Prezident İlham Əliyev sentyabrın 27-də Quba rayonu ictimaiyyətinin

nümayəndələri ilə görüşmüşdür.

Rayon Ağsaqqallar Şurasının sədri HƏSƏN GÜNƏŞLİ dövlətimizin başçısına müraciətlə dedi: Hörmətli Prezident, icazə verin, Sizi Quba camaatı adından salamlayım və “Qubaya xoş gəlmisiniz!” deyim. Sizin son günlər regionlara səfərlərinizi çox izləyirik. Böyük ruh yüksəkliyi ilə o səfərlərə baxırıq, regionlarımızın gözəlliyi, onların bir-birindən yaraşıqlı olması bizdə böyük ruh yüksəkliyi yaradır. Bütün bunlar Sizin əməyinizin nəticəsidir. Biz Sizə çox dərin təşəkkürümüzü bildiririk.

Bildirmək istəyirik ki, Qubada da inkişaf var. Son illər Quba böyüyür, tikilir, gözəlləşir. Qubada diaqnostika mərkəzinin istifadəyə verilməsinə az qalıb, son tamamlanma işləri gedir. 50-yə yaxın yeni tipli məktəblər tikilib. Bunlar çox böyük işlərdir. Biz, demək olar ki, bir əsrə sığmayan işlər görürük. Respublikamız çiçəklənmə dövrünü yaşayır. Biz elə başa düşürük ki, gələn beşillik respublikamızın daha qüdrətli, daha nəhəng addımlarla irəliləməsi illəri olacaqdır. Biz Sizə təşəkkür edirik, Mehriban xanıma təşəkkür edirik. Bu məktəblərin tikintisində Mehriban xanımın əməyi az olmayıb, böyük zəhməti var. Sizə cansağlığı arzulayırıq. Bu əziz günlərdə Uca Allahdan Sizə, ailənizə, bütün millətimizə uzun ömür, cansağlığı, xoşbəxtlik arzulayıram. Çox sağ olun.

İLHAM ƏLİYEV: Mən sizi qarşıdan gələn müqəddəs Ramazan bayramı münasibətilə ürəkdən təbrik etmək istəyirəm, sizə cansağlığı, bütün qubalılara xoşbəxtlik arzulayıram.

Bütün bölgələr inkişaf edir və hər bir yerdə böyük işlər görülür. O cümlədən Quba rayonunda. Mən Bakıdan buraya gələrkən yeni yolun tikintisi ilə də maraqlandım. Hesab edirəm ki, ilin sonuna qədər bu yol tam hazır vəziyyətə düşəcəkdir. Bu, əlbəttə bütün bu zonanın inkişafına çox böyük təkan verəcəkdir. Çünki hər bir yerin inkişafı üçün yol əsas faktdır. Bu da adi yol deyil. Dünyada ən qabaqcıl texnologiyalar tətbiq olunur, beton yoldur. Deməli, inşaatçıların verdiyi vədlərə görə, bu yolun zəmanəti 30 ildir. 30 il əsaslı təmirsiz xidmət göstərəcəkdir. İlk dəfə olaraq, bölgələrə məhz beton yolu çəkilir. Çünki bundan əvvəl ancaq Bakı-aeroport yolu beton örtüklü tikilmişdir. Bu dəfə isə Bakıdan Qubaya, Qusara və sərhədə qədər tikilir. Mən şübhə etmirəm ki, bu yolun tikintisi nəticəsində bölgənin inkişafı daha da sürətlə gedəcəkdir. Daha çox investisiyalar qoyulacaq, iş adamları daha da çox fəallıq göstərəcəklər.

Qubanın çox gözəl təbii şəraiti var, gözəl iqlimi, gözəl təbiəti var. Burada turizmin inkişafı üçün çox yaxşı şərait var. Bilirəm ki, bu istiqamətdə müəyyən işlər görülür. Ancaq daha da böyük işlər görülməlidir. Bu işlər ən müasir səviyyədə görülməlidir.

Birinci böyük turizm kompleksi 2003-cü ildə tikilmişdir. Olimpiya İdman Kompleksinin yanında mehmanxana və kotteclər tikilmişdir. Bu gün də o mərkəz turizm məqsədləri üçün də xidmət göstərir. Bilirəm ki, başqa yerlərdə də buna bənzər mərkəzlər tikilib, ancaq Qubanın şəraitinə uyğun daha da gözəl binalar tikilməlidir. Hündürmərtəbəli binalar tikilir, bu da çox gözəl göstəricidir. Onu göstərir ki, artıq insanlarda maddi imkanlar daha da çoxalır.

