SAYĞACLAŞDIRMA VƏ QIŞA HAZIRLIQ İŞLƏRİ PARALEL APARILIR
“Azərenerji” Açıq Səhmdar Cəmiyyətinin mətbuat xidmətindən AZƏRTAC-a bildirmişlər ki, Ağstafa paylayıcı elektrik şəbəkəsinin əməkdaşları xidmət göstərdikləri ərazidə abonentlərin sayğaclaşdırılmasını və payız-qış mövsümünə hazırlıq işlərini cədvəl üzrə vaxtında başa çatdırmaq niyyətindədirlər. İndiyədək rayon ərazisində 3 mindən çox sayğac quraşdırılmışdır.Yenigün, Xətai, Qaçaq Kərəm, Aşağı Göycəli kəndlərində sayğaclaşdırma başa çatdırılmışdır. Hazırda quraşdırıcılar Həsənsu və Eynallı kəndlərində işləyirlər.
Şəbəkənin kollektivi qışa hazırlıq işlərini də plan üzrə aparır. 110/35/10 kilovoltluq “Ağstafa”, “S.Vurğun”, 110/6 kilovoltluq “Muğanlı”, 35 kilovoltluq “Daşkəsəmən” yardımçı stansiyalarında mövsümlə əlaqədar bütün işlər görülüb qurtarmışdır. Yararsız avadanlıq yenisi ilə əvəz olunmuşdur. Yardımçı stansiyalarda yanğın əleyhinə tədbirlər həyata keçirilmişdir.
Bölmənin digər xəbərləri
