Azərbaycan Prezidenti İlham Əliyev sentyabrın 27-də Olimpiya İdman Kompleksinin açılış mərasimindən sonra rayon ictimaiyyətinin nümayəndələri ilə görüşdü.

Rayon ağsaqqalı NAZİR AĞALİYEV dövlətimizin başçısını salamlayaraq dedi:

- Hörmətli cənab Prezident!

“Mən həmişə qusarlılarla olacağam, qusarlıların problemlərini həll edəcəyəm” sözlərini demiş Prezidenti bu gün Qusarda görməyimizə çox şadıq. Bütün qusarlılar adından Sizi salamlayıram və “Xoş gəlmisiniz!” deyirəm.

Cənab Prezident, deyirlər, yağış bərəkət rəmzidir. Bu gün Qusarda yağan yağışı Sizin Azərbaycan xalqı, o cümlədən qusarlılar üçün yaratdığınız, həyata keçirdiyiniz, memarı olduğunuz regionların sosial-iqtisadi inkişafı Dövlət proqramına uyğun olaraq gətirdiyiniz bərəkət kimi qəbul edirik. Bu gün yağan yağışı, sözsüz ki, Sizin proqramınız əsasında və regionların sosial-iqtisadi inkişafı Dövlət proqramının ikinci mərhələsində Qusar üçün görüləcək işlərin xoş müjdəsi kimi qəbul edirik.

Cənab Prezident, çox şadıq ki, Sizin rəhbərliyiniz altında Azərbaycan Respublikası çiçəklənir, inkişaf edir, dövlətin iqtisadi gücü, müdafiə qabiliyyəti güclənir, xalqın güzəranı gündən-günə yaxşılaşır. Bu, ulu öndərimiz Heydər Əliyevin qurduğu müasir Azərbaycanın və Azərbaycan dövlətinin idarəetmə strategiyası və taktikasının Sizin tərəfinizdən uğurla həyata keçirilməsinin rəmzidir. Sizin memarı olduğunuz regionların sosial-iqtisadi inkişafı Dövlət proqramı respublikada uğurla həyata keçirilir. Biz televiziyanı, mətbuatı gündəlik izləyirik. Ayrı-ayrı regionlarda, bölgələrdə gedən böyük quruculuq işləri, Sizin iştirakınızla açılan obyektlər sübut edir ki, Siz xalqa qulluq edən Prezidentsiniz. Biz buna çox şadıq.

Qusarda görülən işlərdən söhbət açarkən, deməliyik ki, Sizin Qusar üçün yaratdıqlarınız insanların yadından heç vaxt silinməyəcəkdir. Birinci növbədə, sizin tövsiyəniz əsasında Qusarda tikilən bu Olimpiya İdman Kompleksi qusarlı idmançılar üçün, Qusar camaatı üçün böyük töhfədir. Eyni zamanda, Sizin şəxsi təşəbbüsünüz əsasında Qusarda tikilən Dağ-Xizək Kompleksi qusarlıların yadından çıxmayacaqdır. Bunun Qusarın gələcək inkişafı üçün böyük önəmi olacaqdır. Burada 5 min nəfərə yaxın qusarlı işlə təmin olunacaq. Bu, qusarlıların gələcək sosial həyatı üçün böyük önəm daşıyır.

Eyni zamanda, yəqin gələndə baxmısınız, Qusarda asfalt döşənmiş işıqlı yollar, yeni salınan xiyabanlar, məhəllə parkları, “Yeniləşən Azərbaycana yeni məktəb” layihəsi çərçivəsində Heydər Əliyev Fondunun sifarişi ilə tikilən və tikilməkdə olan, təmir edilmiş onlarca məktəb, eləcə də Sizin proqramınız əsasında Qusarın kəndlərində tikilən onlarca elektron ATS Sizin qusarlılara, ümumiyyətlə, Azərbaycan xalqına verdiyiniz töhfədir. Bizim məlumatımız var ki, regionların sosial-iqtisadi inkişafı ilə bağlı Sizin ikinci proqramınız hazırlanır. Bayaq dediyim kimi, Siz həmişə qusarlılarlasınız, qusarlıların problemləri sizin probleminizdir. Biz belə başa düşürük. Çox güman ki, Qusar bundan sonra yeni start götürəcək, daha da çiçəklənəcəkdir. Qusarın inkişaf etməsinə söz ola bilməz.

