Romanın məşhur Trevi fəvvarəsinə icazəsiz girən turist cərimələnib
Roma, 28 fevral, AZƏRTAC
İtaliyanın paytaxtı Romanın simvolik tikililərindən olan Trevi fəvvarəsinə icazəsiz girən turist 500 avro cərimələnib və buranı ziyarət etməsinə ömürlük qadağa qoyulub.
AZƏRTAC xəbər verir ki, yeni zelandiyalı üç turist Trevi fəvvarəsinə girmək istəyərkən polis tərəfindən saxlanılıb. Lakin onlardan biri polisdən qaçaraq tarixi fəvvarənin içinə atlayıb. Həmin şəxsin spirtli içkinin təsiri altında bu addımı atdığı bildirilib.
Polisin məlumatına görə, hər il bir çox insan fəvvarəyə ayağını saldığı və ya buraya butulka atdığı üçün cərimələnir. Eyni zamanda, simvolik məna daşıyan və arzu tutularaq fəvvarəyə atılan dəmir pullar da oğruların hədəfinə çevrilir. Buraya ildə təxminən 1,5 milyon avro dəyərində dəmir pullar atılır və bu vəsait Romadakı xeyriyyə təşkilatlarına verilir.
Rəsmilər fəvvarənin qorunması üçün təhlükəsizlik tədbirlərinin gücləndiriləcəyini, bu cür hallara qarşı ciddi cərimə və sanksiyaların tətbiq olunacağını bildiriblər.
Qeyd edək ki, ötən ilin sonlarında burada hərtərəfli bərpa işləri aparılıb, müəyyən müddət ərzində fəvvarəyə eyni anda maksimum 400 ziyarətçinin yaxınlaşmasına imkan verən nəzarət sistemi tətbiq edilib. Əraziyə daxil olmaq üçün ödəniş sisteminin tətbiq edilməsi də nəzərdən keçirilir.
Barokko memarlığının nümunəsi sayılan Trevi fəvvarəsi XVIII əsrdə italyan memar Nikola Salvi tərəfindən Poli Sarayının fasadlarından birində inşa olunub. Fəvvarə hər il milyonlarla turistin ziyarət etdiyi Romanın ən görməli yerlərindən biridir.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
