Şahzadə Harri və Meqan bu gün Böyük Britaniyaya qayıdırlar
London, 26 avqust, AZƏRTAC
Şahzadə Harrinin və onun həyat yoldaşı Meqan Marklın bu gün Böyük Britaniyaya qayıdacaqları gözlənilir.
AZƏRTAC BBC-yə istinadla xəbər verir ki, onların Sasseks hersoqu və hersoginyasının iki övladı Arçi və Lilibetlə birlikdə Kaliforniyadan Böyük Britaniyaya şəxsi qaydada uçacaqları bildirilir.
Sasseks hersoqu və hersoginyasının sözçüsü məsələ ilə bağlı açıqlama verməyəcəklərini bildirib.
Ötən həftə yayılan məlumatlara əsasən, cütlüyün kral ailəsinin rəsmi vəzifələrinə qayıtmayacağı, Böyük Britaniyada işləməyən kral ailəsi üzvləri və özəl şəxslər kimi yaşayacaqları qeyd olunur. Ailənin Londondan kənarda, Kotsvolds bölgəsində yerləşən şəxsi mülkdə məskunlaşacağı ehtimal edilir. Arçi və Lilibetin artıq məktəbdə qeydiyyatdan keçirildiyi bildirilir.
Xatırladaq ki, Şahzadə Harri və Meqan 2020-ci ilin əvvəlində kral ailəsindəki rəsmi vəzifələrindən geri çəkilib, həmin ilin martında Kaliforniyada məskunlaşıblar.
Məlumata görə, Kral III Çarlza cütlüyün Böyük Britaniyaya köçmək planı barədə bu ayın əvvəlində məlumat verilib. Ailə bu ilin iyulunda Kralı Hayqrouvdakı iqamətgahında ziyarət etsə də, həmin görüş zamanı köç məsələsinin müzakirə olunmadığı bildirilir.
Bölmənin digər xəbərləri