Möhtərəm Prezident, yeri gəlmişkən, bir məsələni qeyd etmək istəyirəm. Qusarlıların bir xahişi var. SDK-Həzrə sərhəd yolunun üstündə 21 kənd yerləşir. Təxminən 15 min əhali o yoldan istifadə edir. Eyni zamanda, o yolun üstündə sərhəd zastavaları yerləşmişdir. Çoxdan salınmış yoldur, dağlardan keçir. O yol müəyyən vaxtdan sonra öz-özünə tamamilə dağılacaqdır. Xahiş edirik, tapşırıq verəsiniz ki, bu yol yenidən çəkilsin.

İLHAM ƏLİYEV: Sağ olun, təşəkkür edirəm. Mənə məruzə ediblər, mən artıq göstəriş vermişəm, yaxın zamanlarda bu yol yenidən çəkiləcək və orada insanlar daha da rahat yaşayacaqlar. Deyə bilərəm ki, Qusarın gələcək inkişafı üçün nə lazımdırsa, biz onu edəcəyik.

Siz mənim Qusara səfərlərimi və görüşlərimi yaxşı xatırlayırsınız. Mən hər görüşdə demişəm və bu gün də demək istəyirəm ki, Qusarın inkişafı çox böyük əhəmiyyət daşıyır. Həm qusarlılar üçün, həm də bütün Azərbaycan üçün. Belə gözəl Olimpiya İdman Kompleksinin tikintisi bir daha onu göstərir ki, Qusara xüsusi diqqət, məhəbbət var. Burada həm idmanla məşğul olmaq üçün, həm də istirahət etmək üçün bütün imkanlar var. Bu, eyni zamanda böyük bir turizm mərkəzidir. Burada kotteclər, mehmanxana, trenajor zalları, üzgüçülük hovuzu, gözəl idman zalları var. Yəni həm Qusar idmançıları üçün, həm də rayon sakinləri üçün çox gözəl şərait yaradılıbdır. Mən bütün rayon sakinlərinə tövsiyə edirəm ki, öz sağlamlıqlarını möhkəmləndirmək üçün bu kompleksdən səmərəli istifadə etsinlər.

Qusarda bütün başqa məsələlər də həll olunur. Mən keçən dəfə buraya 2005-ci ildə gəlmişdim. O ildən bu günə qədər çox böyük dəyişikliklər var. Siz bunu yaxşı bilirsiniz, görürsünüz. Həm sənaye müəssisələri tikilir, həm məktəblər tikilir. Bu gün mən yeni xəstəxananın təməlini qoyacağam. Orada həm gözəl şərait, bütün lazımi avadanlıq olacaq, həm də, ən müasir tibbi xidmət göstəriləcəkdir. İdman kompleksi tikilibdir, Dağ-Xizək Kompleksi beynəlxalq səviyyədə tikiləcəkdir. Biz bunun tikintisi üçün Avstriyadan qabaqcıl memarlıq şirkətlərini dəvət etmişik. Orada həm turistlər üçün, həm də yerli insanlar üçün bütün şərait yaradılacaqdır. Azərbaycan dövləti bu işə yüz milyonlarla dollar həcmində vəsait qoyur ki, orada çox müasir, dünya səviyyəli turizm mərkəzi yaradılsın. Ondan nəinki qışda, yay aylarında da səmərəli istifadə etmək mümkün olacaqdır. Həm burada yaşayan insanlar üçün iş yeri yaradılacaqdır, həm də rayonun inkişafına böyük töhfə veriləcəkdir. Düzdür, indi Azərbaycan dövlətinin imkanları böyükdür. Biz Qusarın inkişafına bundan sonrakı illərdə də böyük investisiyalar qoyacağıq. Ancaq hər rayon öz daxili imkanlarından, öz potensialından istifadə etməlidir. Qusar turizm üçün çox gözəl bir yerdir.

X X X

Sonra söhbət Olimpiya İdman Kompleksinin daxilində masa ətrafında davam etdirildi.

