Şəhid anası: Təsəllimiz odur ki, qanları yerdə qalmadı, torpaqlarımız azad olundu VİDEO
Tərtər, 29 sentyabr, Tahir Ağaməmmədov, AZƏRTAC
Azərbaycan Silahlı Qüvvələrinin hərbi qulluqçusu Ruslan Şahbazovun ən böyük istəyi torpaqlarımızın, o cümlədən baba yurdu olan Laçının işğaldan azad edilməsi idi. Məhz bu istək onu hərbiyə gətirdi. Xidmətini ön xətdə aparan cəsur hərbçi 2016-cı il Aprel döyüşlərində iştirak edib. 2020-ci il 44 günlük Vətən müharibəsində Talış kəndinin azad edilməsi uğrunda gedən döyüşlərdə şücaət göstərərək şəhadətə yüksəlib.
AZƏRTAC-ın bölgə müxbiri Tərtər rayonunun Ələsgərli kəndində şəhidin valideynləri ilə görüşüb, onlarla qəhrəman Vətən oğlunun həyatı və şərəfli döyüş yolu haqqında söhbət edib.
Atası Mahir kişi deyir ki, Ruslan cəsarətli, mərd oğlan idi: “Yoldaşları da onun qorxmazlığından danışırlar. Azərbaycan Ordusunda 8 il idi ki, xidmət edirdi. 2016-cı ilin Aprel döyüşlərində də iştirak etmişdi. 44 günlük Vətən müharibəsinin ilk günlərindən Talış-Suqovuşan istiqamətində döyüşlərdə iştirak edib, şücaət göstərib. Düşmənin tankını və içərisində onlarla əsgər olan “KamAZ” markalı avtomobilini vurub. Yaralanmasına baxmayaraq, xəstəxanaya getməkdən imtina edib. Sentyabrın 29-da şəhid olub...”.
Anası Pərvanə xanım deyir ki, Ruslan haqqında danışmaq çox ağır olsa da qürurvericidir: “Ruslan məktəbdə yaxşı oxumasa da, təlim-tərbiyəsinə görə həmişə seçilib. Uşaqlıqdan zəhmətkeşliyi ilə seçilirdi, ataya, anaya, qohumlara çox yaxşı idi. Hərbiyə marağı var idi. Əsgərlikdən gələndən sonra bir müddət Bakı şəhərində işlədi, sonra hərbiyə getdi. Ruslan həmişə baba yurdu Laçın rayonunun Mayis kəndinə getməyi arzulayırdı. Lakin o torpağı görmək qisməti olmadı. Amma şəkli kəndə vuruldu. Biz də gedib ziyarət etdik. Ora getmək mənim üçün çox ağır, çətin oldu. Çünki dağların, dərələrin hər yerində şəhid naləsi, şəhid qanı, şəhid nəfəsi, bir ananın fəryadı var idi... Ruslan payızda toy etmək istəyirdi. Deyirəm, kaş bir övladı, xatirəsi olaydı... Oğul Vətən üçün, namus-qeyrət üçündür. Amma övlad acısı ata-ana üçün çox ağırdır. Təsəllimiz odur ki, şəhidlərin qanları yerdə qalmadı, torpaqlarımız azad olundu. Ruslan kimi oğulun anası olmaq fəxrdir”.
Azərbaycan Respublikası Silahlı Qüvvələrinin hərbi qulluqçusu Ruslan Şahbazov Prezident İlham Əliyevin sərəncamları ilə "Azərbaycan Bayrağı" ordeni, “Vətən uğrunda”, “Suqovuşanın azad edilməsi uğrunda”, "Hərbi xidmətə görə" medalları ilə təltif olunub.
Bölmənin digər xəbərləri
