Sankt-Peterburqda Azərbaycanlıların Soyqırımı Günü ilə əlaqədar tədbir keçirilmişdir
Sankt-Peterburq, 2 aprel (AZƏRTAC). Sankt-Peterburqdakı “Rodina” kinoteatrında Azərbaycanlıların Soyqırımı Günü ilə əlaqədar beynəlxalq elmi-praktiki konfrans keçirilmişdir.
Azərbaycanın Sankt-Peterburqdakı baş konsulluğunun Azərbaycan Milli Elmlər Akademiyasının (AMEA) A.A.Bakıxanov adına Tarix İnstitutu və Sankt-Peterburqun “Vətən” regional ictimai təşkilatı ilə birgə təşkil etdiyi tədbirdə 600-dək tarixçi, şərqşünas, ictimai və siyasi xadim, habelə tələbələr və Neva sahilindəki şəhərdə yaşayan azərbaycanlı gənclər iştirak etmişlər.
Əvvəlcə soyqırımı qurbanlarının xatirəsi bir dəqiqəlik sükutla anılmışdır.
Azərbaycanın Sankt-Peterburqdakı baş konsulu Qüdsi Osmanov konfransı açaraq, xüsusən, böyüməkdə olan nəslin təlim-tərbiyəsi üçün belə tədbirlərin keçirilməsinin əhəmiyyətini vurğulamışdır. O, gəncləri ölkələrinin tarixini dərindən öyrənməyə və Azərbaycan reallıqlarının dünya ictimaiyyətinə çatdırılması işində daha fəal iştirak etməyə çağırmışdır. Baş konsul, həmçinin Azərbaycanın sürətli inkişafından, ölkədə aparılan islahatlardan söz açaraq qeyd etmişdir ki, xaricdə yaşayan hər bir azərbaycanlı öz tarixi Vətəninin uğurları və nailiyyətləri ilə fəxr edir. Azərbaycan xalqının ümummilli lideri Heydər Əliyevin hakimiyyətə qayıdışı ilə ölkəmiz tarixinin yeni dövrünə qədəm qoymuşdur. Əsası Heydər Əliyev tərəfindən qoyulmuş və hazırda Prezident İlham Əliyev tərəfindən davam etdirilən bu xətt qüdrətli ordusu, sabit iqtisadiyyatı olan, uğurlu xarici siyasət yürüdən güclü Azərbaycan dövlətinin yaradılmasına xidmət edir. Diplomat demişdir: “Belə bir dövlətdə XX əsrin faciəli hadisələrinin təkrarlanması qeyri-mümkündür”.
Tarix İnstitutunun direktoru, AMEA-nın müxbir üzvü, Milli Məclisin deputatı Yaqub Mahmudov erməni millətçilərinin uzun illər boyu Azərbaycan xalqına qarşı həyata keçirdikləri məqsədyönlü soyqırımı siyasətindən, əzəli Azərbaycan torpaqlarının Ermənistan tərəfindən işğal edilməsindən, habelə ölkəmizin tarixinin biabırçı saxtalaşdırılması faktlarından ətraflı söz açmış, institutun ölkəmizin tarixi ilə bağlı real faktların üzə çıxarılması məqsədi ilə dünyanın bir çox ölkə və şəhərlərinin, o cümlədən Sankt-Peterburqun arxivlərində apardığı böyük işdən danışmışdır. Y.Mahmudov erməni şovinistlərinin və “Daşnaksutyun” partiyası üzvlərinin Azərbaycan xalqına qarşı cinayətkar əməllərinin təsdiqi olan yeni aşkar edilmiş arxiv sənədlərindən danışaraq xüsusi vurğulamışdır ki, ölkəmizin rəhbərliyi tarixin öyrənilməsi, real tarixi proseslər haqqında gerçək informasiyanın dünya ictimaiyyətinə çatdırılması, Azərbaycanın tarixinin saxtalaşdırılmasına qarşı mübarizə məsələlərinə böyük əhəmiyyət verir.
