QUBA VƏ LERİK RAYONLARINDA YANĞIN BAŞ VERMİŞDİR
Bakı, 5 avqust (AZƏRTAC). Quba rayonunun Talabıqışlaq bələdiyyəsinin Küçeyi kəndi ərazisində yanğın hadisəsi baş vermişdir.
Ekologiya və Təbii Sərvətlər Nazirliyindən (ETSN) AZƏRTAC-a verilən məlumata görə, yanğın torpaq mülkiyyətçilərinə məxsus taxılı biçilmiş kövşənlik və bələdiyyə fonduna aid 25 hektar quru ot və kol-kos sahələrini əhatə etmişdir.
ETSN-nin yerli qurumlarının, Quba və Şabran rayonlarının dövlət yanğından mühafizə dəstələrinin, habelə yerli əhalinin səyləri nəticəsində yanğın operativ şəkildə söndürülmüş və onun yaxınlıqda olan meşəyə keçməsinin qarşısı tam alınmışdır.
Daha bir yanğın hadisəsi Lerik Meşə Mühafizəsi və Bərpası Müəssisəsinin ərazisində naməlum səbəbdən baş vermiş və 0,9 hektar ərazini əhatə etmişdir.
Yanğın ETSN-nin yerli qurumlarının və yerli sakinlərin köməkliyi ilə operativ şəkildə söndürülmüş və meşə fonduna ziyan dəyməmişdir.
Bölmənin digər xəbərləri
