Sankt-Peterburqda VI Neva beynəlxalq ekologiya konqresi keçirilmişdir
Bakı, 22 may (AZƏRTAC). Sankt-Peterburqun Tavriya sarayında VI Neva beynəlxalq ekologiya konqresi keçirilmişdir. Bu konqres beynəlxalq ekoloji təhlükəsizlik sisteminin formalaşmasına kömək göstərən nadir diskussiya meydanıdır.
Konqresin əsas təşkilatçıları Rusiya Federasiyasının Federasiya Şurası və MDB-yə üzv dövlətlərin Parlamentlərarası Assambleyası (MDB PAA), rəsmi tərəfdaşı isə BMT-nin Sənaye İnkişafı Təşkilatıdır (YUNİDO).
Ekoloji konqresin plenar iclaslarında Federasiya Şurasının sədri Valentina Matviyenko , Sankt-Peterburqun qubernatoru Georgi Poltavçenko və Leninqrad vilayətinin qubernatoru Aleksandr Drozdenko, BMT-nin nümayəndələri, Beynəlxalq Təbiəti Mühafizə İttifaqının baş direktoru Culiya Marton-Lefevr, Rusiya regionlarının, nazirliklərinin və təbiəti mühafizə idarələrinin rəhbərləri, MDB ölkələri parlamentlərinin üzvləri iştirak etmişlər.
Bundan başqa, Tavriya sarayında “Ekoloji mədəniyyət - ekoloji problemlərin həllinin əsasıdır” adlı sərgi təşkil olunmuşdur. Sərgidə ekologiya sahəsində Rusiya və xarici şirkətlərin müxtəlif yenilikləri nümayiş etdirilmişdir.
Sərgi çərçivəsində həmçinin IDEA kampaniyası - 2011-ci ildə Bakıda Heydər Əliyev Fondunun vitse-prezidenti Leyla Əliyevanın təşəbbüsü ilə “Ətraf Mühitin Mühafizəsi Fəaliyyəti üzrə Beynəlxalq Dialoq” təqdim olunmuşdur. Qeyd etmək lazımdır ki, sərgi çox böyük ictimai maraq doğurmuşdur. Sərgiyə gələnlər beynəlxalq kampaniyanın fəaliyyətinə həsr olunmuş və paylamaq üçün nəzərdə tutulmuş bütün materialları pavilyonun stendlərindən götürüb aparmışlar.
Azərbaycan Respublikasının Rusiya Federasiyasındakı səfirinin müavini Qüdsi Osmanov “Azərbaycanda ekoloji təşəbbüslər” mövzusunda məruzə ilə çıxış edərək konqresin iştirakçılarına keçmiş sovet dövründə Azərbaycanın qarşılaşdığı ekologiya problemlərindən və onların aradan qaldırılması tədbirlərindən danışmışdır. Qüdsi Osmanov demişdir: “Bu gün Azərbaycanda ölkənin ekoloji təhlükəsizliyinin təmin edilməsinə yönəldilmiş dövlət proqramları həyata keçirilir. Xəzər dənizi neft-qaz yataqlarının uzun illər istifadəsinin nəticələrinin aradan qaldırılmasına dair proqramlara, təmizləyici qurğuların yaradılmasına xüsusi diqqət yetirilir. Böyük şəhərlərin yaşıllaşdırılması, şəhərlərin məişət tullantılarından təmizlənməsinə könüllülərin cəlb edilməsi və s. sahədə fəal iş aparılır”.
Diplomat həmçinin əsas məqsədi gənclərlə birgə fəaliyyət göstərməkdən, onlarda ekoloji mədəniyyəti tərbiyə etməkdən, ekoloji problemlər sahəsində, ailədə, cəmiyyətdə və ölkədə bu problemlərin həlli yollarını axtarıb tapmaqdan ibarət olan IDEA şirkətinin genişmiqyaslı fəaliyyət göstərdiyini xüsusi vurğulamış və bildirmişdir ki, IDEA müxtəlif beynəlxalq tədbirlərini və treninqlərini təkcə Bakıda keçirmir. 2012-ci ildə Qəbələdə gənc ekoloqlar üçün məktəb-treninq keçirilmişdir. Bundan başqa, IDEA Qafqazda tükənməkdə olan beş fauna növünün - ayı, canavar, ceyran, qartal və bəbirin qorunmasına yönəldilmiş “Böyük beşlik” adlı proqramı həyata keçirir, habelə 300.000 ting əkilməsinə, sığırçın yuvalarının qurulmasına kömək göstərməyi planlaşdırır.
Q.Osmanov çıxışının sonunda demişdir: “Hazırda ekologiya anlayışı təkcə Azərbaycan üçün deyil, bütün Qafqaz regionu üçün çox vacibdir. Ekoloji təhlükəsizlik Cənubi Qafqazda bütün energetika layihələri üçün prioritet olmalıdır. Bu barədə AZƏRTAC Azərbaycan Respublikasının Sankt-Peterburqdakı baş konsulluğunun mətbuat xidmətinə istinadən xəbər verir.
Bölmənin digər xəbərləri
