SİYASƏT
Rəsmi Minsk Azərbaycanın ərazi bütövlüyünü tanımışdır və bundan sonra da tanıyacaqdır
Minsk, 11 dekabr AZƏRTAC). Dekabrın 11-də Minskdə keçirilən Avropa və Asiya media qurumlarının 7-ci forumunun bir qrup iştirakçısını Belarus Prezidenti Aleksandr Lukaşenko qəbul etmişdir.
Görüşdə Belarus Prezidenti forum iştirakçılarının bir sıra suallarını cavablandırmışdır.
Prezident A.Lukaşenko demişdir ki, müasir dünyada internet medianın rolu artmaqdadır. İnternet media hər bir cəmiyyətin həyatındakı siyasi proseslərə ciddi təsir göstərmək iqtidarındadır. Lakin internet vasitəsilə fəaliyyət göstərən kütləvi informasiya vasitələri cəmiyyəti parçalayan separatçı ideyaların qarşısını almalıdır.
Postsovet məkanındakı münaqişələrə toxunan A.Lukaşenko bildirmişdir ki, rəsmi Minsk Azərbaycanın ərazi bütövlüyünü və suverenliyini tam dəstəkləyir və bundan sonra da dəstəkləyəcəkdir. Avropada dərin iqtisadi böhranın davam etdiyi bir zamanda Azərbaycanın iqtisadi cəhətdən güclü inkişaf etdiyini deyən Belarus Prezidenti bildirmişdir ki, Prezident İlham Əliyev olduqca düşünülmüş siyasi addımlar atır. Bu addımların nəticəsidir ki, Azərbaycanın dünyadakı nüfuzu gündən-günə artır.