RİVALDO İTALİYA ÇEMPİONATININ ƏN PİS OYUNÇUSUDUR

09.12.2003 [17:01]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, braziliyalı Rivaldo 2003-cü ildə İtaliya çempionatının ən pis oyunçusu adlandırılmışdır. İtaliyanın RAİ radiosunun keçirdiyi sorğuda iştirak edən azarkeşlərin 28 faizi “Milan”ın oyunçusuna səs vermişdir.

Rivaldo bu mövsümdə “Milan”ın heyətində cəmi bir oyun keçirmiş, dekabrda klubdan kənar edilmiş, indi də bir sıra komandalarla, o cümlədən Rusiyanın “Spartak” komandası ilə danışıqlar aparır.

İkinci yerdə Liviya liderinin oğlu Əl Səədi Qəzzafi gedir. O, “Peruca”nın heyətində bir oyun belə keçirməmiş, ancaq dopinq qalmaqalı ilə “ad çıxarmışdır”. O, səslərin 21,9 faizini toplamışdır.

Üçüncü yeri “Udineze”nin alman legioneri Karsten Yanker tutur. Bazar günü o, klubda çıxış etdiyi 17 ay ərzində ikinci qolunu vurmuşdur.

Sorğuda RAİ radiosunun 5 mindən artıq dinləyicisi iştirak etmişdir.