Təhsil islahatları Naxçıvan Muxtar Respublikasında həyata keçirilən dövlət siyasətinin mühüm tərkib hissəsidir. Son illər bu istiqamətdə görülən tədbirlər nəticəsində yüzlərlə məktəb binası tikilib və ya əsaslı təmir olunub. Ardıcıl xarakter alan bu quruculuq prosesi Şahbuz rayonunu da əhatə edib.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, oktyabrın 27-də Şahbuz şəhər 2 nömrəli tam orta məktəbinin yeni binası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.

Tədbirdə məktəbin direktoru Əvəz Həsənov çıxış edərək deyib ki, muxtar respublikanın bütün yaşayış məntəqələrində ən müasir məktəb binaları tikilib istifadəyə verilir. Təhsil müəssisələrinin maddi-texniki bazası gücləndirilir, pulsuz dərsliklərlə təmin olunur, pedaqoji kollektivin fəaliyyəti üçün hərtərəfli şərait yaradılır. Müasir məktəb binasının tikilib istifadəyə verilməsinin “Muxtariyyət ili”ndə onlar üçün ən qiymətli hədiyyə olduğunu bildirən Əvəz Həsənov kollektiv adından minnətdarlıq edib, gənclərin yaxşı təhsil alması üçün bundan sonra da səylə çalışacaqlarını bildirib.

Naxçıvan Muxtar Respublikası Ali Məclisinin Sədri Vasif Talıbov Şahbuz şəhər 2 nömrəli tam orta məktəbinin istifadəyə verilməsi münasibətilə kollektivi təbrik edərək deyib: Ölkəmizdə təhsil sahəsində həyata keçirilən tədbirlər müstəqil Azərbaycanın gələcəyinə xidmət edir. Hər bir ölkənin gələcəyinin necə olacağını görmək üçün ilk növbədə onun gəncliyinə nəzər salmaq lazımdır. Təhsilli, vətənpərvər, intellektli və müasir dünyagörüşlü gənclər isə məktəblərdə yetişir. Bu məsələnin vacibliyini nəzərə alan ümummilli liderimiz Heydər Əliyev istər ötən əsrin 70-ci illərində, istərsə də müstəqillik dövründə təhsilin inkişafına xüsusi diqqət yetirib, ölkəmizdə təhsil infrastrukturu müasirləşdirilib, Azərbaycanın gələcəyinə xidmət edən təhsil strategiyası müəyyənləşdirilib. Dahi şəxsiyyət təhsilin cəmiyyətdəki rolunu yüksək qiymətləndirərək deyib: “Cəmiyyətdə hər şey məktəbdən, təhsildən başlanır”.

Ali Məclisin Sədri deyib: Müasir dövrdə cəmiyyətin tərəqqisi təhsilin inkişafı ilə sıx bağlıdır. O ölkələr gələcəyi olan ölkə hesab olunur ki, orada vətənpərvər və təhsilli gənc nəsil yetişir. Ona görə də pedaqoji kollektivlərin üzərinə mühüm vəzifələr düşür. Müəllimlər tələbkar olmalı, gənclərin təhsilli və vətənpərvər ruhda tərbiyə olunmalarına diqqəti artırmalıdırlar. Şagirdlər yaradılan şəraitdən səmərəli istifadə etməli, vətənpərvər və çalışqan olmalı, bunu tədrisdə qazandıqları nailiyyətlərlə sübut etməlidirlər. Ölkəmizdə bu vəzifələri yerinə yetirmək üçün hər cür şərait yaradılıb. Hər il müasir avadanlıqlarla təmin olunmuş məktəb binaları tikilərək istifadəyə verilir. Bütün bunlar isə Ulu Öndərimizin təhsil sahəsində qarşıya qoyduğu vəzifələrin layiqincə yerinə yetirilməsinə imkan verir.

