ŞƏHİD AİLƏLƏRİNƏ VƏ ƏLİLLƏRƏ QAYĞI DÖVLƏTİN DAİM DİQQƏT MƏRKƏZİNDƏDİR
AZƏRTAC xəbər verir ki, yanvarın 19-da Əmək və Əhalinin Sosial Müdafiəsi Nazirliyində 20 Yanvar əlilləri və şəhid ailələri üzvlərinin iştirakı ilə Qanlı yanvar faciəsinin 15-ci ildönümünə həsr olunmuş xatirə mərasimi keçirilmişdir.
Mərasim iştirakçıları Azərbaycanın azadlığı uğrunda şəhid olmuş övladlarımızın əziz xatirəsini bir dəqiqəlik sükutla yad etdilər.
Nazir Əli Nağıyev tədbirdə çıxış edərək, 20 Yanvar faciəsini ölkəsinin müstəqilliyi, ərazi bütövlüyü uğrunda mübarizəyə qalxmış Azərbaycan xalqına qarşı sovet imperiyası tərəfindən törədilən misli görünməmiş cinayət kimi qiymətləndirdi. O dedi ki, lakin işğalçı sovet ordusunun qəddarlıqla həyata keçirdiyi qanlı qırğın Azərbaycan xalqının iradəsini, onun öz azadlığı uğrunda mübarizə əzmini qıra bilmədi.
Əli Nağıyev Azərbaycanın o vaxtkı rəhbərliyinin xalqımıza qarşı bu təcavüzünə yol verilməməsi, sonra isə törədilmiş qırğının səbəblərinin araşdırılması, ona siyasi-hüquqi qiymət verilməsi və cinayətkarların məsuliyyətə cəlb edilməsi istiqamətində heç bir iş görmədiyini bildirərək dedi ki, yalnız 1994-cü ildə Azərbaycan xalqının ümummilli lideri Heydər Əliyevin təşəbbüsü ilə 20 Yanvar faciəsinə rəsmi qiymət verildiyini vurğuladı.
Nazir bildirdi ki, Azərbaycan xalqı 1990-cı ilin dəhşətli yanvar günlərində sinələrini tanklara, pulemyot və avtomat güllələrinə sipər etmiş igid oğullarının hünərini heç vaxt unutmayacaqdır. 20 Yanvar faciəsi qurbanlarının əziz xatirəsi hər il respublikamızın bütün şəhər və rayonlarında geniş qeyd edilir. İndi də 20 Yanvar faciəsinin 15-ci ildönümü ilə əlaqədar Azərbaycan Prezidenti İlham Əliyevin imzaladığı Sərəncama əsasən geniş tədbirlər planı hazırlanaraq həyata keçirilir. Bütün bu tədbirlərdə yanvar hadisələrinin səbəbləri, günahkarları bir daha açıqlanır, bu qanlı qırğının xalqımızın tarixinin həm faciəvi, həm də qəhrəmanlıq səhifəsi kimi gələcək nəsillərin xatirəsində daim yaşayacağı vurğulanır. Gənc nəsil bilməlidir ki, 1990-cı ilin məşum yanvar günləri xalqımız üçün ağır sınaq oldu və o, əvəzsiz itkilər versə də, bu sinaqdan mətanətlə çıxdı.
Ulu öndərimiz Heydər Əliyev vaxtilə demişdir ki, 1990-cı ilin yanvarından sonra Azərbaycan öz torpaqlarını qorumaq uğrunda müharibədə çox şəhidlər vermişdir. Ona görə də indi Şəhidlər xiyabanında 20 Yanvar şəhidləri ilə yanaşı, erməni təcavüzkarlarına qarşı döyüşlərdə həlak olan qəhrəman oğullarımızın məzarları vardır. Bu səbəbdən də Şəhidlər xiyabanı Azərbaycan xalqının and yerinə çevrilmişdir.
Nazir bildirdi ki, 20 Yanvar şəhidlərinin ailə üzvləri, qanlı hadisələr zamanı fiziki sağlamlıqlarını itirərək əlil olmuş soydaşlarımıza qayğı Azərbaycan dövlətinin, ümummilli liderimiz Heydər Əliyevin daim diqqət mərkəzində olmuşdur. Bu siyasət indi Prezident İlham Əliyev tərəfindən davam etdirilir. Natiq bu qəbildən olan vətəndaşlarımızın və ümumən əhalinin sosial müdafiəsi sahəsində dövlətin həyata keçirdiyi siyasətin icrası ilə əlaqədar nazirlik tərəfindən görülən işlər barədə də danışdı və bildirdi ki, sosial müdafiəyə ehtiyacı olan insanların problemlərinin həlli üçün gələcəkdə də ardıcıl addımlar atılacaqdır.
Anma mərasimində çıxış edənlər 20 Yanvar əlillərinə və şəhid ailələrinə göstərilən qayğıya görə dövlətimizin başçısına minnətdarlıqlarını bildirərək, ölkəmizdə sosial siyasət sahəsində görülən işləri yüksək qiymətləndirdilər. Eyni zamanda, pensiyaçıların sosial müdafiəsinin yaxşılaşdırılması, əhaliyə ödənilən bir sıra sosial müavinətlərin artırılması haqqında Azərbaycan Prezidenti İlham Əliyevin bu yaxınlarda imzaladığı fərman və sərəncamını bu qayğının daha bir təzahürü kimi səciyyələndirdilər.
Mərasimin sonunda 434 nəfər 20 Yanvar əlilinə və şəhid ailələri üzvlərinə 47,5 milyon manatlıq yardım edildi.
Bölmənin digər xəbərləri