Yaqub Mahmudov Heydər Əliyev Fondunun vitse-prezidenti Leyla Əliyevanın təşəbbüsü ilə aparılan “Xocalıya ədalət” beynəlxalq kampaniyasının uğurlarını yüksək qiymətləndirmişdir. O, tədbir iştirakçılarına başçılıq etdiyi institutun nəşri olan tarixi ədəbiyyat haqqında məlumat verərək demişdir ki, “İrəvan xanlığı”, “Ermənilərin Azərbaycan torpağında əməlləri haqqında tarixi faktlar”, “Azərbaycanlılar” adlı kitabların və Qarabağ, xalqımızın soyqırımı, habelə tarix və memarlıq abidələrinin məhv edilməsi haqqında digər nəşrlərin təqdimatı keçirilmişdir.
“Qarabağın qanlı girdabı” kitabının müəllifi Yuri Pompeyev demişdir ki, tarix gələcək nəsillər üçün ibrət dərsidir və bu gün bizim vəzifəmiz həmin hadisələrin təkrarlanmasına yol verməməkdir. Bunun üçün tarixi təcrübəni dərindən öyrənib tədqiq etmək və gələcək nəsillərə ötürmək lazımdır. Y.Pompeyev demişdir: “Bu gün Azərbaycan müstəqil, olduqca nüfuzlu, ən başlıcası isə müstəqil siyasət yeritməyə qabil sabit dövlətdir”.
“Vətən” regional ictimai təşkilatının rəhbəri Məzahir Həsənov, Sankt-Peterburqdakı Azərbaycan diasporunun rəhbəri Heydər İmanov gəncləri belə tədbirlərdə daha fəal iştirak etməyə çağıraraq demişlər ki, Azərbaycan tarixinin faciəli səhifələri unudulmamalıdır.
AMEA-nın tarixçi alimləri Hacı Həsənov, Natiq Məmmədzadə, İlqar Niftalıyev, Kamran İsmayılov konfransda çıxış edərək erməni millətçilərinin 1918-1920-ci illərdə törətdikləri cinayət faktlarını açıqlamış, habelə ermənilərin Azərbaycan ərazisinə köçürülməsi, Cənubi Qafqazda etnosiyasi vəziyyətin dəyişməsi və erməni işğalçılarının əzəli Azərbaycan torpaqlarını işğal etməsi məsələlərinə toxunmuşlar.
Elmi-praktiki konfrans çərçivəsində “Tarixin keşiyində” filminin təqdimatı olmuşdur. Filmin ssenari müəllifi və aparıcısı Yaqub Mahmudovdur. Filmdə müasir Azərbaycanın dinamik inkişafından, Azərbaycan xalqının ümummilli lideri Heydər Əliyevin müstəqil dövlətimizin təşəkkülündə rolundan, Prezident İlham Əliyevin sosial proqramların reallaşdırılmasına yönəlmiş xəttindən, bütün dünyanın hörmətlə yanaşdığı yeni Azərbaycanda gedən quruculuq prosesindən söz açılır.
“Rodina” kinoteatrının foyesində fotosərgi açılmışdır. Sərgidə Azərbaycanın əsrlər boyu dəyişən sərhədlərini əks etdirən coğrafi xəritə təqdim edilmişdir. Tədbir iştirakçılarına AMEA-nın Tarix İnstitutunun nəşri olan kitablar paylanmışdır.
Tədbir zamanı Rusiyanın Azərbaycan Gənclər Təşkilatının (RAGT) Sankt-Peterburq regional bölməsinin nümayəndələri Rusiya Federasiyasının qanunverici orqanlarına təqdim etmək məqsədilə “Xocalıya ədalət” kampaniyası çərçivəsində imza toplanması aksiyasını davam etdirmişlər. Bu il fevralın 27-də Sankt-Peterburqda başlanmış, martın 25-də Rusiyanın şimal paytaxtında Novruz şənlikləri çərçivəsində aparılan bu aksiya indi də davam edir.
Asya Hacızadə
AZƏRTAC-ın xüsusi müxbiri
Sankt-Peterburq
Bölmənin digər xəbərləri
