Sakaryada 300-dən çox azərbaycanlı tələbəyə yardım göstərilib
Bakı, 21 may, AZƏRTAC
Türkiyənin Sakarya vilayətində COVID-19 pandemiyası ilə müvəqqəti çətinliklə üzləşmiş 300-dən çox azərbaycanlı tələbəyə maddi və ərzaq yardımı göstərilib.
Diasporla İş üzrə Dövlət Komitəsindən AZƏRTAC-a bildiriblər ki, Sakarya Azərbaycan-Türkiyə Qardaşlıq Topluluğunun rəhbəri Vüqar Nəsirov bildirib ki, müqəddəs Ramazan ayında həyata keçirilən humanitar aksiyalar zamanı 200 tələbəyə ərzaq yardımı edilib, 100 tələbəyə (50-si birbaşa maddi yardım alıb, 50-si alış-veriş kartı ilə təmin olunub) maddi kömək göstərilib. Xeyriyyə aksiyası pandemiyadan əvvəl başqa şəhərlərdən səyahət edən və şəxsi işlərinə ilə əlaqədar Sakaryaya gələn, karantin müddətində yaşadıqları yerlərə qayıda bilməyən tələbələri və onların ailə üzvlərini də əhatə edib.
V.Nəsirov rəhbərlik etdiyi qurumun nəcib təşəbbüsünə dəstək olan Azərbaycan və Türkiyə dövlətlərinə, Müstəqil Sənayeçi və İş Adamları Dərnəyinə (MÜSİAD), Türkiyənin Kızılay təşkilatına, Sakarya Universitetinə, Uluslararası Öyrənci Dərnəkləri Federasiyasına (UDEF), Adatıp xəstəxanasının rəhbərliyinə və digərlərinə minnətdarlığını bildirib.
Bölmənin digər xəbərləri
