Regionlarda ekoloji maarifləndirici görüşlər keçirilib
Bakı, 15 yanvar, AZƏRTAC
Regional Ekologiya və Təbii Sərvətlər idarələrinin əməkdaşları tərəfindən “Tullantıların ekoloji cəhətdən səmərəli idarəolunması və təkrar emal” mövzusunda maarifləndirici görüşlər keçirilib.
Ekologiya və Təbii Sərvətlər Nazirliyinin mətbuat xidmətindən AZƏRTAC-a verilən məlumata görə, maarifləndirici görüşlərin əsas məqsədi uşaqlarda ekoloji biliklərin zənginləşdirilməsi, ətraf mühitin qorunmasının vacibliyinin aşılanması, sağlam ekoloji davranış vərdişlərinin formalaşdırılmasıdır.
Cəbrayıl rayonu N.Aslanov adına Cocuq Mərcanlı kənd tam orta məktəbində və Lerik rayonu Sivəkəran kənd məktəbində keçirilən görüşlərdə şagirdlərə tullantıların növləri, düzgün çeşidləmə, təkrar emal prosesi və bu sahədə görülə biləcək tədbirlər, həmçinin ətraf mühitin qorunmasının vacibliyi, təbii ehtiyatlardan düzgün və səmərəli istifadənin yolları izah edilib.
Eyni zamanda, ölkə ərazisində, o cümlədən Qarabağ və Şərqi Zəngəzur iqtisadi rayonları ərazisində həyata keçirilən ekoloji tədbirlər barədə ətraflı məlumat verilib.
Tədbirin yekununda şagirdləri maraqlandıran suallar cavablandırılıb.
Bölmənin digər xəbərləri