İLHAM ƏLİYEV: Burada belə gözəl şərait var. Gərək bu şəraitdən istifadə edək. Böyük restoran var, burada istənilən tədbiri keçirmək üçün bütün imkan var. Mən çox şadam ki, bu kompleksin açılışında biz bərabər iştirak edirik. Biz bu kompleksin timsalında Qusarda gedən abadlıq, quruculuq işlərini görürük. Bu işlər daha da sürətlə getməlidir. Bunun üçün bütün imkanlar var. Siz, burada yaşayan insanlar yaxşı görürsünüz ki, Qusar necə sürətlə inkişaf edir, abadlaşır, müasirləşir.

Burada yeni sənaye müəssisələri tikilməlidir. Əlbəttə, turizm və kənd təsərrüfatı növbəti illərdə yəqin ki, əsas istiqamət olmalıdır. Mən artıq qeyd etdim ki, burada Azərbaycanın böyük turizm mərkəzi yaradılır. Bu ilin büdcəsində vəsait nəzərdə tutulubdur. Gələn ilin büdcəsində əlavə vəsait olacaqdır. Böyük tikinti işləri aparılacaqdır. Bu tikinti zamanı burada yaşayan insanlar işlərdə iştirak edəcəklər. Yəqin ki, artıq iştirak edirlər. Bu da yeni iş yerləri deməkdir. Bu turizm mərkəzi işə düşəndən sonra Qusar beynəlxalq turizm mərkəzinə çevriləcəkdir. Mən vəzifə qoymuşam ki, Dağ-Xizək Kompleksi dünyanın yüksək səviyyəsində olmalıdır. Ondan aşağıda olmamalıdır və biz buna nail olacağıq.

Bu gün Qusara içməli suyun gətirilməsini qeyd etdik. Bu da böyük problemdir və təkcə Qusarda deyil, başqa şəhərlərdə də var. Azərbaycanda içməli su problemi var. Biz bunu həll etməyə çalışırıq və əminəm ki, Qusarda yeni tikilmiş su kəməri öz müsbət təsirini göstərəcəkdir. Qusarın inkişafı üçün lazım olan bütün başqa tədbirlər də görüləcəkdir.

Siz qeyd etdiniz ki, növbəti iqtisadi inkişaf proqramı gözlənilir. Artıq bu proqramın ilkin parametrləri hazırdır. Bu proqramda hər bir rayon üzrə xüsusi tədbirlər planı olacaqdır. Hər bir rayonun probleminin həlli üçün lazımi tədbirlər görüləcəkdir. Əlbəttə ki, Qusar rayonunun inkişafı da burada nəzərdə tutulacaqdır. Həm rayon mərkəzinin, həm də kəndlərin abadlaşması. Dediyiniz avtomobil yolunun çəkilməsinin çox böyük təsiri olacaqdır. Yol çəkilən kimi canlanma baş verir, insanlar özlərini daha da rahat hiss edirlər.

İndi biz Bakıdan Qusara avtomobil yolu çəkirik. Mən bu gün buraya gələrkən yolda dayandım, işlərlə maraqlandım. İlk dəfə olaraq Azərbaycanda bölgədə beton yol çəkilir. Beton yol həm də möhkəmdir. İnşaatçılar 30 illik zəmanət verirlər ki, otuz il ərzində o yola heç nə olmayacaqdır. Digər tərəfdən, bu, çox sürətli və dördzolaqlı yoldur. Köhnə yol ikizolaqlıdır və əlbəttə, nəqliyyat üçün təhlükəli idi. Bu, dördzolaqlı olacaq, ortada ayırma xətti olacaqdır. Bu, nəqliyyatın təhlükəsizliyi və rahatlıq üçün də çox vacib rol oynayır. Qusardan başqa rayonlara, Bakıya tez bir zamanda gedib-gəlmək mümkün olacaqdır. Mən şübhə etmirəm ki, bu yol çəkiləndən sonra təkcə Qusar deyil, bütün ətraf rayonlar daha da sürətlə inkişaf edəcəkdir.