Ali Məclisin Sədri deyib: Şahbuz şəhər 2 nömrəli tam orta məktəbinin nailiyyətləri nümunə gücündədir. Məktəbin qazandığı bu uğurlar tədrisin düzgün qurulması, nizam-intizamın və tələbkarlığın yüksək səviyyədə olmasının nəticəsidir. Kollektiv bundan sonra da qarşıya qoyulan vəzifələrin öhdəsindən layiqincə gəlməli, məktəbdə tədrisin səviyyəsi daha da yüksəldilməlidir.

Ali Məclisin Sədri qazanılan uğurlara görə məktəbin kollektivinə təşəkkürünü bildirib, Şahbuz rayon ümumtəhsil məktəblərində əla qiymətlərlə oxuyan bir qrup şagirdə kompyuter dəsti hədiyyə edib.

Sonra Ali Məclisin Sədri rəmzi açılışı bildirən lent kəsib, sinif otaqlarında və fənn kabinələrində yaradılan şəraitlə tanış olub.

Məlumat verilib ki, məktəb binası 216 şagird yerlikdir. Üçmərtəbəli təhsil ocağında 3-ü elektron lövhəli olmaqla 12 sinif otağı, kimya, biologiya və fizika laboratoriyaları, hərbi kabinə, kompyuter, şahmat və müəllimlər otaqları, kitabxana, bufet və idman zalı var. Üç minə yaxın dərslik və bədii ədəbiyyat fondu olan kitabxanada internet vasitəsilə digər elektron kitabxanalara da müraciət etmək mümkündür.

Kompyuter otağında hər biri internetə qoşulmuş 19 kompyuter dəsti var. Məktəbdə yaradılan fənn laboratoriyaları da müasir tədris-təcrübə avadanlıqları ilə təmin edilib. Fizika laboratoriyasında quraşdırılan elektron lövhə dərslərin və təcrübə məşğələlərinin müasir metodlar səviyyəsində keçirilməsinə şərait yaradacaq.

Naxçıvan Muxtar Respublikası Ali Məclisinin Sədrinin 2014-cü il 20 avqust tarixli Sərəncamına əsasən görkəmli pedaqoq, şair Məhəmməd Tağı Sidqinin anadan olmasının 160 illik yubileyi muxtar respublikada silsilə tədbirlərlə qeyd olunur, görkəmli ədibin maarifçilik ideyaları geniş təbliğ edilir. Məktəbin elektron lövhəli sinfində muxtar respublikanın distant tədris şəbəkəsinə qoşulmuş 97 ümumtəhsil məktəbi ilə Ədəbiyyat muzeyi arasında videobağlantı qurulub, “Məhəmməd Tağı Sidqinin həyatı və yaradıcılığı” mövzusunda dərs tədris olunub.

Bu il məktəbin 1-ci sinfinə 15 şagird qəbul olunub. Ali Məclisin Sədri məktəbə ilk dəfə qədəm qoyan birinci sinif şagirdlərinin tədris prosesi ilə maraqlanıb.

Baxış zamanı qeyd edilib ki, təhsil sahəsinə göstərilən diqqət və qayğı bu məktəbin də uğurlu nəticələr əldə etməsinə səbəb olub. Məktəbin məzunlarından 7-si ali məktəblərə, 1 şagird 9-cu sinif bazasından orta ixtisas məktəbinə qəbul olunub. Tələbə adını qazanan məzunlardan 4-ü 500-700 intervalında bal toplayıb. Yaradılan müasir şərait tədrisin səmərəli təşkilinə və daha böyük uğurların qazanılmasına imkan verəcək.

Şahbuz şəhər 2 nömrəli tam orta məktəbindəki şahmat sinfi lazımi avadanlıqlarla təmin olunub. Bildirilib ki, “2009-2014-cü illərdə Azərbaycanda şahmatın inkişaf etdirilməsi Dövlət Proqramı”na əsasən muxtar respublikada da bu istiqamətdə ardıcıl tədbirlər görülür, şəhər və rayon mərkəzlərində yeni şahmat məktəbləri tikilərək istifadəyə verilir. Artıq muxtar respublikanın ümumtəhsil məktəblərində şagirdlərin əqli inkişafı və asudə vaxtlarının səmərəli təşkili məqsədilə şahmat fənni tədris olunur.

