmiş “Azərbaycanlılara qarşı soyqırımı gerçəkliyi” kitabını, AMEA Tarix İnstitutunun direktoru, akademiyanın müxbir üzvü, əməkdar elm xadimi Yaqub Mahmudovun elmi redaktorluğu ilə institutun alimlərinin hazırladıqları, Bişkekdə ingilis və rus dillərində çap edilmiş “Ermənilərin Azərbaycan torpağındakı əməlləri haqqında tarixi faktlar” və Azərbaycan Respublikası Prezidenti Administrasiyasının sektor müdiri Qafar Əliyevin Bişkekdə rus dilində nəşr olunmuş “Müasir Azərbaycanın banisi, qurucusu və xilaskarı” kitablarını mərasim iştirakçılarına paylamışdır.

Qeyd edək ki, “Ermənilərin Azərbaycan torpağındakı əməlləri haqqında tarixi faktlar” kitabı görkəmli tarixçi alim Yaqub Mahmudovun “Tarixin ən təhlükəli xülyası” sərlövhəli ön sözü ilə açılır. Kitabda XVIII əsrin ikinci yarısında Azərbaycanın İrəvan xanlığını əks etdirən xəritə və ölkəmizin müxtəlif əsrlərə aid digər xəritələri də verilmişdir.

Kitabın Bişkekdə nəşri erməniləri narahat etmiş və onlar Qırğızıstan Xarici İşlər Nazirliyinə nota göndərmişlər.

Tarixi faktlarla zəngin olan bu kitablar Qırğızıstanın Milli Kitabxanasına, parlamentin üzvlərinə, ali təhsil ocaqlarına, dövlət və ictimai təşkilatlara, elmi dairələrə təqdim olunmuşdur.

Mərasimdə şəhidlərin ruhuna dualar oxunmuş, ehsan verilmişdir.

######