Bizim planlarımız aydındır, açıqdır, bunu hamı bilir. Regionların sosial-iqtisadi inkişafı Dövlət proqramı uğurla başa çatır. Proqramda nəzərdə tutulmuş bütün vəzifələr yerinə yetirilibdir. Növbəti beş il ərzində qalan məsələlər yerinə yetiriləcəkdir. İnfrastruktur layihələri, iqtisadi layihələr, sənaye kompleksinin yaradılması, müasirləşməsi, sosial məsələlərin həlli. Bax, Qusarda tikilmiş məktəblər bizim sosial siyasətimizin əlamətidir. Bu gün təməlini qoyacağımız böyük xəstəxana burada yaşayan insanlara xidmət göstərəcəkdir. Müalicə üçün Bakıya, başqa yerlərə getmək lazım olmayacaq, müasir avadanlıq quraşdırılacaqdır. İnsanlar həm müayinə olunacaq, həm müalicə alacaq, həm də cərrahiyyə şöbəsi olacaqdır. Bu, insanların sağlamlığı üçün çox mühüm rol oynayacaqdır.

Gözəl idman kompleksi tikildi ki, uşaqlar, cavanlar idmanla məşğul olsunlar. Mən çox sevinirəm ki, Azərbaycanda gənclər idmana çox böyük meyil göstərirlər. İdmanla məşğul olan həm fiziki cəhətdən, həm də mənəvi cəhətdən sağlam olur, vətənpərvərlik ruhunda yaxşı tərbiyə alır, pis vərdişlərdən uzaq olur. Bizə lazımdır ki, cavanlarımız sağlam böyüsünlər və cəmiyyət, ölkə üçün dəyərli vətəndaşlar olsunlar. Bu baxımdan belə komplekslərin çox böyük rolu var.

Bütövlükdə Azərbaycanın bütün başqa yerlərində olduğu kimi, bu rayonda da ictimai vəziyyət çox yaxşıdır. Burada insanlar rahat yaşayırlar. Mən çox istəyirəm ki, daha da yaxşı yaşasınlar. Azərbaycanda bütün millətlərin nümayəndələri bir ailə kimi yaşayır. Bax, Azərbaycanın xüsusiyyəti bundan ibarətdir. Heç bir ayrı-seçkilik, heç bir fərq qoyulmur. Narahatlıq doğuran heç bir məsələ yoxdur. Bu, həm bizim bütün insanların ürəyində olan duyğulardır, həm də dövlət siyasətidir. Azərbaycanın dövlət siyasəti bu istiqamətdə çox birmənalıdır. Azərbaycanda yaşayan bütün xalqlar eyni hüquqlara malikdir, bərabər hüquqludur. Bizim xoşbəxtliyimiz ondan ibarətdir ki, Azərbaycanda bütün xalqlar mehriban şəkildə, bir ailə kimi yaşayır. Qusarda bizim ləzgi qardaşlarımız yaşayırlar. Əksəriyyəti onlar təşkil edirlər. Onlar öz vətənlərində yaşayırlar, öz vətənlərinin imkanlarından istifadə edirlər. Azərbaycanın inkişafı üçün, müstəqilliyimizin möhkəmlənməsi üçün ləzgi qardaşlarımızın keçmişdə çox böyük xidmətləri olubdur və bu gün də belədir.

Mən çox istəyirəm ki, burada həyat səviyyəsi daha da yaxşı olsun. Burada həm qabaqcıl texnologiyalar tətbiq olunsun, həm də sənaye məsələləri, iqtisadi, sosial məsələlər həll olunsun ki, insanların həyat səviyyəsi yaxşı olsun. Düzdür, bütün ölkədə aparılan sosial və iqtisadi islahatlar nəticəsində həyat səviyyəsi yüksəlibdir. Ancaq mən istəyirəm ki, daha da yüksəlsin, Azərbaycan vətəndaşları çox yaxşı həyat səviyyəsinə malik olsunlar. Bunu etmək üçün bizim bütün imkanlarımız var. Bizim çox güclü dövlət siyasətimiz var, dövlətçilik ənənələri möhkəmlənir. Müstəqil ölkə kimi Azərbaycan özünü dünya miqyasında tanıtdırıbdır. Bizim bütün qonşu dövlətlərlə çox yaxşı, bərabər münasibətlərimiz var. İqtisadi islahatlar sürətlə gedir, neft, qaz kimi təbii sərvətlərimiz var, maddi imkanlarımız artır. Son beş ildə büdcəmiz on dəfədən çox artıbdır. 2009-cu ilin büdcəsi 2003-cü ilin büdcəsindən 15 dəfə böyük olacaqdır. Bu da reallıqdır. Bütün bu vəsait insanların sosial məsələlərinin həllinə yönəldilir.