Kənd təsərrüfatının inkişafı üçün çox yaxşı, əlverişli imkanlar var və dövlət öz tərəfindən bu sahənin inkişafı üçün tədbirlər görür. Bildiyiniz kimi, həm kreditlər verilir, həm texnika alınır və kəndlilərə güzəştlər edilir. Növbəti illərdə bu, daha da böyük həcmdə olacaqdır. Bölgələrin sosial-iqtisadi inkişafı Dövlət proqramının uğurlu icrası və başa çatması onu göstərir ki, bizim bütün addımlarımız düzgün istiqamətdə atılıbdır. Beş il ərzində proqram icra olunub və beş il ərzində bütün bölgələrdə böyük nailiyyətlər var.

Əlbəttə, problemlər də qalır və biz müxtəlif sahələrdə olan problemlərin həlli ilə məşğuluq. Mənim bölgələrə səfərlərimin əsas məqsədi ondan ibarətdir ki, mövcud olan problemləri aradan qaldıraq: insanları nə narahat edir, hansı məsələ öz həllini tapmalıdır, hansı məsələyə biz daha da çox diqqət göstərməliyik və onları necə həll edək?! Məsələlərin həlli üçün indi çox işlək mexanizmlər var - həm dövlət proqramları, həm dövlət investisiyaları, sahibkarlığa dəstək. Bütün bunlar ümumiyyətlə, hər bir ölkənin inkişafını təmin edir. Dövlət öz tərəfindən infrastruktur layihələrini icra etməlidir. Elektrik stansiyaları tikməli, yollar, qaz, su xətləri çəkməli, digər tərəfdən, özəl sektora maddi dəstək göstərməlidir, yaxşı şərait yaratmalıdır. Qalan işlər isə indi özəl sektorun boynuna düşür. Çünki bizim iqtisadiyyatımızın artıq böyük hissəsi özəl sektor tərəfindən formalaşmışdır. Daxili məhsulun 84 faizi özəl sektorda formalaşıbdır. Bu onu göstərir ki, bizdə liberal islahatlar çox uğurla aparılır və bu islahatlardan insanlar da istifadə edirlər. Güclü iqtisadiyyat isə imkan yaradır ki, sosial məsələlər də öz həllini tapsın. Sosial məsələlərin həlli növbəti illər üçün prioritet məsələ olacaqdır.

Beləliklə, Azərbaycanın uzunmüddətli inkişaf strategiyası icra olunacaq və ölkəmiz çox güclü dövlətə çevriləcəkdir. Bir daha deyirəm ki, bunu etmək üçün bütün imkanlar var. Son 5 il ərzindəki təcrübə onu göstərir ki, hansı məsələ qarşıya qoyulubsa, o məsələ həll olunubdur. İstər ölkə daxilində, istər xarici siyasətdə.

Azərbaycanın uğurlu inkişafı artıq bütün dünya üçün bir reallıqdır. Eyni zamanda, bizim bölgədəki mövqeyimiz möhkəmlənir, bunun da əsas səbəbi güclü iqtisadiyyat, güclü enerji siyasəti və sabitlikdir. Azərbaycan bu bölgədə sabitləşdirici rol oynayır. Bu, həm ölkəmizin inkişafı üçün vacibdir, həm də beynəlxalq əməkdaşlıq üçün çox vacibdir.

Mən çox istəyirəm ki, Azərbaycanın bütün bölgələrində inkişaf daha da sürətlə getsin. Siz qeyd etdiniz, yeni Müalicə-Diaqnostika Mərkəzi tikilir. O, ən qabaqcıl texnologiyalarla təchiz olunacaq, orada ən müasir avadanlıq quraşdırılacaq və insanlar orada ən yüksək səviyyədə həm müayinədən keçəcəklər, həm də müalicə alacaqlar. Bizim insanlar buna layiqdirlər. Dünyada hansı ən qabaqcıl texnologiya varsa, o, orada quraşdırılacaqdır. Hesab edirəm ki, bir neçə aydan sonra bu mərkəz hazır olacaq və ondan sonra əminəm ki, insanların sağlamlığı üçün daha da yaxşı şərait yaradılacaqdır.

O ki qaldı, digər sosial məsələlərin həllinə, - siz onları yaxşı bilirsiniz, məktəb tikintisi, yollar, parklar, - bütün bunlar həm Quba rayonunun inkişafına xidmət göstərir, həm də bütün bölgənin inkişafına çox güclü təkan verir. Uşaqlar yaxşı məktəbdə oxumalıdırlar, müəllimlər yaxşı məktəbdə işləməlidirlər. İş yerləri olmalıdır, işsizlik, yoxsulluq olmamalıdır. Bütün bu məsələlər vaxtilə şüar kimi səslənirdi, amma indi bu, reallıqdır.

Mən sizə növbəti illərdə növbəti uğurlar arzulayıram. Arzu edirəm ki, həmişə olduğu kimi, Qubanın inkişafında fəal iştirak edəsiniz. Sağ olun.

######