Gələcəyimiz olan uşaqların bilikli, zəngin dünyagörüşünə malik olması ilə yanaşı, onların fiziki sağlamlığının qorunması və vətənpərvər ruhda böyüməsi də bu gün ümumtəhsil məktəbləri qarşısında duran ən mühüm vəzifələrdəndir. Buna görə də məktəbdə geniş idman zalı və hər cür ləvazimatlarla təchiz olunan hərbi kabinə istifadəyə verilib.

Şahbuz şəhər 2 nömrəli tam orta məktəbində şagirdlərin qədim adət-ənənələrimizə və milli dəyərlərimizə sadiq ruhda böyüdülməsi diqqət mərkəzində saxlanılır. “Əmək təlimi” dərslərində qızlara tikmə və toxuculuq sənətinin sirləri öyrədilir.

Pedaqoji kollektivlə görüşən Ali Məclisin Sədri deyib ki, ölkənin tərəqqisi təhsildən, məktəbin inkişafı isə müəllimlərin fəaliyyətindən asılıdır. Yaradılan şərait məktəbdə tədrisin günün tələbləri səviyyəsində qurulmasına imkan verəcək. Şahbuz şəhər 2 nömrəli tam orta məktəbi uğurlu nailiyyətləri ilə seçilir. Kollektiv daha da fəal olmalı, gənc nəslin əsl vətəndaş kimi yetişdirilməsinə səy göstərməlidir.

Məktəbin müəllimi Rauf Bağırov deyib: Təhsil o zaman inkişaf edir ki, ona dövlət qayğısı göstərilir. Bu gün ölkəmizdə, eləcə də muxtar respublikamızda müasir təhsil infrastrukturu yaradılıb. İstər şəhər və rayon mərkəzlərində, istərsə də ən ucqar dağ kəndlərində yeni məktəb binaları tikilərək istifadəyə verilir. Bütün bunlar da müəllimləri daha səylə işləməyə, intellektli, vətənpərvər və yüksək təhsilli gənclər yetişdirməyə ruhlandırır.

Məktəb binasının həyətində də abadlıq işləri görülüb, yaşıllıqlar salınıb, müasir işıqlandırma sistemi quraşdırılıb.

Oktyabrın 27-də Şahbuz şəhər mərkəzi istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov rəmzi açılışı bildirən lenti kəsib, binada yaradılan şəraitlə tanış olub.

Məlumat verilib ki, 2 mərtəbədən ibarət binada rabitə evi, kitabxana, polis sahə məntəqəsi, Yeni Azərbaycan Partiyası Şahbuz şəhər ərazi ilk təşkilatı, inzibati ərazi dairəsi üzrə nümayəndəlik, bələdiyyə və klub fəaliyyət göstərəcək.

Şahbuz şəhər inzibati ərazi dairəsi üzrə nümayəndəlik və bələdiyyə üçün otaqlarda nümunəvi iş şəraiti yaradılıb. Baxış zamanı Ali Məclisin Sədri Şahbuz şəhərinin abadlaşmasında inzibati ərazi dairəsi üzrə nümayəndəlik və bələdiyyənin üzərinə mühüm vəzifələr düşdüyünü bildirib, qarşıdan gələn bələdiyyə seçkilərinə hazırlıqla bağlı müvafiq tapşırıqlar verib.

Rabitə evində 512 yerlik 2 nömrəli ATS quraşdırılıb. Poçt bölməsində də lazımi şərait yaradılıb.

Mərkəzdə 6 min 558 kitab fonduna malik kitabxana və 55 yerlik iclas zalı var. Yeni Azərbaycan Partiyası Şahbuz şəhər ərazi ilk təşkilatı üçün ayrılmış iş otağı mərkəzin ikinci mərtəbəsində yerləşir. Məlumat verilib ki, ərazi ilk təşkilatının 409 üzvü var. Onlardan 144-ü gənc, 225-i isə qadındır.