Bu işlər hər bir rayonda görülür. Bildiyiniz kimi, mən rayonlara tez-tez gedirəm, vəziyyətlə tanış oluram. Mən Qusara 2005-ci ildə gəlmişdim, olan dəyişiklikləri görürəm. Mən məlumat alıram, ondan əvvəl də bilirdim ki, vəziyyət necədir, hansı məsələlər var, insanları hansı problemlər narahat edir, əlavə nə edilməlidir ki, burada hər şey daha da yaxşı olsun və bunu edirik.

Deyə bilərəm ki, bölgələrin inkişafı mənim üçün ən prioritet məsələlərdən biridir. Düzdür, ölkənin qarşısında müxtəlif problemlər var. Biz təhlükəsizliyimizi təmin etməliyik, müdafiə gücümüzü artırmalıyıq, iqtisadi, siyasi islahatları aparmalıyıq. Beynəlxalq münasibətlərə çox ciddi yanaşmamız var və Azərbaycan xarici siyasət baxımından çox uğurlu addımlar atıbdır. Amma bununla bərabər, insanların gündəlik həyatı, gündəlik yaşayışı əsasdır. Mən həmişə demişəm, bu gün də deyirəm ki, Azərbaycan vətəndaşları bax, bu gün yaxşı yaşamalıdır. Bəziləri hərdən deyir ki, 10-20 ildən sonra yaxşı olacaqdır. Olsun, əlbəttə, yaxşı olacaqdır. İndi də yaxşıdır. Sadəcə, deyə bilərəm ki, mən Azərbaycanda mövcud olan vəziyyəti çox yüksək qiymətləndirirəm. Ancaq biz qabağa getməliyik, irəliyə baxmalıyıq ki, daha nə etməliyik, hansı işlər görməliyik. Bax, mən bu barədə fikirləşirəm. Bilirəm ki, bu, sizi də düşündürür. Amma belə bir səmimi söhbətdə fikir mübadiləsi nəticəsində təbii ki, yaxın zamanda əlavə tədbirlər haqqında qərarımızı verəcəyik.

O ki qaldı yola, hesab edin ki, yol məsələsi həll olunubdur. Yaxın zamanlarda rayon icra hakimiyyətinə vəsait ayrılacaq və icra hakimiyyəti özü bu işləri aparar. Əgər Nəqliyyat Nazirliyinin bu işləri reallaşdıran qurumlarından yardım lazım olarsa, deyərsiniz, bunu birlikdə edərik. Əgər başqa belə kənd yolları varsa, onlara da diqqət göstərmək lazımdır.

AĞSAQQAL: Çox sağ olun. Hər şey çox yaxşıdır. Pensiyalar da artıbdır.

İLHAM ƏLİYEV: Düzdür, artırmışıq, amma yenə də artırmalıyıq. Son beş ildə bir neçə dəfə artırmışıq. İndi minimum pensiya 75 manat olubdur. Bir neçə il bundan əvvəl 10 manat idi. Amma indi 75 manatdır. Əlbəttə, 10 manata baxanda 75 manat yaxşıdır. Amma daha da yaxşı olacaqdır.

NAZİR AĞALİYEV: Cənab Prezident, işlər belə sürətlə getsə, Qusar 2-3 il ərzində cənnətə dönəcəkdir. Çünki Qusarda son vaxtlar gedən quruculuq işləri, ayrı-ayrı sahələrdə görülən tədbirlər bunu deməyə əsas verir.

İLHAM ƏLİYEV: Bir daha deyirəm, dövlət gözəl təbiəti, iqlimi, təbii şəraiti olan rayonda həm turizmin, həm də kənd təsərrüfatının inkişafı, emal müəssisələrinin yaradılması, sosial məsələlərin həlli üçün investisiya qoyur və qoyacaqdır. Qusar sözün əsl mənasında ən qabaqcıl rayonların birinə çevrilməlidir. Mən də sizə söz verirəm ki, buna nail olmaq üçün öz səylərimi əsirgəməyəcəyəm.

Sizi bir daha salamlayıram və qarşıdan gələn Ramazan bayramı münasibətilə ürəkdən təbrik edirəm.

######