Respublika Veteranları Təşkilatı Avropa Parlamentinin Azərbaycan barədə qərəzli qətnaməsinə etiraz edir
Bakı, 15 sentyabr, AZƏRTAC
Avropa Parlamentinin 2015-ci il sentyabrın 10-da qəbul etdiyi qərəzli antiazərbaycan qətnaməsinə etiraz olaraq Azərbaycan Respublikası Müharibə, Əmək və Silahlı Qüvvələr Veteranları Təşkilatı Rəyasət heyətinin sentyabrın 15-də keçirilən iclasında bəyanat qəbul edilib.
Bəyanatda deyilir: “Avropa Parlamentinin Azərbaycan ilə bağlı irəli sürülən iddiaların yanlış və qərəzli şəkildə məlumatlar əsasında hazırlandığı qətnamə Azərbaycan Respublikası Müharibə, Əmək və Silahlı Qüvvələr Veteranları Təşkilatı tərəfindən narazılıqla qarşılanıb, ciddi etiraz və təəssüf hissi yaradıb. Avropada demokratiyanın dayaqlarından biri kimi tanınan bu qurumun belə anlaşılmaz addım atması bütövlükdə regionda və dünyada demokratik dəyərlərə və ədalət prinsiplərinə vurulan zərbədir. Avropa Parlamenti müdriklik edib Avropa İttifaqının üzvü olan və olmayan ölkələrə bərabər və ədalətli münasibət göstərmək əvəzinə, Azərbaycan haqqında həqiqətə uyğun olmayan bəyanatları ilə radikal, pozucu siyasət yeritdiyi açıq-aşkar görünür”.
Bəyanatda daha sonra qeyd edilir ki, Avropa Parlamentinin Azərbaycan əleyhinə qəbul etdiyi qətnamə, son illər Avropanın bəzi ölkələrində Azərbaycana qarşı münasibətin dəyişməsi respublikamızın qazandığı böyük nailiyyətlər, xüsusilə, ilk Avropa Oyunlarının ölkəmizdə böyük uğurla keçirilməsi bəzilərində qısqanclıq, paxıllıq hissi yaradıb. Bu da Azərbaycana qarşı qərəzli mövqeyin ortaya qoyulmasına gətirib çıxarıb. Bu qısqanclıq, paxıllıq xüsusilə erməni diasporunun təsirinin nəticəsidir.
Qətnamədə, həmçinin Dağlıq Qarabağ münaqişəsi ilə bağlı Azərbaycana nümayəndə heyəti göndərməsi təklif edilir. Ancaq nədənsə 23 ildən artıqdır ki, Avropa Parlamenti keçirdiyi iclaslarında BMT-nin Təhlükəsizlik Şurasının qəbul etdiyi dörd qətnaməyə Ermənistan tərəfindən məhəl qoyulmamasından, Ermənistandan deportasiya edilmiş, Qarabağdakı doğma yurd-yuvalarından qovulmuş yüz minlərlə azərbaycanlının hüquqlarından bircə dəfə də olsun danışmayıb. Qarabağda rəsmi fəaliyyət göstərən terrorçu erməni separatçılarının qətlə yetirdiyi günahsız, müxtəlif fiziki və mənəvi zorakılıqlara məruz qalmış insanların hüquqları yada düşməyib.
Bəyanatda daha sonra deyilir: “Müharibə, Əmək və Silahlı Qüvvələr Veteranları Təşkilatı olaraq, Avropa Parlamentinin Azərbaycan əleyhinə qəbul etdiyi 2015-ci il 10 sentyabr tarixli qərəzli və qeyri-obyektiv antiazərbaycan qətnaməsini birmənalı şəkildə rədd edir və Avropa ictimaiyyətini ikili standartlara xidmət edən bu siyasətə qarşı etiraz bildirməyə səsləyirik. Ermənistanın işğal etdiyi Azərbaycan torpaqlarından çıxmasını, ölkəmizin ərazi bütövlüyünün və Qarabağdan kütləvi surətdə məcburi köçürülmüş bir milyondan artıq sakinlərin pozulmuş hüquqlarının təmin olunmasnı tələb edirik.
Hesab edirik ki, Avropa Parlamentinin müstəqil və suveren dövlətin daxili işlərinə qarışması, ona qarşı təhqir və təzyiq məqsədilə qəbul olunmuş hər hansı sənəd qəti şəkildə qəbuledilməzdir”.
Bölmənin digər xəbərləri