Binada Naxçıvan Muxtar Respublikası Dövlət Torpaq və Xəritəçəkmə Komitəsinin Şahbuz rayon şöbəsi üçün də iş otaqları ayrılıb.

Ali Məclisin Sədri bina ilə tanışlıqdan sonra Şahbuz şəhər sakinləri ilə görüşüb.

Şahbuz şəhər sakini Xanlar Səfərəliyev deyib ki, ümummilli liderimiz Heydər Əliyevin müəyyənləşdirdiyi siyasi xəttin davam etdirilməsi ölkəmizi inkişaf və tərəqqiyə qovuşdurub. Muxtar respublikamızda da bu işlər uğurla həyata keçirilir. Bütün yaşayış məntəqələri müasir görkəmi ilə seçilir. Dağlar qoynunda yerləşən Şahbuz rayonuna da bu inkişafdan pay düşüb. İstər ucqar dağ kəndlərində, istərsə də rayon mərkəzi olan Şahbuz şəhərində insanların yaşaması, işləməsi üçün bütün şərait var. Hər il istifadəyə verilən yeni sosial obyektlər, çəkilən yollar, açılan iş yerləri insanların torpağa bağlılığını, onların qurub-yaratmaq əzmini daha da artırır. Xanlar Səfərəliyev sakinlər adından minnətdarlıq edib.

Ali Məclisin Sədri həyata keçirilən quruculuq işləri münasibətilə sakinləri təbrik edib, görülən bu işləri ölkəmizin iqtisadi qüdrətinin və mövcud sabitliyin nəticəsi kimi dəyərləndirərək deyib: 2007-ci ildə təsdiq olunmuş “Naxçıvan Muxtar Respublikasının Şahbuz rayonunun Şahbuz qəsəbəsinə şəhər statusunun verilməsi haqqında” Azərbaycan Respublikası Qanununa əsasən rayon mərkəzinə şəhər statusu verilib. Bu dövrdən başlayaraq burada kompleks quruculuq işləri aparılıb, şəhərin ərazisi genişləndirilib. Dəniz səviyyəsindən 1355 metr yüksəklikdə yerləşən Şahbuz şəhərində əməkhaqqına əlavə 10 faiz ödənilir. Aparılan quruculuq işləri şəhərə müasir görkəm verməklə yanaşı, həm də əhalinin rahat yaşayışına xidmət edir. Bu gün şəhərdə yeni məktəb binası, dövlət strukturları üçün müasir bina istifadəyə verildi. Hazırda şəhərdə içməli su və kanalizasiya sistemləri də yenidən qurulur. Bütün bunlar sakinlərin problemlərinin vaxtında həllinə, eləcə də onların asudə vaxtlarının səmərəli təşkilinə imkan verəcək. Sakinlər də yaradılanların qədrini bilməli, gənc nəslin dövlətimizə sədaqət ruhunda böyüməsinə diqqəti artırmalıdırlar.

Məlumat verilib ki, şəhərdə geniş quruculuq işləri aparılıb, yol infrastrukturu tamamilə yenilənib, şəhərdaxili 2 kilometr yola yeni asfalt örtük salınıb. Həmçinin yol üzərindəki körpü genişləndirilərək təmir olunub, 3 suötürücü tikilib. Şəhərdə 3 min 800 metr fiber-optik kabel, 3 min metr məsafədə elektrik xətti, 180 metr yeraltı kabel çəkilib, müasir işıqlandırma sistemi qurulub. Bundan başqa, 120 metr uzunluğunda müxtəlif diametrli qaz xətlərinin yeri dəyişdirilib, yeni tikililərə 460 metr uzunluğunda qaz xətti çəkilib.

Ali Məclisin Sədri şəhərdə abadlıq və yaşıllaşdırma işlərinin davam etdirilməsi barədə tapşırıqlar verib.