SƏFİR RENO HARNİŞ ÖZ PLANLARINI AÇIQLAMIŞDIR
Senatın Xarici əlaqələr komitəsinin üzvləri ABŞ-ın bir sıra ölkələrə təyin olunan yeni səfirlərinin namizədlikləri üzrə səsvermə keçirəcəklər. Onların arasında Prezident Buşun Azərbaycana yeni təyin etdiyi səfir Reno Harniş də var. Senatorlar səfir Harnişin aprelin 9-da Komitənin dinləmələrindəki çıxışına əsasən qərar verəcəklər.
Səfir Harniş çıxışında bildirmişdir ki, namizədliyi təsdiq olunsa, o, Bakıdakı işində diqqəti dörd əsas istiqamətə yönəltmək niyyətindədir: antiterror müharibəsində Azərbaycanın rolu, davam edən Dağlıq Qarabağ münaqişəsinə son qoyulması, ölkədə siyasi və iqtisadi islahatların həyata keçirilməsi və Şərq-Qərb enerji dəhlizinə Amerikanın davamlı dəstəyi.
Reno Harniş vurğulamışdır ki, Azərbaycan müstəqillik qazandıqdan sonra iki ölkə arasında bir çox sahələrdə möhkəm əməkdaşlıq yaranmışdır. Sadaladığı dörd əsas istiqamət barədə bir qədər ətraflı danışan səfir 11 sentyabr hadisələrindən sonra ölkəmizin atdığı konkret addımlar haqqında senatorlara məlumat vermişdir. Azərbaycanı İraqın tərksilah edilməsi üzrə koalisiyanın fəal üzvü adlandıran diplomat buna görə ölkəmizə minnətdarlığını bildirmişdir. «Dağlıq Qarabağ məsələsinin həlli bölgədə tərəqqinin açarıdır» - deyən Reno Harniş ABŞ-ın Azərbaycanın ərazi bütövlüyünü tanıdığını vurğulamışdır. Bununla yanaşı, səfir etiraf etmişdir ki, bu il Ermənistanda və Azərbaycanda seçkilər ili olduğundan sülh danışıqlarında irəliləyişə çox guman etmir. Seçkilərdən sonra isə ABŞ digər həmsədrlərlə birgə münaqişənin həlli yolunda daha çevik və mərkəzləşmiş qaydada səylərini davam etdirəcəkdir.
Namizədliyi təsdiqlənərsə, Reno Harniş ABŞ-ın Azərbaycandakı beşinci səfiri olacaqdır. Onun Afrika, Qərbi və Şərqi Avropada ABŞ-ın diplomatik missiyalarında fəaliyyət təcrübəsi var. Reno Harniş alman, italyan, İsveç və bir qədər də ərəb dillərində danışır. Evlidir, iki uşağı var.
Şəfəq Akifqızı
AZƏRTAC-ın xüsusi müxbir
Vaşinqton
Bölmənin digər xəbərləri
